Əli Mustafa: “Ən başlıcası da, çalışmalıyıq ki, Macarıstan bu qərarında sona qədər israrlı olsun”
Macarıstan Avropa İttifaqının (Aİ) Ermənistana 10 milyon avro (11 milyon dollar) dəyərində əlavə "qeyri-öldürücü" hərbi yardım ayırmasına növbəti dəfə blok qoyub.
Bu yardım Avropa Sülh Təşəbbüsü (EPF) çərçivəsində ayrılmalıydı.
Aİ-nin xarici siyasət rəhbəri Kaya Kallas ilin əvvəlində bu yardımın ayrılmasını təklif edib. Təsdiqlənməsi üçün ona Aİ-nin 27 üzv ölkəsinin yekdil dəstəyi lazımdır. Macarıstandan savayı, qalan üzvlər Kallasın təklifini dəstəkləyib. Məlum olub ki, Aİ-nin xarici işlər nazirlərinin aprelin 14-də Lüksemburqdakı görüşündə Budapeşt qərara veto qoyub.
Onu da qeyd edək ki, Macarıstan ötən ilin iyulunda da belə bir veto qoymuşdu. Ancaq sonra nədənsə Macarıstan Aİ-nin təzyiqlərinə dözməyərək geri çəkildi və Ermənistana 10 milyon avroluq yardım göstərildi. Bu dəfə də Macarıstan veto qoyub. Maraqlıdır, bəs bu dəfə necə olacaq?
“Bu dövlətlər Orbanın timsalında müstəqil siyasət yeridən, ədaləti müdafiə edən dövlət başçısı istəmirlər”
Sözügedən məsələni “Bakı-Xəbər”ə şərh edən siyasi şərhçi Əli Mustafa buna bir neçə aspektdən yanaşdı: “Ermənistana 10 milyon avroluq hərbi yardımın göstərilməsi, əlbəttə, Avropa İttifaqının Cənubi Qafqazdakı proseslərə birtərəfli yanaşmasını ortaya qoyur. Yəni Ermənistanın qarşı tərəfi Azərbaycandır. Əgər Avroittifaq Ermənistana dəstək verirsə, Azərbaycana da analoji dəstəyi verməlidilər. Yox, əgər Azərbaycan tərəfinə etmirlərsə, o zaman ermənilərə də bunu etməməlidilər. Deməyim odur ki, məlum qərar doğru və obyektiv yanaşma deyil. Əslində ikili standartdır və xristian təəssübkeşliyidir. Məsələnin kökündə əslində bu dayanır. Macarıstanın mövqeyinə gəldikdə isə, mən rəsmi Budapeştin mövqeyini alqışlayıram. Macarıstan doğru edir və məsələyə daha ədalətli, obyektiv yanaşır. O baxımdan biz də Macarıstana öz təşəkkürümüzü bildirməliyik. Ən başlıcası da, çalışmalıyıq Macarıstan bu qərarında sona qədər israrlı olsun. Nəzərə almaq lazımdır ki, Macarıstan Avropa İttifaqında böyük ölkə deyil. Həm ərazisinə, həm əhalinin sayına, həm də iqtisadi imkanlarına görə bir sıra Avropa ölkələrindən kiçikdir. Çünki Macarıstan Aİ-nin üzvü olan 27 ölkədən biridir. Çox güman ki, buna görə Budapeştə Brüsseldən ciddi təzyiqlər olacaq. Zatən Macarıstanın Baş naziri Viktor Orban müstəqil siyasət yeritdiyi üçün Fransa, Almaniya, Belçikanın timsalında o qədər də sevilmir. Çünki bu dövlətlər istəyir ki, qurumda hər zaman hegemon olsunlar. Bu dövlətlər Orbanın timsalında müstəqil siyasət yeridən, ədaləti müdafiə edən dövlət başçısı istəmirlər. Brüsselin məqsədi odur ki, bütün üzv dövlətlər verilən istənilən qərarı icra etsinlər”.
Vidadi ORDAHALLI
