“Ermənistan hazırda elə bir vəziyyətə düşüb ki, çıxış yolu axtarır, ola bilsin, bu ideya da Ermənistandakı bəzi qüvvələr üçün çıxış yoludur”
Gümrü şəhərinə yeni mer seçilən Vardan Qukasyan Ermənistanın Rusiyaya tabe olan dövlət olması mövqeyindən çıxış edir. Ermənistan KİV-in yaydığı xəbərə görə, bu barədə o, seçildikdən sonra meriyada keçirilən brifinq zamanı deyib. “Bəli, mən Belarus nümunəsi kimi, İttifaq dövlətinin tərəfdarıyam”, - deyə Vardan Qukasyan bildirib.
O bəyan edib ki, tamamilə ermənipərəst siyasətçidir, ölkənin və xalqının tarixini də yaxşı bilir.
Mer əlavə edib ki, Ermənistan dövlətinin sükanı arxasında "cəsarətli liderləri, Rusiya Federasiyası ilə səmərəli danışıqlar aparmağa qadir olan insanları" görmək istəyir.
V.Qukasyan hesab edir ki Ermənistan daha çox Rusiya ilə müttəfiqliyi sayəsində müstəqil dövlət kimi yaşayıb. O, bu baxımdan Belarusdan nümunə götürərək, Ermənistanın Rusiya ilə birlik dövlətinin yaradılmasının tərəfdarıdır. “...Əgər ruslar olmasaydı, bizim indiki 29,8 min kvadrat kilometr ərazimiz olmazdı” - deyə mer bildirib.
“Bu ideya gələcəkdə gerçəkləşərsə, bu, Ermənistanın formal müstəqilliyinin də itirilməsi demək olacaq”
Beynəlxalq Münasibətlərin Təhlili Mərkəzinin eksperti, siyasi elmlər üzrə fəlsəfə doktoru Mətin Məmmədli "Bakı-Xəbər"ə şərhində bildirdi ki, Ermənistanda Rusiya ilə daha yaxın münasibətlər qurmaq, yaxud Rusiya ilə ittifaq dövlətinə daxil olmaq ideyaları yeni deyil. “Zaman-zaman Ermənistan cəmiyyətində bu fikir, bu ideya ayrı-ayrı siyasətçilər, siyasi qüvvələr, ictimai xadimlər tərəfindən səsləndirilib. Biz məsələyə bir qədər geniş yanaşsaq, Paşinyan hakimiyyətinə qədər Ermənistanda hakimiyyətdə olan qüvvələr məhz xarici siyasətdə birtərəfli olaraq Rusiya ilə müttəfiqlik siyasəti həyata keçiriblər. Daha dəqiq desək, Ermənistan hakimiyyətləri elə bir siyasət həyata keçirib ki, bu ölkə Rusiyanın Cənubi Qafqazda bir forpostuna çevrilmişdi. Ancaq məlum məsələdir ki, son illər Nikol Paşinyan hökuməti fərqli siyasət həyata keçirir. Bu başqa bir mövzudur.
İndi Gümrü meri belə bir fikir və ideya ilə çıxış edir. Onun da dəstəklədiyi bu fikri Ermənistan siyasətində digər qüvvələr də, xüsusən də revanşist və Qarabağ klanına aid olanlar da dəstəkləyir. Ancaq Gümrü merinin bu fikrinin Ermənistan cəmiyyətində böyük dəstək qazanacağına inanmıram”.
O hesab edir ki, İkinci Qarabağ müharibəsindən sonra erməni ictimai rəyində antirusiya meylləri xeyli güclənib. “Bu antirusiya meyllərinin güclənməsi fonunda, qeyd etdiyim kimi, bu fikrin geniş dəstək qazanacağını gözləmirəm. Ümumiyyətlə isə, Ermənistan hazırda elə bir vəziyyətə düşüb ki, çıxış yolu axtarır, ola bilsin, bu ideya da Ermənistandakı bəzi qüvvələr üçün çıxış yoludur”.
M.Məmmədli bildirdi ki, Ermənistan müstəqil yox, formal bir dövlətdir: “Bu ideya gələcəkdə gerçəkləşərsə, bu, Ermənistanın formal müstəqilliyinin də itirilməsi demək olacaq” - deyə M.Məmmədli qeyd etdi.
İradə SARIYEVA
