Azərbaycan milli ənənələrə sadiq qalmaqla yanaşı, dünyanın müsbət elementlərini dəyərləndirən bir ölkədir. Cənubi Qafqazda sülhün, əminamanlığın, dostluğun tərəfdarı olan Azərbaycan dövləti bunun üçün bütün lazımı addımları atır. Azərbaycan ictimaiyyəti də dövlətin bu yöndə siyasətini dəstəkləyir.
Məsələ burasındadır ki, Qərbi Avropa dövlətləri və Avropa təsisatları bölgəmizdə dincliyin, sülhün, əminamanlığın olmaması üçün əlindən gələni edir, Cənubi Qafqazda öz çirkin niyyətlərini həyata keçirməyə cəhd göstərir. Təbii ki, Azərbaycan dövləti və Azərbaycan ictimaiyyəti Avropa qurumlarının sərgilədiyi siyasətə qarşı mövqe tutur.
Aprelin 9-da ADA Universitetində təşkil olunan "Yeni dünya nizamına doğru" mövzusunda beynəlxalq forumda çıxış edən Prezident İlham Əliyev Avropa təsisatlarının Cənubi Qafqazda həyata keçirmək istədiyi çirkin planları ifşa edib.
Prezident Əliyev bu barədə deyib: “...Azərbaycan olaraq biz Avropa təsisatları ilə yaxşı əlaqələrə malik olmaq istəyirik, xüsusilə də Avropa Komissiyası ilə. Ancaq bizim maraqlarımızın qurban verilməsi hesabına yox. Onların davamlı olaraq bizim daxili işlərimizə qarışması, cəmiyyətimizin müxtəlif seqmentlərinin maliyyələşdirilməsi, gənclərimizin beyinlərinin yuyulması, regionumuzda yaşayan xalqların zəhərlənməsi – bütün bunlar bizə lazım deyil...”
Prezident açıq bəyan etdi ki, Azərbaycan Avropa ilə yaxşı münasibətlərdə, əməkdaşlıq içində olmaq istəyir, ancaq Avropa bunu istəmir, Avropa ölkəmizdə müəyyən zümrənin gizli şəkildə maliyyələşdirir, gənclərin beynini yuyur, Azərbaycanda əhalinin arasında təfriqə salır və sair. Prezident bildirdi ki, bizə Avropa ilə belə əməkdaşlıq lazım deyil, biz Cənubi Qafqazı başqa cür görmək istəyirik. Prezidentin bu bəyanatı ictimaiyyət tərəfindən tamamilə dəstəkləndi.
Avropa təsisatlarının baş tutmayan çirkli oyunları...
Bəli, bu gün Avropa Birliyinin hazırda Azərbaycanla münasibətdə apardığı siyasət Azərbaycanın həm dövlət, həm də ictimai mənafelərinə eyni dərəcədə toxunur.
Prezidentin bu sözlərindən də görsənir ki, cəmiyyəti parçalamaq istəyirlər, gənclərin beynini yuyurlar, milli mənəvi dəyərlərimizə hücum edirlər və sair, biz isə buna qarşı barışmaz mövqe tutmalıyıq.
Ekspertlər bildirir ki, Qərb təsisatlarının Azərbaycanda pozuculuq niyyətlərinin qarşısı alınır. Onların planları zamanında ifşa olunur. Gizlin deyil ki, pozucu, təxribatçı mərkəzlər bir sıra hallarda o təxribatların təsiri altına bizim gənclərimizi də sala bilirlər, ya vəlvələdən, ya zəlzələdən bəzi gənclərimiz onların təbliğatının təsirinə düşürlər. Əlbəttə, gənclərin ideoloji təxribat, ideoloji təbliğat, pozuculuq mərkəzlərinin fəaliyyətlərinin təsiri altına düşməsi, zorakı aksiyalara meylləndirilməsi kimi hallar da baş verir ki, bununla da nə Azərbaycan dövləti, nə də Azərbaycan ictimaiyyəti razılaşır. Gənclərimizin beyinlərini yumaq istəyən Qərb təşkilatlarının əsas məqsədi gənc nəslin əli ilə nələrəsə nail olmaqdır, amma onların cəhdləri uğursuz alınır. Çünki Azərbaycan ictimaiyyəti onların əlində alət olmaq istəyən qüvvələrə qarşı dövlətlə birgə mübarizə aparırlar.
Düzdür, bəzən ictimaiyyətin ürəyindən olmayan, onun maraqlarını təmin etməyən kiçik hadisələr baş verir. Amma bütün hallarda ictimaiyyətimiz ideoloji təxribat mərkəzlərinə qarşı barışmaz mövqe tuturlar.
Prezident də vurğuladı ki, Avropa təsisatları cəmiyyətimizin müxtəlif seqmentlərinin maliyyələşdiririr. Avropa təsisatlarının maliyyəsi ilə öz dövlətinə qarşı çıxanları, daxildə təxribatlar törətməyə cəhd edənləri təbii ki, hər kəs tanıyır və cəmiyyət onların müəyyən ödənişlər müqabilində xalqımıza qarşı xəyanətlərini də hiddətlə qarşılayır. Avropa istəyir ki, pulla ələ aldığı, müxtəlif şirnikləndirici təkliflərlə beynini yuduğu gənclərin hesabına daxilimizdə pozuculuqla, parçalanma ilə məşğul olsun, amma o bu hədəflərinə heç zaman çatmır, çata da bilməz. Çünki Azərbaycan xalqı öz dövlətinə, milli-mənəvi dəyərlərinə, ailə institutuna, böyüyünə, kiçiyinə sayğı duyan, sahib çıxan bir xalqdır. Bu xalqın dövlətimizin maraqları ilə paralellik təşkil edən, uzlaşan düşüncəsini, maraqlarını hansısa Avropa təsisatı pulla ala bilməz. Bunu Avropada oturanlar da çox yaxşı bilir. Onlar sadəcə zəif düşüncəli, ideoloji cəhətdən zəif, dövlət, xalq istəyi olmayan bir qrup ağılsız pulpərəstləri, mənsəbpərəstləri “ovlaya” bilirlər ki, o da onların maraqlarının bir faiz də olsun təmin olunduğu anlamına gəlmir.
Azərbaycan dövləti və ictimaiyyəti Avropanın “beyinyuma siyasətinə” qarşı...
Sosiologiya üzrə fəlsəfə doktoru, sosioloq Üzeyir Şəfiyev "Bakı-Xəbər"ə bildirdi ki, Azərbaycan xarici mərkəzlərin gənclərimizə yönəlik cəhdlərinin fərqindədir: “Çünki biz bilirik, Azərbaycan elə geosiyasi bir mövqedə yerləşir ki, belə ölkələrdə həmişə qlobal güc mərkəzlərinin marağı var. Bu mənada fərqli sosial üsullarla, o cümlədən də, daha çox gənclər vasitəsilə bölgəyə, ölkəyə təsir göstərmək istəyirlər. Biz bu imkanı, fürsəti həmin güc mərkəzlərinə tanımamalıyıq. Dövlətin, hökumətin gənclər siyasəti ilə bağlı aydın bir yol xəritəsi var. Gənclər haqqında qanun var, ölkəmizdə gənclər strategiyası fəaliyyət göstərir".
Ekspertin də fikrindən tam aydın olur ki, Avropa təsisatları Azərbaycan gənclərindən əl çəkmək istəmir, amma dövlət bunu bilir və bu halın qarşısını alamaq üçün addımlar atır.
Azərbaycanda Avropanın təxribatlarının iflasa uğradığını açıq görürük. Çünki Avropanın ölkəmizdə “beyinyuma siyasətinə” qarşı cəmiyyət və dövlət eyni mövqedən çıxış edir, birgə addımlar atırlar. Azərbaycanda bütün məsələlərdə dövlətin və ictimaiyyətin maraqları bir-biri ilə uzlaşır, ictimaiyyət hər zaman dövlətin maraqlarının müdafiəsi keşiyində dayanır. Odur ki, Qərb təsisatlarının, Avropa qurumlarının “beyinyuma” siyasəti iflasa məhkumdur.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
