Şakir Ağayev: “Bu, Azərbaycana qarşı məqsədli şəkildə atılan növbəti şər-böhtandır”
Azərbaycan dövlətinin azad ərazilərimizdə genişmiqyaslı tikinti-quruculuq, yenidənqurma, abadlıq işləri aparmasına Ermənistan tərəf uyğun olmayan münasibət sərgiləyir, bu böyük prosesi başqa cür qələmə verməyə çalışır.
Ermənistanın Azərbaycana qarşı ərazi iddiası bu ölkənin mətbuatında açıq şəkildə ifadə olunur. Unudurlar ki, Azərbaycan ərazisini - Qarabağı işğal edən, dağıdan, mədəni abidələrə divan tutan, daşı daş üstündə qoymayan, qanunsuz məskunlaşma, qanunsuz tikinti aparan Ermənistan olub, Azərbaycan öz ərazisini işğaldan azad edib və orda tikinti-quruculuq, bərpa işləri aparır.
Ermənistan dağlıq ərazilərinin Mədəni İrs üzrə Ombudsmanı Feysbuk hesabında reallıqdan uzaq iddialar səsləndirərək yazıb ki, Azərbaycan bu tikinti bərpa işlərini həyata keçirməklə, guya Qarabağdan “erməni maddi-mədəni irsinin izlərini silir”. Guya orda erməni mədəniyyətinin, tarixinin izi varmış, Azərbaycan da onu “silir”, guya kəndlər dağıntılara məruz qalır. Burda qəribə səslənən ifadələrdən biri Azərbaycanı “işğalçı” kimi qələmə vermək cəhdidir. Dünya işğalçının Ermənistan olduğunu və Azərbaycanın işğalda olan torpaqlarını azad etdiyini çox yaxşı bilir.
Bunlar yenə də hansısa “Artsaqdan”, hansısa “Martunidən” danışırlar. Guya ermənilər Peyk görüntüləri ilə “dağıntılar” haqda məlumat alıblar (?) və onların qanunsuz olaraq “Sarqşaşen” adı verdiyi Ağdərə rayonunun Çağadüz kəndinin “tamamilə dağıldığını” iddia edirlər.
Bu adam iddia edib ki, Şuşanın Daşaltı, Hadrutun Susanlıq, Dərəkənd və sair kəndlərindən guya ermənilərin mədəni irsinin “izlərini” silirlər. Bu qədər saxta, əsassız iddialar irəli sürən erməni ombudsman gerçəyi ifadə etmək əvəzinə yalan sözlər işlədib.
Məlumdur ki, nə Şuşada, nə Hadrutda, nə də digər ərzilərimizdə erməni irsi olmayıb və Azərbaycan da ermənilərə qarşı hər hansı fiziki, mənəvi addım atmayıb. Onlar Qarabağı könüllü tərk edib və onları Azərbaycan dövləti qovmayıb. Ermənilərin “mədəni irs” dediyi isə, məlumdur ki, alban xristianlıq dövrü abidələridir, bir də onların ərazilərimizi işğalda saxladıqları müddətdə qanunsuz olaraq tikib quraşdırdıqlarıdır. Azərbaycan dövləti öz ərazisində tikinti-quruculuq işləri aparırsa, bu, Ermənistanı və erməniləri niyə narahat edir?
“Azərbaycanın öz ərazilərində həyata keçirdiyi tikinti-quruculuq, bərpa işlərinə bu sayaq münasibət, təbii ki, yolverilməzdir və qəbuledilməzdir”
"Novoye vremya" qəzetinin baş redaktoru Şakir Ağayev “Bakı-Xəbər”ə bildirdi ki, erməni mətbuatının yaydığı bu kimi dezinformasiyaları oxuyanda bu qədər yalana təəccüblənməyə bilmir: “Birinci, onların qeyd etdiyi adda nə kənd, nə rayon var. O rayonun adı Ağdərədir. İkincisi, ermənilərdən fəqrli olaraq, Azərbaycan həmişə quruculuq işləri ilə məşğul olub. Ermənilər 30 il ərzində evləri, sosial obyektləri, binaları, tarixi abidələri, meşələri, təbii sərvətləri, bütövlükdə bütün infrastrukturu dağıdıb məhv etmişdi, Azərbaycan isə onların bərpasını həyata keçirir. Azərbaycan dövləti, Azərbaycan xalqı quruculuğa sadiq olduğu üçün onların bərpası ilə məşğul olur. Ermənilər tərəfindən vandalcasına dağıdılan tarixi kəndlərini, şəhərlərini, abidələrini Azərbaycan yenidən bərpa edir, onlara həyat verir, özümüzə məxsus olanı özümüzə qaytarır”.
Ş.Ağayev qeyd etdi ki, Azərbaycanda nə “Artsaq”, nə “Martuni”, nə də onların qondarma adlar altında təqdim etdiyi kəndlər olub, Azərbaycanın Qarabağ bölgəsi var, Xocavənd rayonu var, o rayonun azərbaycanlılara məxsus kəndləri var. “Təbii ki, bu, Azərbaycana qarşı məqsədli şəkildə atılan növbəti şər-böhtandır. Məqsəd Azərbaycanı beynəlxalq aləmdə “ittiham” etməkdən ibarətdir ki, Azərbaycan guya ermənilərə məxsus tarixi yerləri, kəndləri, abidələri “dağıdır”. Həm xaricilər, həm bizlər bütün azad ərazilərimizə gedəndə gözlərimizin şahidi oluruq ki, əsl vəhşilik, vandalizm əməlləri ilə ermənilər məşğul olub. Ona görə də burda təəccüblü heç nə yoxdur, şər-böhtanla məşğul olmaq erməni cəmiyyətinə, erməni xalqına məxsus xarakterdir.
Azərbaycanın öz ərazilərində həyata keçirdiyi tikinti-quruculuq, bərpa işlərinə bu sayaq münasibət, təbii ki, yolverilməzdir və qəbuledilməzdir” - deyə Ş.Ağayev qeyd etdi.
İradə SARIYEVA
