Tural İsmayılov: “Bu gün Mərkəzi Asiyanın türk ölkələri Şimali Kipr Türk Cumhuriyyətinə qarşı Aİ-nin məkrli oyunlarında bir vasitəçiyə çevrilir”
Bildiyimiz kimi, Türk Dövlətləri Təşkilatına üzv olan dövlətlərdən üçü - Qazaxıstan, Türkmənistan və Özbəkistan Cənubi Kiprdə səfirliklərini açıblar. Mərkəzi Asiya respublikalarının bu xoşagəlməz addımı şübhəsiz ki, böyük narahatlığa səbəb olub. Bu hadisə Şimali Kipr Türk Respublikasında (ŞKTR) da ciddi narazlıq yaradıb.
ŞKTR-ın xarici işlər naziri Tahsin Ərtoğruloğlu “ANKA” Xəbər Agentliyinə açıqlamasında bəzi türk dövlətlərinin Cənubi Kipr Rum Administrasiyasına səfir təyin etmə qərarı ilə bağlı bunları deyib: "Əvvəla bu, Avropa Birliyinin (AB) ayıbıdır. Onların bilə-bilə belə bir oyuna baş vurmaları hiyləgər bir oyundur. Aİ-nin Türk Dövlətləri Təşkilatına (TOTS) daxil olan ölkələri öz oyunları üçün alət kimi istifadə etməyə çalışması həqiqətən utancvericidir”. Qanunun aliliyini və insan haqlarına hörmət etdiyini iddia edən AB-nin Kipr türklərini bir kənarda qoyaraq, Türk Dövlətləri Təşkilatına daxil olan ölkələri öz oyunları üçün alət etməsi qarşılığında TDT-dəki qardaşların bu addımını emosional olaraq qiymətləndirməklə səhv etməməliyik. Ərtoğruloğlu Mərkəzi Asiya ölkələrinin Türk Kiprə qarşı atdığı addımları Avropa Birliyinin məkrli oyunu kimi qiymətləndirir.
Türk dövlətlərinin Şimali Kiprə qarşı addımları Avropanın oyunlarının nəticəsidir?...
“Mərkəzi Asiyanın türk ölkələrinin Aİ-nin bu təhlükəli gedişlərində və tendensiyalarında rupor kimi iştirak etməsi böyük təəssüfedici məqamı özündə ehtiva edir”
Siyasi ekspert Tural İsmayılov “Bakı-Xəbər”ə şərhində “Əlbəttə ki, Avropa İttifaqı (Aİ) Mərkəzi Asiya üzərindən bir siyasi gediş etməyə çalışır. Təbii ki, son dövrlər Aİ ilə Mərkəzi Asiya ölkələri arasında əməkdaşlığın və dialoqun müxtəlif imkanlarının inkişaf etdirilməsi tendensiyası ilə üz-üzəyik. Lakin bu gün, faktiki olaraq, Mərkəzi Asiyanın türk ölkələrinin Aİ-nin bu təhlükəli gedişlərində və tendensiyalarında rupor kimi iştirak etməsi böyük təəssüfedici məqamı özündə ehtiva edir. Biz bilirik ki, özəlliklə Azərbaycan və Türkiyənin səyləri nəticəsində Şimali Kipr Türk Cumhuriyyəti Türk Dövlətləri Təşkilatında müşahidəçi qismində iştirak edir” - deyə bildirdi.
T.İsmayılovun sözlərinə görə, Şimali Kipr Türk Cumhuriyyətinin daha da inkişaf etdirilməsi və onun uğurlu bir ölkə kimi müxtəlif təşkilatlara inteqrasiya etməsi, nəticədə müstəqilliyinin tanınması uğrunda türk dövlətləri tərəfindən vahid adımlar atılmalı və koordinasiya edilməlidir. “Amma görürük ki, Avropa İttifaqının özəlliklə son dövrlər yunan Kipri məsələsini qabartması və bu məsələdən bir kart kimi istifadə etməsi, təəssüflər olsun ki, ortada olan bir məqamdır. Eyni zamanda həm də ağrıdıcı məqam odur ki, bu gün Mərkəzi Asiyanın türk ölkələri Şimali Kipr Türk Cumhuriyyətinə qarşı Aİ-nin məkrli oyunlarında bir vasitəçiyə çevrilir. Təbii ki, Aİ Şimali Kipr məsələsində Mərkəzi Asiyanın türk dövlətlərindən antimövqelər almağa çalışır. Yəqi ki, müxtəlif investisiyalarla, maliyyə ilə bu şirnikləndirmə siyasətini həyata keçirir. Bunun hər halda türk dünyası üçün ayıb bir addım olduğunu düşünürəm” - deyə T.İsmayılov qeyd etdi.
İradə SARIYEVA
