Şəmsəddin Əliyev: “Deputatların Xanlar Vəliyevin Konstitusiya Məhkəməsinin hakimi təyin edilməsinə yekdilliklə səs verməsi ölkə başçısının təqdimatına hörmətin göstəricisidir”
Sabiq hərbi prokuror Xanlar Vəliyevin Konstitusiya Məhkəməsinə hakim təyin olunacağı barədə xəbər yayılan kimi mətbuatda və sosial şəbəkələrdə müzakirələr getdi, onun ünvanına ciddi tənqidlər, ittihamlar səsləndirildi.
Yəni öncədən Xanlar Vəliyevin Konstitusiya Məhkəməsinə hakim təyin olunacağı barədə xəbərə mediada və sosial şəbəkələrdə əksər hallarda neqativ reaksiyalar göstərildi. Lakin buna baxmayaraq, parlamentdə cəmi bircə deputat onun əleyhinə səs verdi. Əksəriyyət onu hakim seçdi. Deputatlar bunu necə izah edə bilər ki, cəmiyyətdə əksəriyyətin ziddiyyətli reaksiyası ilə rastlaşan bir adam deputatların mütləq əksəriyyətinin birmənalı dəstəyini aldı?
“Görünür, aidiyyəti qurumların tapşırığına əsasən aparılan araşdırmalar zamanı onun barəsində səsləndirilən iddialar öz təsdiqini tapmadı”
Hüquqşünas Şəmsəddin Əliyev “Bakı-Xəbər”ə şərhində bildirdi ki, X.Vəliyevin namizədliyini Milli Məclisə Prezident İlham Əliyev təqdim edib. “Ölkə Prezidentinin Milli Məclisə təqdim etdiyi Xanlar Vəliyev peşəkar hüquqşünasdır. Mən onu Baş prokurorun birinci müavini olduğu dövrdən tanıyıram. O həmin dövrdə istintaqa nəzarəti həyata keçirirdi, bağlı qalmış işlərlə bağlı etirazlarını, təqdimatlarını verirdi. Cinayət işlərinin prosessual baxımdan həyata keçirilməsini Xanlar Vəliyev yerinə yrtirirdi. Amma təbii ki, sosial şəbəklərdə, mediada Xanlar Vəliyevlə bağlı cəmiyyəti çaşdıra biləcək məlumatlar çox yayıldı. Amma bir hüquqşünas kimi məndə belə qənaət hasil olur ki, görünür aidiyyəti qurumların tapşırığına əsasən aparılan araşdırmalar zamanı onun barəsində səsləndirilən iddialar öz təsdiqini tapmadı. Onun Konstitusiya Məhkəməsinə hakim təyin edilməsi dövlət başçısının səlahiyyətinə aid məsələdir. Prezident Milli Məclisə təqdimat verdi və demək olar ki, parlament də yekdillillə bu namizədə səs verdi. Məsələnin digər tərəfi də var. Mən də bir vətəndaş kimi Konstitutsiya Məhkəməsinə ehtiyac duymuram. Düşünürəm ki, Konstitusiya Məhkəməsi bizim ölkənin Konstitusiyasında da ehtiva olunduğu kimi, Nazirlər Kabinetinin, Milli Məclisin qərarlarının, Prezidentin fərman və sərəncamlarının, bütövlükdə digər mərkəzi icra hakimiyyətlərinin qəbul etdiyi normativ hüquqi aktların konstitutsiayaya uyğunluğunu nəzərdən keçirir. Əgər hardasa uyğunluq yoxdursa onun ləğvi ilə bağlı müəyyən mənada müzakirələr, proseslər həyata keçirə bilər. Təbii ki, bu gün Konstitutsiya Məhkəməsinə çox böyük səlahiyyətlər verilir. Bu da bizim ölkənin Konstitusiyasında var. Amma çox istərdim ki, Konstitusiya Məhkəməsinə verilən bu səlahiyyələr məhkəmə hakimiyyətinin yüksək qolu olaraq Ali Məhkəməyə verilsin. Çünki sonuncu instansiya məhkəməsi kassasiya məhkəməsi sayılır”.
Ş.Əliyev deyir ki, faktiki olaraq dövlət büdcəsindən xüsusilə külli miqdarda vəsait ayrılıb Konstitutsiya Məhkəməsinə verilməsi doğru deyil. “Məndə olan məlumata görə, Konstitutsiya Məhkəməsinin hakimi 15 min manat əməkhaqqı alır. Amma görün, seçki hüququna malik olan insanlar nə qədər maaş alırlar? Yəni çox böyük fərq var. Ona görə də hüquqi, demokratik dövlətlərin anlamına uyğun, yəni bir az da dərindən Konstitusiya Məhkəməsinin fəaliyyət istiqamətlərinə baxsaq, bu qurumun hüququ dövlətdə qalmasına lüzum görmürəm. Bu səlahiyyət də alınıb Ali Məhkəməyə verilsin. Ona nəzarət də rahat olar. Ali Məhkəmənin ştat vahidi artırılsın, Konstitusiya Məhkəməsi hakimləri savadlı, səriştəli, həm praktik, həm nəzəri cəhətdən peşəkardırlar. Onların da kənarda qalmasını istəməzdim, Konstitusiya Məhkəməsinin hakimləri Ali Məhkəmədə fəaliyyətlərini davam etdirsinlər. Amma 75 yaşında olanlara aid edilməsin, yaşları 65-70 arasında olsun. Digər hakimlərlə Konstitusiya Məhkəməsinin hakimləri arasında fərq qoyulduğunu görürük.
Ona görə də Xanlar Vəliyevin Konstitusiya Məhkəməsinin hakimi olması heç nəyi dəyişməyəcək. Doğrudan da, cəmiyyət Konstitusiya Məhkəməsində nələrlə məşğul olunduğunun o qədər də fərqində deyil. Hüqüqşünaslardan, vəkillərdən və digər qurumlardan başqa digərləri bu məhkəmənin fəaliyyət istiqamətlərinə bələd deyillər.
Hesab edirəm ki, deputatların Xanlar Vəliyevin Konstitusiya Məhkəməsinin hakimi təyin edilməsinə yekdilliklə səs verməsi ölkə başçısının təqdimatına hörmətin göstəricisidir”-deyə Ş.Əliyev qeyd etdi.
Əli TURABOV
