ABŞ-ın Ukrayna və Rusiya üzrə xüsusi nümayəndəsi, istefada olan general Keyt Kelloq Böyük Britaniyanın “The Times” qəzetinə müsahibəsində bölünmüş Ukrayna ilə bağlı dediyi sözlərlə böyük qalmaqala səbəb olub.
Kelloq müharibədən sonra sülh sazişi çərçivəsində Ukraynanın “Berlin modeli” üzrə bölünə biləcəyini deyib.
“The Times”da “Ukrayna müharibədən sonrakı Berlin kimi parçalana bilər” başlığı ilə yayımlanan xəbərdə Kelloqun İkinci Dünya Müharibəsindən sonra Almaniyanın paytaxtı Berlində olduğu kimi müharibə bitdikdən sonra Ukraynanı “nəzarət zonalarına” bölməyi təklif etdiyi bildirilir.
"Bunu İkinci Dünya Müharibəsindən sonra Berlində baş verənlərlə müqayisə edə bilərsiniz. Orada rus, fransız, ingilis və bir də ABŞ zonası var idi", - deyə o bildirib.
Kelloq Dnepr çayını təbii sərhəd kimi qəbul edəcək bir həll yolu təklif edib. O, Rusiyanın çayın şərqində, Qərb ölkələrinin isə onun qərbində yerləşə biləcəyini deyib.
Kelloq, Avropa və Rusiya qoşunları arasında isə Ukrayna qüvvələrinin yerləşdirilə biləcəyini və mövcud nəzarət xətləri boyunca hərbsizləşdirilmiş zonanın yaradıla biləcəyini bildirib. Bu kontekstdə 30 kilometrlik bufer zona ilə dəstəklənən atəşkəs xətti təklif edən Kelloq deyib ki, Fransa və İngiltərə ABŞ-ın dəstəyi olmadan hərəkətə keçməyə hazır olmalıdır.
Kelloqun açıqlamaları bir ABŞ rəsmisinin ilk dəfə Dnepr xətti boyunca demarkasiya ilə bağlı rəsmi təklif irəli sürməsi kimi diqqət çəkir.
Açıqlamaları gündəmə gələndən sonra Kelloq sosial media hesabında qəzetdə dərc olunan məqalədə sözlərinin təhrif edildiyini iddia edib. O, deyib ki, Ukraynanın bölünməsindən deyil, ölkənin suverenliyini dəstəkləmək üçün atəşkəsdən sonra yaradılacaq qüvvədən danışıb. "Müttəfiq qüvvələrin (ABŞ qoşunları olmadan) məsuliyyət zonaları və ya bölgələri haqqında danışıram. Ukraynanın bölünməsindən danışmıram", - o deyib.
Kelloq etiraf edib ki, ABŞ rəsmiləri razılaşmanı təmin etmək üçün gərəkənləri lazımi səviyyədə qiymətləndirməyiblər: "Bu sadə bəli və ya yox deyil".
“İnsanlar prosesi lazım olduğu kimi dərk etmədilər” deyən Kelloq qeyd edib ki, ABŞ-ın ölkənin kritik minerallarına çıxışı olub-olmayacağı ilə bağlı yekun qərarı vermək Ukrayna parlamenti, Radaya aiddir.
O, Tramp administrasiyasının da Ukraynada hansı mineralların mövcud olduğunu və ya onların dəyərini heç kimin bilmədiyini qəbul etdiyini bildirib və qeyd edib ki, burada geoloji tədqiqatları sonuncu dəfə Sovetlər aparıb.
Kelloq deyib ki, o və ukraynalılar danışıqları davam etdirmək üçün Rusiyanın yekun şərtlərini təqdim etməsini gözləyirlər.
Rusiya daha əvvəl Ukraynanın dörd şərq regionundan - Donetsk, Luqansk, Xerson və Zaporojyedən çıxmasını və NATO-ya üzvlük iddiasından əl çəkməsini istədiyini bildirib. Zelenski isə ərazi güzəşti tələbini qəti rədd edir.
TAHİR
