Ukraynanın super milyarderi - tatar balasının ətrafında müəmmalar...

Tarix: 29.04.2014 / 04:21
Bölmə: Siyasət

O, Ukraynanın ən varlı adamıdır. "Bloomberg"in versiyasına görə, varidatının həcmi 22 milyard dollar təşkil edir. "Bloomberg" onun adını dünya milyaderlərinin siyahısında 26-cı, "Forbes" isə 47-ci yerdə göstərir. Dövlət idarəetməsində iştirak etməsə də, onun haqqında Ukraynanın gizli sahibi deyirdilər.
System Capital Management şirkətinin sahibi olan bu şəxs xarabalıqlardan qızıl saraylara yüksəlib.
Renat Əhmədov 1966-cı ildə Donetskdə anadan olub. Tatarıstan respublikasından olan valideynləri - atası Leonid Əhmədov şaxtada fəhlə, anası Nyakiya Nəsrəddin qızı Əhmədova isə dükanda satıcı işləyirdi. Yazılanlara inansaq, 2 uşaqlı ailə çox kasıb şərtlər çərçivəsində həyat sürüb. Belə ki, heç bir kommunal təhcizatı olmayan köhnə, balaca mənzildə yaşayıb.
Renata gəlincə, kiçik yaşlarında təhsilə marağı olmasa da, idmana meyl edirdi. Xüsusilə boks və futbola. Yeri gəlmişkən, idmana olan həvəsini onun milyardlara gedən yolda giriş qapısı hesab etmək olar.
Renata boks sahəsində parlaq karyera vəd edilsə də, ailənin maddi vəziyyəti məktəbi bitirdikdən sonra onu işləmək məcburiyyətində qoyur. Düzdür, gələcəyin milyarderinin harda və nə işlədiyi hələ də qaranlıq olaraq qalır. Təkcə o bəllidir ki, R.Əhmədov özünün əmək fəaliyyətinə Əhət Hafiz oğlu Braqin - Aleksandr Braqinlə (kriminal avtoritet)birgə başlayıb. Aleksandr Braqin R.Əhmədovun qonşusu olmaqdan savayı, onları həm də boksa olan maraqları birləşdirirdi. Göründüyü kimi, R.Əhmədov professional idmançıya çevrilməsə də, həmdəm qazanır. A.Braqinin bioqrafiyasında qeyd edilir ki, o, rinqdə ilk addımlarını Renat Əhmədov və Ukraynanın hazırkı prezidenti Viktor Yanukoviçlə birgə atıb. "Alik Qrek" ləqəbi ilə məşhurlaşan A.Braqin gəncliyində məlum "Oktyabrski" şaxtası yaxınlığındakı bazarda qəssab işləyib. Yenidənqurma başlayanda ərazidəki kiçik biznes tatar diasporunun əlində cəmləşdiyindən, R.Əhmədovla birgə dükanlarda işləməyə başlayır. Bəzi mənbələrə əsasən, R.Əhmədovla A.Braqinin kapitalının mənbəyi məhz Donetskidəki 41 saylı dükandır. Həmin dükanda R.Əhmədov ekspeditor, A.Braqin direktoru işləyirmiş. Və dükan Donetskin topdan və pərakəndə bazası sayılan "Ukrtekstiltorg"a daxil imiş. Şamil İvankov adlı şəxs tərəfindən idarə edilən baza defisit malların xəzinəsi sayılırmiş.
Renatın keçdiyi həyat yolundan çox yazmaq olar, ancaq bir fakt var ki, o da R.Əhmədovun Ukraynanın ən varlı iş adamı olmasıdır. 2000-ci ildə yaratdığı, 2009-cu ildə isə tam hüquqi əsaslı sahibi olduğu 90-dan çox şirkəti özündə birləşdirən System Capital Management dağ-mədən, enerji, telekommunikasiya sənayesi, bank, sığorta, media, pərakəndə ticarət, daşınmaz əmlak və iqtisadiyyatın digər sahələrini əhatə edir. Hələ 2006-cı ildə ukraynalı ekspertlər onun sərvətini 11,8 milyard dollar, 2007-ci ildə isə 15 milyard dollar səviyyəsində qiymətləndiriblər. 2008-c ilin iyununda isə "Korrespondent"in analitikləri R.Əhmədovun varidatının 31 milyard dollar olduğunu irəli sürməklə onu Avropa və MDB-də üzrə ən varlı iş adamı kimi təqdim edirdilər. R.Əhmədovun biznesinin parlamasında keçmiş Ukrayna hakimiyyəti ilə "köhnə" əlaqələrinin rolu böyük olub.
İş adamı aktiv siyasətə 2004-cü ildə "Regionlar Partiyası" nın prezidentliyə namizədi Viktor Yanukoviçi (ki, işgüzar və yoldaşlıq əlaqələri çoxdan artıq pozulmuşdu) fəal müdafiə etməklə qədəm qoyub. 2006-cı ildə "Regionlar Partiyası"nın namizədi kimi seçkilərə qatılıb. 2012-ci ildə isə yenidən seçkidə iştirakdan imtina edərək xeyriyyə fəlaiyyəti ilə məşğul olacağını bildirib.
Araşdırmamız zamanı o da məlum oldu ki, Renat Əhmədovun Tatarıstanın hazırkı prezidenti ilə də sıx dostluq münasibətləri mövcuddur. Bu baxımdan da Renat Əhmədovu Rusiyanın adamı sayanlar yanılmaya bilər. Ən maraqlısı isə budur ki, Renat Əhmədov Ukraynada baş verən son hadisələrdə də vətəndaşı olduğu Ukrayna dövlətinə deyil, Rusiyaya dəstək verdi. Bir sıra təsdiq olunmuş məlumatlar onu deməyə əsas verir ki, Krımın Rusiya tərəfindən ilhaqına xərclənən vəsaitin böyük əksəriyyəti Renat tərəfindən qarşılanıb.
Ən maraqlısı isə mövcud Ukrayna hakimiyyətinə bu qədər zərbə vuran bir adam barəsində rəsmi Kiyevin susqunluq nümayiş etdirməsidir. Renatla bağlı Rusiyanın mövqeyi anlaşılandır, bəs rəsmi Kiyev niyə onun barəsində heç bir tədbir görmür, hətta informasiya belə verməkdə maraqlı deyil?
Azərbaycan diasporunun tanınmış nümayəndələrindən olan Mirkazım Seyidov qəzetimizə açıqlamasında bildirdi ki, Renat Əhmədov barəsində müfəssəl məlumatı var: "Yanukoviçin ən yaxın adamı olan bu şəxs Ukraynanın söz sahibi idi. Renatın adı daha çox qara iqtisadiyyatın idarə olunmasında hallanıb.
Ukraynada baş verən hadisələr bir vektor üzrə cərəyan etmədiyi səbəbindən belə anomaliyaların yaşanmasına təbii yanaşmaq lazımdır. Yanukovuç sırf rusiyameylli siyasət yürütmürdü. O, Qərbə də meylli idi. Bunun nəticəsidir ki, iki böyük gücün arasında qalıb qaçmağa məcbur oldu. Renat Əhmədov isə Rusiya ilə sıx əlaqədədir.
Onun biznes əlaqələrinin böyük hissəsi həmin ölkə ilə bağlıdır. Təbii ki, bu, Ukraynanın indiki hakimiyyəti üçün arzuolunan şəxs deyil. Ancaq bu məsələdə şəxsi münasibətlər də mühüm rol oynayır. Bir detala fikir verin. Ukraynada Yanukoviçi yıxan qüvvələrin başında tanınmış boksçu Vitali Kliçko dururdu. Renat Əhmədov da köhnə boksçudur və Kliçko ilə çox yaxın münasibətlərə malikdir. Bəli, məhz Renatı da bu gün Ukraynanın yeni hakimiyyətinin qəzəbindən qoruyan Kliçkodur".