Gürcüstanda noyabrın 28-dən etibarən hakimiyyətin ölkənin 2028-ci ilə qədər Avropa İttifaqına daxil olması ilə bağlı danışıqların başlanmasını gündəmdən çıxarmaq qərarına etiraz edənlər tərəfindən etiraz aksiyaları keçirilir. Hakimiyyət hər gün bunun Avropaya inteqrasiyanın dayandırılması demək olmadığını izah etsə də, etiraz dalğası dayanmır.
Səbəb də odur ki, Gürcüstanda etirazların təşkilində Qərbin, xüsusən də Fransanın dağıdıcı siyasəti davam etdirilir.
Qeyd edək ki, Gürcüstan Azərbaycan üçün mühüm tərəfdaşdır. O səbəbdən ölkədə sabitliyin hökm sürməsi Azərbaycanın maraq dairəsində yer alır. Lakin Qərb ölkələri, əsas etibarı ilə Fransa Gürcüstanda vəziyyəti qarışdırmaq üçün hər cür aqressiya sərgiləyirlər. Azərbaycan prezidenti İlham Əliyev "Rossiya Seqodnya" Beynəlxalq İnformasiya Agentliyinin baş direktoru Dmitri Kiselyova müsahibəsində açıq mətnlə vurğulayıb ki, Gürcüstanda baş verən olaylarda yenə də Makronun qulaqları görünür: "Adam öz ölkəsində otura bilmir. Mütləq Gürcüstana da əl uzatmalıdır. Biz Parisdə Məryəm Ana kilsəsindəki mərasimdə nəyin şahidi olduq? Papa Fransisk mərasimdən imtina etdi, o, əlbəttə, Makrona bu Olimpiya rüsvayçılığını bağışlamadı. Düzgün də etdi. O, Korsikaya yollandı. Necə deyərlər, sanki müəyyən bir yerindən tutaraq ağrıtmaq üçün. Beləliklə, Gürcüstan məsələsinə qayıdarkən deməliyəm ki, o, göründüyündən daha genişdir. Zənnimcə, bu səbəbdən nəzərdə tuturam ki, adətən irəliyə sanksiyaları vərdişə çevirmiş ölkələri verirlər. Əgər belə demək mümkündürsə, bu, Qafqaz uğrunda döyüşdür. Ermənistanın haraya getdiyi aydındır. O, mahiyyətcə KTMT-dən de-fakto çıxıb. Bizim yoxlanılmış məlumatlarımıza görə, onların de-yure çıxmamasının səbəbi hələ Dövlət Departamentindən təlimat almamalarıdır. Bunu alan kimi, onlar çıxacaqlar. Azərbaycan müstəqil aktordur və kifayət qədər ixtisaslaşıb, özünü müdafiə edə bilir. Ona görə də Gürcüstan Qafqaz uğrunda döyüşlərdə mühüm amildir. O, necə olacaq? O, bizim ənənəvi Qafqaz dəyərlərinə əsaslanacaq".
Hazırda Qərbin təhriki ilə Gürcüstanın müxtəlif şəhərlərində davamlı olaraq mitinqlər keçirilir, lakin paytaxt Tiflisdə onlar sistemli və genişmiqyaslı xarakter alıb. İlk günlərdə parlamentin yaxınlığında kütləvi iğtişaşlar zamanı isə hətta onlarla təhlükəsizlik qüvvələri və etirazçılar, eləcə də jurnalistlər yaralandı.
Müxalifət, prezident və onları dəstəkləyən Qərb siyasətçiləri ölkədə repressiyaların başladığını bəyan edir, hakimiyyət isə buna cavab olaraq agent müxalifətin xarici ağalarının dəstəyi ilə "Maydan" təşkil etmək cəhdindən danışır. Noyabrın 28-dən dekabrın 8-dək cinayət törətdiklərinə görə 30-dan çox şəxs məsuliyyətə cəlb edilib, 370-dən çox şəxs inzibati qaydada həbs edilib. Bunların fonunda Qərb Gürcüstanın hazırkı hakimiyyətini demokratiyadan geri çəkilməkdə, anti-Qərb ritorikasında və konspirasiya nəzəriyyələrinin yayılmasında ittiham edir. Avropa İttifaqı və ABŞ bu ilin yazında hökumətə bəzi yardımları donduran və ölkənin Aİ-yə inteqrasiyasını dayandıran Xarici Təsirlərin Şəffaflığı Aktının qəbulundan sonra Gürcüstandan uzaqlaşmağa başlayıb. ABŞ Daxili İşlər Nazirliyinin yüksək vəzifəli nümayəndələri də daxil olmaqla bəzi Gürcüstan vətəndaşlarına qarşı sanksiyalar və viza məhdudiyyətləri tətbiq edib. Avropa İttifaqı Gürcüstana yüksək səviyyəli səfərləri və Brüsseldə Gürcüstan hakimiyyətinin nümayəndələri ilə bütün yüksək səviyyəli görüşləri dayandırıb. NATO-nun son sammitinin yekun bəyannaməsində Gürcüstanın Alyansa üzv olacağı qeyd olunmayıb. Bundan əlavə, oktyabrın ortalarında məlum oldu ki, Böyük Britaniya eyni səbəbdən Gürcüstanla strateji "Wardrop" dialoqunu, yeni kibertəhlükəsizlik proqramını dayandırıb və yüksək səviyyəli müdafiə danışıqlarını ləğv edib. Cari ilin sentyabr ayında Gürcüstanda LGBT təbliğatını qadağan edən "Ailə dəyərlərinin və yetkinlik yaşına çatmayanların müdafiəsi haqqında" qanunun qəbulu Qərbi daha da qıcıqlandırıb. Gərginlik oktyabrın 26-da keçirilən parlament seçkilərindən sonra da davam edib, seçkilərin nəticələri parlamentə daxil olan hər dörd müxalifət qüvvəsi, onları dəstəkləyən QHT-lər və Gürcüstan prezidenti Salome Zurabişvili tərəfindən tanınmır. Amma hakimiyyət bunun hansısa əhəmiyyət kəsb etmədiyini bildirir. Bununla belə Qərb müxalifətin vasitəsilə ölkədə vəziyyəti gərginləşdirmək cəhdlərindən əl çəkmir. Gürcüstan hakimiyyəti dəfələrlə ABŞ və Avropa İttifaqı ilə münasibətləri bərpa etməyə ümid etdiklərini bildirib. Onlar israr edirlər ki, Avropa dəyərlərinə sadiqdirlər və yuxarıda sadalanan qanunlar ölkənin milli maraqları nəzərə alınaraq qəbul edilib. Qeyri-hökumət təşkilatlarını və xaricdən maliyyələşən KİV-ləri xüsusi reyestrdə qeydiyyatdan keçməyə və bəyannamə doldurmağa məcbur edən xarici agentlər haqqında qanunu hakim "Gürcü Arzusu" partiyasının liderləri şəffaflıq prosesinin mühüm hissəsi kimi diqqətə çatdırırlar. "Ailə dəyərlərinin və yetkinlik yaşına çatmayanların müdafiəsi haqqında" qanun isə "Gürcü Arzusu"nun liderlərinin fikrincə, Gürcüstana psevdoliberal ideologiyanın tətbiqi cəhdinə cavabdır. Hakim partiyanın qurucusu Bidzina İvanişvili bildirib ki, LGBT təbliğatı ən yaxşı müasir fəth silahıdır. Seçkilərdən bir ay sonra, noyabrın 28-də hakimiyyət ölkənin Aİ-yə daxil olması ilə bağlı danışıqların başlanmasını 2028-ci ilə qədər gündəmdən çıxaracaqlarını və Aİ-dən bütün büdcə qrantlarından imtina edəcəklərini açıqladı. Hakimiyyət qeyd edib ki, bununla onlar ayrı-ayrı avropalı siyasətçiləri və bürokratları şantaj vasitəsindən məhrum ediblər. Qəbul edilən qərarın ölkənin Avropa İttifaqına inteqrasiyasının dayandırılması demək olmadığı, 2030-cu ildə Aİ-yə üzvlüyə hazırlığın bundan asılı olması səbəbindən səlahiyyətlilərin assosiasiya sazişindən irəli gələn öhdəliklərin yerinə yetirilməsi istiqamətində fəaliyyətini davam etdirəcəyi vurğulanıb. Amma bu həqiqiəti Qərb və onun Gürcüstandakı əlaltıları görməzlikdən gəlir. Bununla belə görünən odu rki, Gürcüstan Qərbin, xüsusən də Fransanın şantajı qarşısında möhkəm dayanıb. Makronun qulaqları bu dəfə, necə deyərlər, Gürcüstanda kəsilir.
Nahid SALAYEV
