Akif Nağı: “Rusiyada heç kim özbaşına istefa verə bilməz, faktiki olaraq o, vəzifəsindən uzaqlaşdırılıb”
Anti-Azərbaycan çıxışları ilə gündəmə gələn və terrorizmə çağırışlara görə Azərbaycan Baş Prokurorluğu tərəfindən beynəlxalq axtarışa verilən Rusiya nəqliyyat nazirinin müşaviri Aleksey Çadayev vəzifəsindən istefa verib. O, bu barədə öz “Telegram” kanalında məlumat paylaşıb.
“Rusiya nəqliyyat nazirinin müşaviri səlahiyyətlərimə xitam vermək qərarına gəldim”, – deyə sabiq məmur qeyd edib.
Bildiyimiz kimi, avqustun 17-də Baş Prokurorluq terrorizmə çağırışlara görə Rusiyanın üç vətəndaşını beynəlxalq axtarışa verib. Onlar “Moskva 24” televiziya kanalının aparıcısı İvan Knyazev, politoloq Semyon Uralov və Rusiya nəqliyyat nazirinin sabiq müşaviri Aleksey Çadayevdir.
Çadayevin istefası Rusiya hakimiyyət dairələrinin planı ola bilərmi? Yoxsa özü könüllü istefa verib?
Azərbaycan onu beynəlxalq axtarışa verib, cinayət işi açıb, Rusiya XİN də reaksiya verdi ki biz vətəndaşlarımızı müdafiə edəcəyik. Bunun ardınca isə Çadayev istefa verib. Bunun səbəbi nədir?
Azad Vətən Partiyasının sədri Akif Nağı baki-xeber.com-a bildirdi ki, Rusiya jurnalistləri, siyasiləri, məmurları tərəfindən ilk dəfə deyil Azərbaycana qarşı belə təxribatlar olur. “Bu kimi məsələlər təsadüfən baş vermir. Orada totalitar bir rejim yaradılıb və birinci şəxsin icazəsi, tapşırığı olmadan sərbəst addım atılmır. Rusiyada mətbuat da tam şəkildə nəzarətdədir. Onların hansısa müstəqil hərəkət etməsi mümkün deyil. Azərbaycana qarşı şər-böhtan kampaniyası aparan həmin YoTube kanalları hakimiyyətin nəzarətindədir, hakimiyyətin siyasətini, mövqeyini təbliğ edən bir qurmdur. Bundan Azərbaycana təzyiq vasitəsi kimi istifadə etmək istəyirlər. Çünki Rusiya Azərbaycandan hələ də əl çəkmək istəmir, ölkəmizə müxtəlif istiqamətlərdən təzyiqlər göstərir. Diaspor rəhbərlərinə qarşı təzyiqlər davam edir, bu yaxınlarda diaspor sədrlərindən biri Bəxtiyar Həsənov Rusiyadan deportasiya olunub. Baxmayaraq ki, münasibətlərin qaydaya düşdüyü bildirilirdi, amma bunun heç bir əlaməti yoxdur. Rəsmi və qeyri-rəsmi şəxslərin iştirakı ilə anti-Azərbaycan təbliğatı davam edir. Azərbaycan da geri çəkilmədi, tam olaraq mövqeyini ortaya qoydu. Hər üç Rusiya vətəndaşı- “Moskva 24” televiziya kanalının aparıcısı İvan Knyazev, politoloq Semyon Uralov və Rusiya nəqliyyat nazirinin sabiq müşaviri Aleksey Çadayevlə beynəlxalq axtarışa verildi, onların cinayət məsuliyyətinə cəlb olunması ilə bağlı məsələ qaldırdı. Baş Prokurorluq tərəfindən həmin o üç şəxsə qarşı cinayət işi açıdı və tədqiqata başlanıldı. Rusiya hələ də özünə gələ bilmir ki, niyə Azərbaycana qarşı bu təzyiqlər cavabsız qalmır. Hələ də onlar Azərbaycanın mövqeyini yoxlayırlar ki, geri çəkilib, yumşalıb, yoxsa yox. Azərbaycan da öz mövqeyindən geri çəkilməyib.
Çadayev həm də rəsmi vəzifə tuturdu, müşavir idi. Çadayevin istefası təsadüfi deyil. Rusiyada heç kim özbaşına istefa verə bilməz, faktiki olaraq o, vəzifəsindən uzaqlaşdırılıb. Rusiya hakimiyyəti onu vəzifədən uzaqlaşdırmaqla göstərmək istəyir ki, Azərbaycanla körpüləri tam yandırmır. Geriyə addım üçün bir zəmin yaradır və ona görə də Çadayevin istefasına nail oldular”.
A.Nağı hesab edir ki, Rusiya hakimiyyətinin Çadayevi istefa adı altında vəzifədən uzaqlaşdırması Azərbaycanın mövqeyini yumşaltmayacaq, Azərbaycan sona qədər öz mövqeyində qalacaq. “Hesab edirəm ki, bu cür mövqe ilə Rusiyanın Azərbaycana qarşı qərəzli siyasi mövqeyini dəyişmək olar”-deyə A.Nağı əlavə etdi.
İradə SARIYEVA
