İran Parlamentinin sədri Məhəmməd Bağır Qalibaf İran və İraqı ABŞ dollarından asılılıqlarını azaltmaq üçün aydın iqtisadi və ticarət yol xəritəsi hazırlamağa və milli valyutalara keçməyə çağırıb.
Bağdaddakı İran səfirliyində İran və İraq biznes nümayəndələrinin görüşündə çıxış edən Qalibaf, hər iki ölkənin özəl sektorunun institusional çətinliklərlə üzləşdiyini bildirib.
Hərbi qarşıdurma haqqında danışan İran parlamentinin spikeri Tehranın müharibə axtardığı barədə ittihamları rədd edib: "Biz heç vaxt müharibə axtarmamışıq. Lakin müsəlmanlar olaraq İslam ümmətinin prinsipinə inanırıq: heç kimin ləyaqətimizi və şərəfimizi tapdalamasına icazə verməyəcəyik. Onları müdafiə etmək üçün var-dövlətimizdən və canımızdan keçməyə hazırıq".
Qalibaf qeyd edib ki, İran və İraq təxminən yarım əsrdir ki, "nə müharibə, nə də sülh", bəzən hətta eyni vaxtda "hərb və sülh" vəziyyətindədir. O, qeyri-sabitliyi xarici güclərin regionun insan, təbii və geosiyasi ehtiyatlarına nəzarət etmək istəyi ilə əlaqələndirib.
Natiq həmçinin Hörmüz boğazının, Fars körfəzinin, Bab əl-Məndəb boğazının və Süveyş kanalının strateji əhəmiyyətinə diqqət çəkib. Onun sözlərinə görə, qlobal dəniz daşımalarının təxminən 75%-i müsəlman ölkələrinin nəzarətində olan ərazilərdən keçir: "Düşmən bizim sərvətlərimizi və xammalımızı talan etməyə gəlib".
Qalibaf İran və İraq arasında ticarətdə dollardan imtinaya çağırıb və Amerika dominantlığı dövrünün başa çatdığını elan edib. O, biznes nümayəndələrinə müraciət edərək "Amerikalılar və israillilər İran və İraqı hərbi yolla məğlub edə bilməyəcəklərini anladılar, ona görə də idrak və iqtisadi müharibəyə keçdilər və indi siz bu sahədəki əsgərlər və komandirlərsiniz" deyib.
Tahir TAĞIYEV
