Azər Həsrət: “Hazırda hakimiyyətdə təmsil olunanlar Turqut Özal ölən dövrdə gənc idilər, onların bu proseslərə qarışması mümkün deyildi”
CNN TÜRK-də yayımlanan "Müdriklik Dairəsi" proqramında mərhum prezident Turqut Özalın məzarının açılması (eksqumasiya) prosesi və irəli sürülən iddialar müzakirə edilib.
Verilişdə müstəqil millət vəkili olan Əhməd Özal atasının məzarı və davam edən araşdırmalarla bağlı şok açıqlamalar verib.
Əhməd Özal atasının məzarının yerləşdiyi ərazinin coğrafi quruluşuna istinad edərək, məzarın içinə yuxarıdan suyun axıdıldığının müəyyən edildiyini bildirib. "Mərhumun dəfn olunduğu yer təpədir, mərhum Menderesin və onun dostları olan nazirlərin məzarlarından 30-40 metr aralıdadır. O vaxt, eksqumasiyadan əvvəl, yoxsa sonra olduğunu xatırlamıram, Terrorla Mübarizə Bölməsindən insanlar bizə gəldilər. Dedilər ki, "Təpə olduğuna görə ora su sıza bilməz, məzara yuxarıdan su axıdılmış olmalıdır"- oğul Özal bildirib. Qeyd edib ki, bunun nə vaxt edildiyi məlum deyil. Məqsəd isə bəllidir - nəşi tez bir zamanda çürütmək... "FETÖ-nün 2012-ci ildə eksqumasiya prosesində aktiv rol oynaması və dosyenin gizlədilməsi ehtimalını nəzərə alaraq hakimiyyət orqanlarından qəbri yenidən açmağı və bu məsələni araşdırmağı istərdinizmi" sualına Əhməd Özal "Əgər nəticə olsa, əlbəttə ki, "hə" deyərdim. O zaman məzar açılanda bunları bilmirdik. Biz də təəccübləndik. 19 ildən sonra açıldı, hamı sümük və saç gözləyirdi, amma bu baş vermədi. Daha əhatəli bir araşdırma aparıldı. Düşünürəm ki, bu hesabat natamamdır. Bəlkə də dövlət arxivlərində hələ açıqlanmayan mətləblər var"- deyə bildirib. Dövlət Audit Şurasının hesabatını aldıqlarını bildirən Əhməd Özal deyib ki, orada yalnız mütəxəssislərin başa düşə biləcəyi bir çox texniki terminlər var, lakin zəhərlənmə olduğu dəqiqdir.
“Zəhər torpağa keçib, zəhəri torpaqda da tapıblar”- oğul Özal deyib.
Turqut Özalın oğlu bununla nə demək istəyir? Demək istəyir ki, onun atasının ölümünü araşdıran şəxslərdən bu gün də Türkiyə hakimiyyətində təmsil olunanlar var? O belə demək istəyir ki, onun atasını FETÖ-çülər öldürüb, yoxsa onun ölümünün araşdırılmasında iştirak edən şəxslər bu gün də Türkiyə hakimiyyətində var və onlar hansısa məlumatları açıqlamalıdırlar?
Siyasi şərhçi Azər Həsrət baki-xeber.com-a “mənə elə gəlir ki, bu açıqlamaya ciddi yanaşmaq doğru olmaz. Çünki bu adam davamlı şəkildə atasının ölümündə kimi gəldi ittiham edir”- deyə bildirdi.
A.Həsrətin sözlərinə görə, Ə.Özəl müxtəlif vaxtlarda atasının ölümündə ayrı-ayrı şəxsləri ittiham edib. “Artıq qardaş Türkiyədə bir lətifəyə çevrilib bu. Kimsə öldürüləndə, öləndə Turqut Özalın oğlunun adından deyirlər ki, filankəsi filankəs öldürdü. Ona görə də buna ciddi yanaşmaq doğru olmazdı. Bu adam yatır qalxır, yeni bir adamı ittiham etməyə başlayır. İndiki hakimiyyətdəkilər Turqut Özalı niyə öldürməlidir ki? Ümumiyyətlə, Turqut Özal hara, Ərdoğan dövrü hara? Turqut Özalın ölümündən 35-40 il keçib, onda Ərdoğan siyasətdə ilk addımlarını atırdı, yeni-yeni başlayırdı. Hazırda hakimiyyətdə təmsil olunanlar Turqut Özal ölən dövrdə gənc idilər, onların bu proseslərə qarışması mümkün deyildi. Sadəcə, bu adam atasının ölümündə kimlərisə günahlandırmaqda öyrəncəlidir”-deyə A.Həsrət qeyd etdi.
Qeyd edək ki, Türkiyənin sabiq prezidenti Turqut Özalın oğlu Əhməd Özal 10 il bundan əvvəl də analoji iddia ilə çıxış edib. O, Fətullah Güləni sabiq prezidentin ölümündə təqsirli bildiyini açıqlayıb.
Belə bir iddia ilə Türkiyənin sabiq prezidenti Turqut Özalın oğlu Əhməd Özal çıxış edib.
Hələ o dövrdə Ə. Özal deyirdi ki, Turqut Özalın məzarı açılarsa hər şey ortaya çıxar.
Sözügedən dövrdə mətbuatda yazılırdı ki, Turqut Özalın məzarı açıldıqdan sonra Ədliyyə Tibb başkanı FETÖ-çu olduğu üçün vəzifəsindən çıxarlaraq həbs olunub.
O dövrün mətbuatında yazılırdı: “Məsələ ilə bağlı Ədliyyə tibb qurmunda şalışan texnik işçilər də təhdid edildiyini deyən Ə.Özal bildirib ki,Turqut Özal xəstə olanda Mühafizə alayından iki doktor və iki ambulans gəldi, ancaq onlar 50 metrdən yaxın gəlmədilər. “Bunlar araşdırılmadı və ya üstü ört-basdər edildi. Orada bir qarışıqlıq oldu. İlk anda “zəhərləndi” dedilər. Ancaq sonra bunun üstündən vaz keçildi. Bu məsələ sonadək çözülmədi. Ona görə də o məsələ ciddi araşdırılmalıdır”-deyə, o vurğulayıb.
T.Özalın F.Gülən tərəfindən zəhərlənməsini əsaslandıran Ə.Özal deyib ki, F. Gülən 1991-ci ildə Sızıntı dərgisindəki bir yazısında Turqut Özal haqqında çox ağır ifadələr işlədib: “Çünki atam onun çox təhlükəli bir adam olması barədə fikir söyləmişdi. Mən 28 fevral 1993-cü ildə baş verən hadisələrin ciddi araşdırılmasının tərəfdarıyam. Ona görə ki, T.Özalın FETÖ tərəfindən zəhərlənməsində şübhələrim var. Bu məsələ bir daha dərindən araşdırılmalıdır”.
Vurğulayaq ki, Türkiyənin 8-ci prezidenti Turgut Özalın ölümündə Fətullahçı Terror Təşkilatının (FETÖ) əli olması ilə bağlı iddialar mövcuddur, lakin bu, rəsmi məhkəmə qərarı ilə sübut olunmayıb. Özal 17 aprel 1993-cü ildə vəfat etmiş, rəsmi olaraq səbəb kimi ürək çatışmazlığı göstərilmişdir
İradə SARIYEVA
