Elşən Manafov: "Azərbaycanın bu layihədə təmsilçiliyi təmin olunmadan həmin layihə rentabelli sayıla bilməz"
Baş nazir Nikol Paşinyan Moskvada keçirilən Avrasiya İqtisadi İttifaqının (Aİİ) Baş Nazirlər Şurasının iclasında etdiyi çıxışda Ermənistanın qondarma "Sülh kəsişməsi" layihəsinə toxunub, bunu Aİİ-in logistik potensialını genişləndirmək potensialına malik təşəbbüs kimi təqdim etməyə çalışıb:
"Aİİ üzv dövlətlərinin ərazilərində malların, xidmətlərin, kapitalın və işçi qüvvəsinin sərbəst hərəkəti inteqrasiyanın əsas prinsipidir. Əməkdaşlıq və inteqrasiyanın səmərəliliyinin qiymətləndirilməsi üçün əsas meyarlardan biri, əlbəttə ki, Ermənistan sədrliyinin prioritet sahələrində təsbit olunmuş qarşılıqlı ticarətə maneələrin müəyyən edilməsi və aradan qaldırılması olaraq qalır".
Ermənistanın Aİİ üzvlərinin heç biri ilə quru sərhədi yoxdur. Üstəlik, sülh sazişi də imzalanmayıb ki, deyəsən Azərbaycan üzərindən bu əlaqələr qurulacaq. O zaman "Sülh kəsişməsi" layihəsi Aİİ-in logistik potensialını necə genişləndirəcək?
"Aİ-yə assosiativ üzvlük namizədliyinin qabardılması Ermənitanın Aİİ ilə münasibətlərə xitam verilməsi zərurətini doğuracaq"
Sözügedən məsələyə aydınlıq gətirən politoloq Elşən Manafov "Bakı-Xəbər"ə açıqlamasında bildirdi ki, Avrasiya İqtisadi İttifaqının logistik potensialının genişlənməsinə yalnız Şimal-Cənub nəqliyyat dəhlizinin istifadəyə verilməsi ciddi töhfə verə bilər: "Bəlli dəhliz Rusiyanın Azərbaycan və İran üzərindən Hindistan və Çinə, Yaxın Şərqə çıxışını nəzərdə tutur. Lakin Azərbaycan hələlik Aİİ-nin üzvi olmadığından bu dəhlizin bəlli subregional təşkilatın logistik imkanlarının genişlənməsinə təsirindən söhbət gedə bilməz. Digər tərəfdən, Paşinyanın "Sulh kəsişməsi" layihəsi Azərbaycanın bu layihədə təmsilçiliyi təmin olunmadan da rentabelli sayıla bilməz. Ən azından ona görə ki, Ermənistanın Aİİ ilə birbaşa quru sərhədləri yoxdur. Paşinyan məlum layihəyə diqqət yönəldərək, guya ki, Azərbaycanın öz mövqeyi ilə Aİİ-yə qarşı olduğu görüntüsünü yaratmaq istəyir. Dolayı işarə edir ki, logistikaya Azərbaycan mane olur. Halbuki, Ermənistan xaric digər Aİİ üzvləri ilə Azərbaycan çox yaxın iktərəfli münasibətlərə malikdir. Paşinyan hələ bu ilin iyununda Ermənistanın Avropa İttifaqına assosiativ uzvlüyünə qəbul olunmaq üçün müraciət edəcəyini bildirib. Ermənistanın Aİ-nin assosiativ üzvlüyünə namizəd məsələsinin qabardılması belə, onun Aİİ ilə münasibətlərə xitam verilməsi zərurətini doğuracaq. Rusiya baş nazirinin müavini Overçukun bildirdiyi kimi, bunlar geosiyasi anlamda tamamilə fərqli tərəflərdir. Ermənistan Avropa İttifaqına üzv olmaqla, əslində bölgəyə Qərb kapitalı və işçi qüvvəsinin də cəlb olunmasına kömək edə bilər. Ermənistanın bu təşkilatla münasibətləri rəsmi İrəvanın gerçək istəklərini gizlətmək səylərindən irəli gəlir. Aİİ-nın logistik imkanlarının genişləndirilməsi həm də Zəngəzur dəhlizinin istifadəyə verilməsini ehtiva edir ki, məlum dəhlizlə bağlı layihələrin icrasını məhz rəsmi İrəvan ləngidir. Ermənistan Aİ-nin assosiativ üzvi olmadığı üçün onun bu hərəkətləri məntiqi deyil. Ermənistan Vaşinqton və Brüsselin çağırışı ilə bölgədə eskalasiyanı genişləndirmək yolunu tutur, baş verən hadisələrdə isə Azərbaycanı ittiham edir. Rəsmi İrəvan özünün Aİ ilə bağlı əsl niyyətini gizlədir və əslində Rusiyanın Ermənistanı cəzalandıracağından ehtiyat etdiyindən bu cür riyakar mövqe sərgiləyir".
Vidadi ORDAHALLI
