Azər Həsrət: "Fransa və ya Ermənistanın COP29-la bağlı bəhanələri heç bir işə yaramayacaq"
Məlum olduğu kimi, Prezident İlham Əliyev Beynəlxalq Çernobbio Forumunda "Yeni geosiyasi şəraitdə Azərbaycanın rolu" adlı sessiyada çıxış edib. Prezident İ.Əliyev çıxışı zamanı bildirib ki, Azərbaycan iki aydan sonra ən böyük iqlim konfransına – COP29-a ev sahibliyi edəcək:
"Bununla bağlı qərar ötən ilin dekabrında verildi və bizim hazırlıq üçün bir ildən az vaxtımız var idi. Burada ən vacib məqam ondan ibarətdir ki, bu qərar 200-yə yaxın ölkə arasında konsensusa əsaslanırdı. Biz bunu Azərbaycana olan ehtiramın təzahürü hesab edirik".
200-ə yaxın ölkə COP29-a Azərbaycanın ev sahibliyi etməsini qəbul edib və bunu xoş qarşılayırlar. Ancaq bəzi ölkələr müxtəlif bəhanələrlə COP29-un Azərbaycanda keçirilməsini düzgün hesab etmir.
Maraqlıdır, hazırda COP 29- a görə Azərbaycanın adını, fəaliyyətini qaralamaq istəyən ölkələrin bu siyasətləri ilə əslində dünyanın 200 ölkəsinin əleyhinə çıxdıqlarını söyləmək olarmı? Yəni 200 ölkə COP-un Bakıda keçirilməsini razılaşdırıb. Ancaq bəzi ölkələr, o cümlədən Fransa, Ermənistan və digərləri ən müxtəlif bəhanələrlə - insan haqları, demokratiya, seçki, guya ermənilərin Qarabağdan deportasiya edilmələri bəhanələri altında Azərbaycanın adını ləkələmək istəyirlər ki, bu da əslində COP-un uğurlu nəticələr verməsinə qarşı siyasət aparmaqdan başqa bir şey deyil.
"Azərbaycan əvvəllər də irimiqyaslı qlobal tədbirlərə ev sahibliyi edərkən elə Ermənistan, Fransa və ya onların cici-bacıları bizə qarşı kampaniyalar aparıb"
Mövzu ilə bağlı fikir bildirən siyasi şərhçi Azər Həsrət "Bakı-Xəbər"ə şərhində bildirdi ki, Fransa və ya Ermənistanın COP29-la bağlı bəhanələri heç bir işə yaramayacaq: "COP29-un Azərbaycanda keçirilməsi ilə bağlı səsvermədə Ermənistanın özü bizim lehimizə səs verib. Yəni konsensus olub, bütün ölkələr bu tədbirin məhz Azərbaycanda keçirilməsinə razılıq verib. Heç bir dövlət bunun əleyhinə çıxış etməyib. Qeyd etdiyim kimi, Fransa və Ermənistanın özü belə bu tədbirin Azərbaycanda keçirilməsinə səs verib. Belə bir vəziyyətdə sonradan suyu bulandırmaq nəyə lazımdır? Sadəcə olaraq Fransa, Ermənistan və ya onlarla bir sırada dayanan mərkəzlər başa düşür ki, COP29 bugünə kimi keçirilən tədbirlərdən daha möhtəşəm olacaq. Dünyanın hər bir tərəfində belə tədbirlər keçirilib, ancaq Azərbaycan belə layihələri fərqli tərzdə icra edir və digər ölkələrdən seçilib. Şübhəsiz, Azərbaycan COP29-un möhürünü vuracaq. Bu isə bizim dövlətimizin nə qədər hazırlıqlı olduğunu bir daha nümayiş etdirir. Təbii ki, əleyhdarlar bu ehtişamı görəcəklərini bildiklərinə görə indidən gözdənsalma kampaniyası aparırlar. Ancaq onların istəyi, niyyəti boşa çıxacaq. Nəzərə almaq lazımdır ki, Azərbaycan əvvəllər də irimiqyaslı qlobal tədbirlərə ev sahibliyi edərkən elə Ermənistan, Fransa və ya onların cici-bacıları bizə qarşı kampaniyalar aparıblar. Ancaq qalib yenə biz olmuşuq, o tədbirləri yüksək səviyyədə keçirib, özümüzü, gücümüzü göstərmişik".
Günel CƏLİLOVA
