Elşad Həsənov: "Bizə qarşı sanksiya təşəbbüsü ilə çıxış edən deputatları ölkəmizə buraxmayacağıq"
Prezident İlham Əliyev Beynəlxalq Çernobbio Forumunda moderatorun İtaliya deputatları ilə bağlı sualını cavablandırarkən deyib ki, 70 deputat bizim əleyhimizə səs verib və gələn il yanvarda vəziyyət dəyişə bilər:
"Buna səs verənlər bizi Avropa Şurasında görmək istəməyənlərdir. Yəni Azərbaycanın qərarı adekvat idi. Bizim qərarımız buna cavab idi. Onlar tərəfindən qərarın dəyişdiriləcəyi və bizim hüquqlarımızı bərpa etdikləri təqdirdə, gələn ilin yanvar ayında belə bir fürsət olacaqdır, bizim tətbiq etdiyimiz qadağa aradan qaldırılacaq. Mən təəssüf edirəm ki, İtaliya parlamentinin üzvləri bu qərarın lehinə səs veriblər. Səmimi desəm, mən 70-dən artıq şəxsdən ibarət bu siyahıda olanların adlarını bilmirəm. Ancaq vəziyyəti yaxşılaşdırmaq üçün imkan var. Bizim nümayəndə heyətimizin fəaliyyəti bərpa edilməlidir və o zaman bu qadağa aradan qaldırılacaq".
Maraqlıdır, İtaliya deputatlarının mövqeyində dəyişiklik bundan sonra mümkündürmü və həmin deputatların mövqe dəyişməsi Azərbaycanın AŞPA-da mandatının bərpasına necə təsir edə bilər?
"Belə bir ehtimal böyükdür və İtaliyadan olan deputatların ədalətli mövqe sərgiləyəcəkləri güman edilir"
Sözügedən məsələyə aydınlıq gətirən siyasi ekspert Elşad Həsənov "Bakı-Xəbər"ə açıqlamasında bununla bağlı bir sıra məqamlara toxundu: "Bəli, belə bir ehtimal böyükdür. Xüsusən də İtaliyadan olan deputatların ədalətli mövqe sərgiləyəcəkləri güman edilir. Prezident İlham Əliyevin İtaliyaya səfəri, orada möhtəşəm çıxışı, sualları cavablandırması bu qənaətə gəlməyə əsas verir. Nəzərə almaq lazımdır ki, Azərbaycan İtaliyanın sadiq tərəfdaşıdır. Azərbaycan təkcə bu ilin 7 ayında İtaliyaya 11 milyard dollar həcmində qaz ixrac edib. Qazla yanaşı, həm də İtaliyaya neft ixrac edirik. İki ölkə arasında çox güclü iqtisadi əlaqələr mövcuddur. Hətta Azərbaycanda istehsal ediləcək yaşıl enerjinin İtaliyaya ixrac edilməsi gündəmdədir. Eyni zamanda Prezident Əliyev onu da bildirdi ki, bu gün Azərbaycana ən böyük dəstək göstərən ölkə İtaliyadır. O cümlədən, işğaldan azad edilən ərazilərdə fəaliyyət göstərən xarici şirkətlər arasında İtaliya şirkətləri xüsusi çəkiyə malikdir və Türkiyədən sonra ikinci yerdədilər. Həmçinin, tarixi binaların bərpasında İtaliya şirkətləri yaxından iştirak edir. Bütün bunlar onu göstərir ki, Azərbaycan-İtaliya əlaqələri təkcə enerji məhsullarının ticarəti üzərində qurulmayıb. Digər sahələrdə də tərəflər arasında iqtisadi əlaqələr inkişaf edir. Bütün bunlardan çıxış edərək hesab edirəm ki, AŞPA-da İtalyadan olan deputatlar öz mövqeyinə yenidən baxacaq və yanvarda Azərbaycanın xeyrinə səs verəcəklər. Təbii ki, AŞPA-da Fransadan, Almaniyadan olan bəzi deputatların Azərbaycana qarşı qərəzli mövqeyi qəbulolunmazdır. Azərbaycan haqlı olaraq onları parlament sekilərini izləməyə buraxmadı. Bizə qarşı sanksiya təşəbbüsü ilə çıxış edən deputatları ölkəmizə buraxmayacağıq. Onlar anlamalıdılar ki, qarşılarında marionet bir rejim deyil. Öz marağı və siyasi çəkisi olan bir ölkədir. Hesab edirəm ki, İtaliya Avropa İttifaqında bizim ən yaxın tərəfdaşımızdır. Bu baxımdan bütün bunlar öz sözünü deyəcək".
Vidadi ORDAHALLI
