Sədrəddin Soltan: "Paşinyan Ruben Vardanyan və onu dəstəkləyən qüvvələrdən imtina etməklə həm də qisas alır"
"Necə oldu ki, Ruben Vardanyan Rusiya vətəndaşlığından imtina etdi? Bu addımı atmağı ona kim məsləhət görüb və ya göstəriş verib? Onu bu mənada kim Ermənistana göndərib, kim Qarabağa hansı məqsədlə, hansı zəmanətlə, hansı təminatla, hansı vədlərlə göndərib? Və sonunda kim dedi: "Bilirsən nə var? Biz onun kim olduğunu bilmirik, çünki o, başqa ölkənin vətəndaşıdır". Bu suallara cavab istəyirik, yoxsa yox? Bu, həqiqətən də bizim üzləşdiyimiz ciddi problemdir".
Bu barədə Ermənistanın Baş naziri Nikol Paşinyan avqustun 31-də Karen Dəmirçyan adına İdman-Konsert Kompleksində keçirilən mətbuat konfransında bildirib.
Qeyd edək ki, 2023-cü il sentyabrın 27-də "Laçın" dövlət sərhədinin buraxılış məntəqəsində Dövlət Sərhəd Xidmətinin hərbi qulluqçularının sayıqlığı nəticəsində ölkə ərazisinə qeyri-qanuni gələrək qondarma "Dağlıq Qarabağ Respublikasının Dövlət naziri" vəzifəsində çalışmış Ruben Karlenoviç Vardanyan Azərbaycan Respublikasından Ermənistan istiqamətində hərəkət edərkən saxlanılıb. Hazırda Bakı həbsxanalarından birində cəzasını çəkir.
Paşinyan isə Vardanyanın Qarabağa niyə göndərildiyini indi araşdırmağa başlayıb.
"Demək istəyir ki, rəsmi İrəvanın, yəni hakimiyyətin, onun komandasının həmin separatçılarla heç bir əlaqəsi yoxdur və onların etdikləri cinayətlərlə bağlı məsələləri bölüşmür"
Orta Doğu Araşdırma Mərkəzinin rəhbəri Sədrəddin Soltan "Bakı-Xəbər"ə bildirdi ki, Ruben Vardanyan Rusiyada anadan olub və Rusiyada da var-dövlət yığıb. "Yəni Rusiyada da o qədər var-dövlət yığmaq üçün, şübhəsiz ki, Rusiya hakimiyyəti ilə əlaqələri olmaq lazım gəlirdi. Əvvəllər hökumətin sözünə baxmayan oliqarxların taleyi bəllidir. Bəzilərinə də sanksiyalar tətbiq olunub. Rusiya hakimiyyətinə yaxın olan və bu ölkədə formalaşmış erməni milyonerlər - Samvel Karapetyan, Karen Karapetyan, Ruben Vardanyan və başqaları, bunlar hamısı Qarabağ torpaqları işğal altında olanda bu və başqa şəkildə işğalı dəstəkləyiblər. Hətta "Taşir" şirkətlər qrupunun rəhbəri Samvel Karapetyan Qarabağda dünyaya gələn uşaqlar üçün müavinət vermişdi, Qarabağdakı erməni ailələrinə pul ayırmışdı və sair. Onların müxtəlif bəlli olmayan əməliyyatlarda da iştirak etdikləri istisna olunmur. Ter-Petrosyandan sonra Ermənistan hakimiyyəti Qarabağdan gedən erməni liderlərinin başçılığı ilə formalaşıb. Bura Robert Koçaryan, Serj Sarkisyan aiddir. Növbəti prezident, məntiqlə, o ardıcıllıqla Bako Saakyan, yaxud Arkadi Qukasyan olmalı idi. Bunların heç biri o səviyyəli siyasi fiqurlar ola bilmədiklərinə görə növbəti kart olaraq Ruben Vardanyan kartı işlədi. Ruben Vardanyan kartı həm də Rusiya tərəfindən Ermənistana hakimiyyət dəyişikliyi üçün hazırlanmışdı. Qarabağla heç bir əlaqəsi olmayan Vardanyan özünü Qarabağda separatçılar, terrorçular arasında doğrultmalı və sonra da "qəhrəman" kimi Ermənistana prezident, yaxud baş nazir olaraq başçılıq etməli idi. Paşinyan hakimiyyətə gələndən sonra Qarabağdakı separatçılarla onun arasında da ziddiyyələr var idi. Hadisələrin gedişində də Azərbaycan tərəfindən göstərilən çox sayda təzyiqlərdən sonra Ruben Vardanyan Rusiya vətəndaşlığından imtina etdi və guya qondarma haranınsa "vətəndaşı" kimi Azərbaycan ərazisində qanunsuz olaraq fəaliyyət göstərməyə, separatizmi, terrorizmi dəstəkləməyə başladı. Müharibənin gedişində məğlubiyyətdən sonra kimi gizləndi, kimi qaçıb getdi, nəticədə Ruben Vardayanı Azərbaycanın güc strukturları həbs etdi. Hazırda Azərbaycanda həbsdə olan separatçılığı, terrorçuluğu, qanunsuz fəaliyyəti dəstəkləyən ermənilərin Ermənistanda və diaspor təşkilatları arasında azad olunmasını tələb edənlər var. Paşinyan isə bu məsuliyyətdən yaxasını kənara çəkmək, bu məsuliyyəti üzərindən atmaq üçün bildirir ki, Vardanyan niyə Rusiya vətəndaşlığından imtina etdi?"-deyə bildirən S.Soltanın fikrincə, Paşinyan bu kimi suallar verməklə bildirmək istəyir ki, hakimiyyətin onlarla heç bir əlaqəsi yoxdur. "Bununla Paşinyan demək istəyir ki, rəsmi İrəvanın, yəni hakimiyyətin, onun komandasının həmin separatçılarla heç bir əlaqəsi yoxdur və onların etdikləri cinayətlərlə bağlı məsuliyyəti bölüşmürlər. Başqa sözlə, Paşinyan Ruben Vardanyan və onu dəstəkləyən qüvvələrdən imtina etməklə həm də qisas alır. Bu qisas həm də Robert Koçaryandan, Karapetyandan, Sarkisyandan alınan qisasın bir hissəsidir. Paşinyan bunların hamısını bilir, amma sadəcə olaraq həm də onlara mesaj verir ki, vaxtında rəsmi İrəvanla hesablaşmadıqlarından Azərbaycanda həbs olunublar. Paşinyan bu addımı ilə eyni zamanda Qarabağda Ermənistanın törətdiyi cinayətlərdən yaxasını kənara çəkməyə çalışır. Çünkii müharibə gedən vaxtı Ermənistanda hakimiyyətə Paşinyan başçılıq edirdi. Yəni orada Azərbaycan əsgərinin ölməsində, işğalçılar tərəfindən Azərbaycana qarşı törədilən hadisələrdə Paşinyan hökumətinin də cinayət məsuliyyəti var. Əgər Paşinyan ordunu çıxarmaq istəsəydi əvvəldən çıxara, bu razılaşama əvvəldən reallaşa bilərdi. 2018-ci ildə hakimiyyətə gəlmişdi, amma bu niyə 2019-cu ildə baş vermədi? 2020-ci ilin əvvəl aylarında niyə baş vermədi? Paşinyan Şuşada halay qurub başqasının torpağında niyə rəqs edirdi? Onun xanımı niyə Azərbaycan torpağına qanunsuz olaraq gəlib şəkil çəkdirib paylaşırdı? Əlbəttə, bunların hamısında Paşinyan hökumətinin də məsuliyyəti var. Amma bununla belə, Paşinyan öz məsuliyyətindən yaxasını kənara çəkmək istəyir. Ruben Vardanyanın və başqa separatçıların məsuliyyətini bölüşmək istəmir. Ruben Vardanyan isə birbaşa başqa ölkənin vətəndaşı kimi Azərbaycan ərazisində pozuculuq fəaliyyəti ilə, separatçılığı, terrorizmi dəstəkləməklə məşğul olub. Paşinyan həm də bununla Rusiyaya meydan oxumuş olur ki, Ruben Vardanyan Ermənistan vətəndaşı deyil, onun Ermənistanla heç bir əlaqəsi yoxdur və bütün məsələləri Rusiya törədib, Rusiya vətəndaşı Ruben Vardanyanın Qarabağda fəaliyyəti bunun göstəricisidir"-deyə S.Soltan qeyd etdi.
İradə SARIYEVA
