Qasım Hacıyev: "Avropa dövlətləri Türk Dövlətləri Təşkilatına üzv ölkələrin imzaladığı "Qarabağ Bəyananməsi"ni həzm edə bilmir və kilsə təşkilatlarından istifadə edib Azərbaycana iftira atırlar"
Uzun əsrlərdir fəaliyyəti təxribatdan, terrordan, düşmənçilik toxumu əkməkdən və bölücülükdən ibarət olan erməni Qriqoryan kilsəsi öz yalanlarına, uydurmalarına dünyadakı başqa xristian kilsə təşkilatlarını da ortaq etməkdə davam edir. Qarabağda "erməni xristian irsi"nin olduğuna dair mifə Avropanın kilsə məclislərini də inandırmağa çalışan erməni kilsəsi əslində onları öz qondarma iddiasına alət edir.
Erməni mətbuatının yazdığına görə, bu günlərdə Avropadakı xristian kilsələrinin əksəriyyətini birləşdirən ekumenik təşkilat olan Avropa Kilsələri Konfransının təşkilatçılığı ilə İspaniyada "Dağlıq Qarabağın xristian abidələrinin qorunması" müzakirə olunub (?).
Sözügedən tədbirdə erməni din xadimi yalan-yamalaq fikirlər söyləyib, Qarabağda olmayan "erməni mənəvi-tarixi irsinin" "məhv" edildiyini deyib. O, qalan "ziyarətgahların qorunmasının", eləcə də Qarabağdan olan "məcburi köçkünlərin" "qanuni hüquqlarının" bərpasının zəruriliyi ilə bağlı məsələ qaldırıb.
Guya Qarabağda "erməni mədəni-tarixi irsi" "təhlükədədir". O, "faktların" toplanması üçün ora UNESCO-nun missiyasının göndərilməsinin vacibliyini vurğulayıb.
UNESCO olmayan bir irs haqqında nə toplaya bilər ki? Azərbaycan dövləti heç zaman ölkədəki xristian irsinə qarşı məhvetmə siyasəti aparmayıb, əksinə, kilsələri, dini məbədləri restavrasiya edib, qoruyub, onların müdafiəsini həyata keçirib. Biz erməni kilsəsini də Bakının mərkəzində saxlayırıq, qoruyuruq. Azərbaycan xristian irsinin düşməni olsaydı, ölkəmizdə bir dənə də olsun xristian izi qalmazdı. Amma bütün dünya görür ki, Azərbaycanda xristian irsi hansı səviyyədə, hansı qayğı ilə qorunur. Qarabağda hansısa erməni irsi axtarışına gəlincə, məlum, orda heç bir erməni irsi yoxdur, olmayıb da. Oradakı xristian irsi alban-xristian irsidir ki, vaxtilə ermənilər o irsi mənimsəyib, bu gün isə o irs əsl sahibinin himayəsindədir, Azərbaycan dövləti xristian irsinin qayğısına lazımı səviyyədə qalır. Ermənilərin də, Avropadakı xristian təşkilatlarının da narahatlığına əsas yoxdur. "Məcburi köçkün və qaçqınlara" gəlincə, onları heç kəs Qarabağdan qovmayıb, öz havadarlarının əmri ilə Qarabağı könüllü şəkildə tərk ediblər. Bunu özündə əks etdirən minlərlə videogörüntü var. O ki qaldı ermənilərin geri qayıtmaq istəyinə, onlar Azərbaycan vətəndaşı kimi Azərbaycan qanunlarına tabe şəkildə gəlib yaşaya bilərlər, bunun əksi mümkün deyil. Erməni toruna düşən məlum xristian təşkilatları din adı arxasında gizlənməkdənsə, araşdırıb gerçəkləri ortaya çıxarslar yaxşı olar...
"...Avropa Kilsələri Konfransının təşkilatçılığı ilə İspaniyada belə bir qondarma tədbirin keçirilməsi təxribat xarakteri daşıyır"
AMEA-nın Qafqazşünaslıq İnstitutunun Qafqaz Tarixi şöbəsinin müdiri, professor Qasım Hacıyev "Bakı-Xəbər"ə şərhində bildirdi ki, Avropanın xristian dövlətinin təsiri altında olan bu kilsə təşkilatları hər zaman müsəlman, türk dünyasına qarşı düşmənçilik edib, amma indiyə qədər heç zaman müsəlman dünyası xristianlığa qarşı ədavət və revanşizm siyasəti aparmayıb. Q. Hacıyevin sözlərinə görə, orta əsrlərdə müsəlman dünyasına, müsəlmanlığa qarşı mübarizə adı altında türk dünyasının, türklərin inkişafının, irəliləyişinin qarşısını almaq üçün Avropa dövlətləri birləşib "xaç yürüşləri" həyata keçirib, bunun nəticəsində özləri də çox ziyan çəkib. "İndi də məqam düşdükcə yenə o yolu gedirlər, "xristianların müdafiəsi", "xristian irsinin qorunması" adı altında bu cür təxribatçı yığıncaqlar keçirir, türklərin, müsəlmanların əleyhinə qərarlar qəbul edirlər. Əslində, heç də məqsəd "xristian irsinin müdafiəsi" deyil, çünki dünyanın heç yerində xristian irsinə qarşı təhlükə yoxdur. Qarabağdakı xristian irsinə gəlincə, o tədbiri keçirənlər də yaxşı bilirlər ki, bizim ərazilərdə erməni irsi yoxdur, buradakı xristian irsi, xristianlıq dövrü abidələri albanlara aiddir. Onların məqsədi türk birliyinin güclənməsinin qarşısını almaq, Türk Dövlətləri Təşkilatının günü-gündən genişlənən uğurlu fəaliyyətini ləngitməkdir.
İspaniyada keçirilən təxribatçı tədbir Türk Dövlətləri Təşkilatına üzv ölkələrin Şuşada keçirilən qeyri-rəsmi Zirvə görüşü ilə təxminən eyni vaxta təsadüf edir. Zirvədə qəbul edilən "Qarabağ Bəyannaməsi", İspaniya başda olmaqla, Avropa dövlətlərinin hamsını ciddi narahat edir. Ermənilərin və havadarlarının Avropadakı xristian kilsələrinin əksəriyyətini birləşdirən ekumenik təşkilat olan Avropa Kilsələri Konfransının təşkilatçılığı ilə İspaniyada belə bir qondarma tədbirin keçirilməsi təxribat xarakteri daşıyır. Qarabağda erməni irsinin olduğunu iddia etməyin özü absurddur. Azərbaycan öz ərazilərində olan bütün abidələrin bərpası ilə məşğul olur. Bərpa edilən abidələr erməni vandallığına məruz qalan abidələrdir. O irs "erməni irsi" olsaydı ermənilər onları məhv edərdimi, dağıdardımı? Əlbəttə, yox.
Düşünürəm ki, İspaniyada başlayan bu təxribatçı tədbirin davamı başqa Avropa ölkələrində də ola bilər. Dediyim kimi, Avropa dövlətləri Türk Dövlətləri Təşkilatına üzv ölkələrin imzaladığı "Qarabağ Bəyannaməsi"ni həzm edə bilmir və kilsə təşkilatlarından istifadə edib Azərbaycana iftira atırlar"-deyə bildirən Q.Hacıyevin sözlərinə görə, dünyanın tərəqqipərvər xalqları və dövlətləri mədəni əlaqələr qurur, iqtisadi münasibətlərini inkişaf etdirir, başqa əlaqələri genişləndirir, ermənilər və Qərb dövlətləri isə imkan tapan kimi qondarma erməni irsi məsələsini ortaya atırlar, Azərbaycana qarşı şər-böhtan kampaniyası aparırlar. "Əgər Azərbaycandakı xristian irsini görmək istəyirlərsə, hər zaman gəlib turist kimi ziyarət edib gedə bilər. Amma gəlmirlər, çünki bir nöqsan tapa bilməyəcəklərini bilirlər, ona görə də uzaqdan-uzağa bu cür hərəkətlər edirlər.
Bir məqamı da deyim ki, erməniləri müdafiə edən, "erməni irsinin qayğısına qalan" Qərb dövlətləri, onların şirkətləri ərazilərimiz işğalda olduğu dövrlərdə bizim mədənlərimizi istismar edirdilər, təbii sərvətlərimizi talayıb daşıyırdılar, meşələrimizi, nadir ağaclarımızı qırırdılar. İndi bunların hamısı onların əlindən çıxıb, talançılıqlarına son qoyulub. Əlbəttə, buna görə də, onlar başqa üsullarla bizə zərbə vurmaq istəyirlər. Bu baxımdan, İspaniyanın da bizə qarşı hərəkəti başadüşüləndir. Bilirsiz ki, vaxtilə Çindən tutmuş İspaniyaya qədər islam dini yayılmışdı, o xalqlar müsəlmanlığı qəbul etmişdilər. Amma sonradan Avropa dövlətlərinin təkidi ilə xristianlığın o dövlətlərin daxilində genişləndirilməsi müsəlmanlığa qarşı ədavətin baş qaldırmasına səbəb olub.
Qarabağ işğalda olan dövrdə o dövlətlər bizim torpaqlardan öz iqtisadi maraqlarını təmin edirdilər, amma ərazilərimizin işğaldan azad edilməsi onların iqtisadi maraqlarının təmin olunmasının qarşısını aldı. Həm bu amil, həm də müsəlman və türk dünyasına qarşı qanlarında olan ədavət onları belə yersiz, absurd qərarlar qəbul etməyə vadar edir. Siz xristian dövlətləri kimi xristian abidələrinin dərdini çəkirsinizə elə birinci UNESCO xətti ilə Ermənistana səfər edib ordakı abidələrin vəziyyətinə baxın, ermənilərin Qarabağda xristain və müsəlman abidələrinə qarşı törətdikləri vandalizmi görün, sonra danışın. Dünya xalqları özlərini inkişaf etdirəndə ispanlar piratlıqla məşğul olub ticarət gəmilərini soymaqla özlərinə iqtisadi imkan yaradıblar, tarixlər boyu onunla məşğul olublar. İndi durub ordan bura "Arsax ərazisi" və onun "abidələri" haqda qondarma bəyanatlar verməyə haqları yoxdur. Gedib tarixdən dərslərini götürsünlər, İspaniyada oturub Azərbaycan dövlətinin və xalqının mənafelərinə qarşı çıxış etməsinlər"-deyə bildirən Q.Hacıyev əlavə etdi ki, Azərbaycan alimləri hər bir antiazərbaycan qüvvəsinin cavabını faktlarla verməyə hazırdır.
İradə SARIYEVA
