COP-la bağlı Beynəlxalq Məşvərət Komitəsi yaradılır...
Bəhruz Quliyev: "Beynəlxalq Məşvərət Komitəsinin yaradılması Azərbaycanın bərpaolunan enerji istehsalı məsələsinə nə dərəcədə önəm verdiyini göstərir"
İyulun 8-də BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) ilə əlaqədar Təşkilat Komitəsinin beşinci iclası keçirilib.
Bu iclasda Prezident Administrasiyasının rəhbəri, BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) ilə əlaqədar Təşkilat Komitəsinin
sədri Samir Nuriyev Azərbaycanın iqlim dəyişmələrinə qarşı mübarizədə dövlətlərlə yanaşı, qeyri-hökumət təşkilatları, beyin mərkəzləri ilə də əməkdaşlığa açıq olmasına toxunaraq vurğulayıb ki, bir sıra nüfuzlu əcnəbi şəxslərdən ibarət COP29 Beynəlxalq Məşvərət Komitəsinin yaradılması istiqamətində işlər yekunlaşmaqdadır.
"Dünyanın daha təcrübəli ölkələri ilə fikir mübadiləsinin aparılması və təcrübələrin bölüşülməsi Azərbaycanın yaşıl enerjiyə keçid prosesini sürətləndirəcək və nəticəyə öz töhfəsini verəcək"
COP29-la bağlı Beynəlxalq Məşvərət komitəsinin yaradılmasını yüksək dəyərləndirən Səs Media Qrupun rəhbəri, siyasi analitik Bəhruz Quliyev "Bakı-Xəbər"ə şərhində "Əvvəla onu qeyd edim ki, BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasının (COP29) Azərbaycanda keçirilməsi dəqiq və düşünülmüş diplomatik addımların nəticəsidir. Azərbaycanın tərəfdaşları ilə qurduğu sağlam diplomatik münasibətlər, dünya ictimaiyyətində ölkəmizin etibarlı tərəfdaş kimi tanınması və əldə etdiyi yüksək nüfuz bu tədbirin keçirilməsini təmin edib. Bu, həm də onu göstərir ki, Azərbaycan artıq iqlim dəyişiklikləri ilə bağlı qlobal çağırışları dəstəkləyən və buna töhfə verən dövlət kimi tanınır və qəbul edilir. COP29 tədbiri Azərbaycanın qlobal səviyyədə tanınmasına şərait yaradacaq. Həm də Azərbaycanın uzaqgörən, qlobal səviyyədə mövqeyini möhkəmləndirəcək xarici siyasətini davam etdirməyə imkan yaradacaq. İnsan həyatı üçün önəmli olan bəzi qlobal məsələlərin müzakirə edildiyi COP29 dünyada ən böyük tədbirlərdən biri hesab olunur"-deyə bildirdi.
Siyasi analitik qeyd etdi ki, COP29-la əlaqədar Təşkilat Komitəsinin beşinci iclasında çıxış edən Prezident Administrasiyasının rəhbəri, Təşkilat Komitəsinin sədri Samir Nuriyev müxtəlif dövlət qurumlarının təklifləri əsasında, eləcə də BMT və digər beynəlxalq qurumlarla intensiv müzakirələr nəticəsində 14 təşəbbüsdən ibarət ilkin təkliflər siyahısının hazırlandığını bildirib: "Qeyd edib ki, artıq BMT ilə razılaşdırmaqla COP29-un tematik günlərinin bölgüsü aparılıb. Azərbaycan iqlim dəyişmələrinə qarşı mübarizədə, dövlətlərlə yanaşı, qeyri-hökumət təşkilatları, beyin mərkəzləri ilə də əməkdaşlığa açıqdır. Məhz bu məqsədlə bir sıra nüfuzlu əcnəbi şəxslərdən ibarət COP29 Beynəlxalq Məşvərət Komitəsi yaradılıb. Azərbaycan yaşıl enerjiyə keçidə hazırlaşır. COP29 tədbiri də həmin keçidin daha səmərəli olmasını təmin edən çox faydalı platformadır. Dünyanın daha təcrübəli ölkələri ilə fikir mübadiləsinin aparılması və təcrübələrin bölüşülməsi Azərbaycanın yaşıl enerjiyə keçid prosesini sürətləndirəcək və nəticəyə öz töhfəsini verəcək. Beynəlxalq Məşvərət Komitəsinin yaradılması Azərbaycanın bərpaolunan enerji istehsalı məsələsinə nə dərəcədə önəm verdiyini göstərir. Və burada beynəlxalq partnyorların məsuliyyəti məsələsi də dəqiqləşdirilir. Təbii ki, əgər dünya birliyi yaşıl enerjiyə keçidi dəstəkləməkdə israrlıdırsa bütün çağırışlara müsbət yanaşmalı və ona dəstək olmalıdırlar. Azərbaycanın bu tədbirə ev sahibliyi etməsi ölkəmizə verilən dəyər, yüksək etimaddır. Ölkəmiz beynəlxalq tədbirlərə ev sahibliyi etməkdə müsbət imic qazanıb. COP29 Azərbaycanın, neft-qaz ölkəsi olmaqla yanaşı, yaşıl iqtisadiyyatı nə dərəcədə prioritet sahə kimi gördüyünü də sübut edəcək"-deyə B.Quliyev əlavə etdi.
İradə SARIYEVA
