Faiq Balabəyli: "Yeni Kaledoniyanın iki liderinin Fransa Parlamentinə seçilməsi mühüm hadisə olmaqla yanaşı, həm də bu xalqın öz müstəqillik ideyalarından əl çəkmək niyyətində olmadığının göstəricisidir"
Fransa hökumətinin dənizaşırı ərazilərdə həyata keçirdiyi irticaçı müstəmləkəçilik siyasəti, kiçik ada dövlətlərinin əhalisinə, azadlıq, mütəqillik tərəfdarı olan liderlərinə qarşı atdığı addımlar artıq iflasa uğramaqdadır.
Bir sözlə, Fransa hökumətinin mövqeyi o ərazilərdə zəifləməkdədir. E.Makron hökuməti bütün vasitələrdən istifadə etsə də, Yeni Kaledoniyada azadlıq aşiqlərinin müqavimətini qıra bilmədi, müstəqillik tərəfdarı liderlərin Fransa parlementinə yolunu kəsmək məsələsində aciz qaldı.
Bildiyimiz kimi, Fransa Milli Assambleyasına seçkilərin ikinci turunda bu ölkənin dənizaşırı ərazilərini təmsil edən iki namizəd parlamentə seçilib.
"Franceinfo" ictimai yayım şirkətinin məlumatına görə, təxminən 40 ildə ilk dəfə olaraq Yeni Kaledoniyada müstəqillik tərəfdarı olan lider Fransa Milli Assambleyasında mandat qazanıb.
Beləliklə, Yeni Kaledoniya Fransa parlamentinin 577 yerlik aşağı palatasında iki yerə malikdir. Burada 222 mindən çox seçici qeydə alınıb və Sakit okean arxipelaqında seçici fəallığı birinci turda 60,02 faizlə müqayisədə 71,2 faiz təşkil edib.
İlkin nəticələrə görə, müstəqillik tərəfdarı namizəd Emmanuel Tjibaou Parisə loyal olan deputat Alside Ponqa ilə mübarizədə daha çox - səslərin 57,33 faizini toplayıb.
Beləliklə, 1989-cu ildə öldürülən Kanak lideri Jan-Mari Tjibaounun oğlu Emmanuel Tjibaou 1986-cı ildən bəri Milli Assambleyada mandat qazanan ilk müstəqillik tərəfdarı olub.
Digər seçki dairəsində Parisə loyal olan namizəd Nikolas Metzdorf 52,41 faiz, onun rəqibi - müstəqillik tərəfdarı siyasətçi Omayra Naisseline isə 47,59 faiz səs toplayıb.
Yeni Kaledoniyada müstəqillik tərəfdarı olan iki liderin Fransa parlamentinə seçilməsi böyük tarixi hadisədir. Özü də 1986-cı ildən indiyə qədər yaşanan ilk hadisə kimi tarixə düşüb. Həm də maraqlıdır ki, seçkidə iştirak edən seçicilərin sayı da, fəallığı da Fransanın özündən, Paris seçicilərinin sayından və fəallığından yüksək olub. Bu həmin adanın həqiqətən də müstəqillik ideyaları ilə yaşadığına bir sübutdur.
"Müstəqillik tərəfdarı olan iki liderin Fransa parlamentində yer alması başqa dənizaşırı ərazilərin də azadlıq, müstəqillik tərəfdarı olan liderlərinə, siyasi fəallarına yol açır"
Müstəqil.az saytının baş redaktoru Faiq Balabəyli "Bakı-Xəbər"ə bildirdi ki, müstəqillik tərəfdarı olan xalqların iradəsini heç bir güclə qırmaq olmur, çünki onların konkret hədəfi olur. "Yeni Kaledoniyanın iki liderinin Fransa Parlamentinə seçilməsi mühüm hadisə olmaqla yanaşı, həm də bu xalqın öz müstəqillik ideyalarından əl çəkmək niyyətində olmadığının göstəricisidir. Dənizaşırı ərazilərini təmsil edən iki namizəd parlamentə seçilməsi doğrudan da nələrinsə dəyişdiyindən xəbər verir. Həmin ərazidə seçici fəallığının çox yüksək olması, hətta Parisdəki seçici fəallığını üstələməsi bu xalqın azadlıq və müstəqillik ideyalarına sadiq olduğunun bir göstəricidir. Bu da onu sübut edir ki, Yeni Kaledoniya əhalisi Fransanın müstəmləkəçilik siyasətinə qarşı olmaqla artıq Makron hökumətinin müqavimətini laxlatmağa müvəffəq olur.
İki kanak liderinin Fransa parlamentinə seçilməsi həm də onu düşünməyə əsas verir ki, Yeni Kaledoniyanın müstəqilliyə qovuşması üçün artıq real imkanlar açılır"-deyə bildirən F.Balabəyli hesab edir ki, Yeni Kaledonyanın müstəqillik tərəfdarı olan iki liderinin Fransa parlamentində yer alması başqa dənizaşırı ərazilərin də azadlıq, müstəqillik tərəfdarı olan liderlərinə, siyasi fəallarına yol açır. "Bu başqa kiçik ada dövlətləri üçün bir örnəkdir ki, onlar da daha aktiv olub, gələcəkdə Fransa parlamentinə seçilib öz xalqlarının səsini dünyaya yayacaqlar, onları müdafiə edəcəklər. Əlbəttə, 1986-cı ildən sonra ilk dəfə belə hadisə baş verirsə, demək bunun ardı da gələcək. Hesab edirəm ki, bu presiedent başqa xalqlar üçün də yollar açacaq.
Artıq Fransa hökuməti yaxşı görür ki, xalqları zülm altında uzun müddət saxlamaq onun özünün itkiləri hesabına başa gəlir. Kanak xalqı göstərdi ki, zülmkarın siyasətini laxlatmaq mümkündür"-deyə müsahibimiz vurğuladı.
İradə SARIYEVA
