KTMT-dən dönən Ermənistan ABŞ-la daha bir hərbi təlimə başlayır…
Elxan Şıxəliyev: "Sənədlərdə KTMT üzvü olaraq qalmış olsa da, faktiki olaraq orada iştirak etmir, ödəliklərini də həyata keçirmir"
Beynəlxalq sülhməramlı missiyalarda iştiraka hazırlıq məqsədilə iyulun 15-dən 24-dək Ermənistanda "EAGLE PARTNER 2024" adlı birgə erməni-amerikan təlimləri keçiriləcək. Təfərrüatları Ermənistan Müdafiə Nazirliyinin mətbuat xidməti təqdim edib.
Məlumata görə, təlimlərdə ER silahlı qüvvələrinin sülhməramlı briqadasının, ABŞ-ın Avropa və Afrikadakı ordusunun, Kanzas Milli Qvardiyasının hərbçiləri iştirak edəcək:
"Təlimlər sülhməramlı tapşırıqları yerinə yetirərkən münaqişə tərəfləri arasında münasibətlərin sabitləşdirilməsi üzrə əməliyyatları əhatə edir.
Təlimin məqsədi sülhməramlı əməliyyatlar çərçivəsində beynəlxalq sülhməramlı missiyalarda iştirak edən bölmələrin koordinasiya səviyyəsinin yüksəldilməsi, idarəetmə və taktiki rabitə sahəsində qabaqcıl təcrübənin mübadiləsi, o cümlədən erməni bölməsinin döyüş hazırlığının artırılmasıdır.
Sülhməramlı missiyalara hazırlıq çərçivəsində beynəlxalq sülhməramlı əməliyyatlara hazırlaşan bölmələr mütəmadi olaraq tərəfdaş ölkələrdə analoji birgə hərbi təlimlərdə və təlimlərdə iştirak edirlər".
KTMT-nin üzvü olan Ermənistanın ABŞ-la belə təlimlər keçirməsi hansı anlama gəlir? Axı, ABŞ və KTMT əks qütblər deməkdir.
Hərbi-siyasi şərhçi, ehtiyatda olan polkovnik-leytenant Elxan Şıxəliyev "Bakı-Xəbər"ə aşıqlamasında bildirdi ki, ABŞ-ın sülhməramlıları ilə Ermənistan sülhməramlı briqadasının keçirdiyi təlimlər Sülh Naminə Tərəfdaşlıq proqramı çərçivəsində götürülən öhdəliklərin sahədəki məşqidir: "Amma bunun uzaqgedən məqsədləri də var. ABŞ rəsmiləri gizlətmirlər ki, gələcəkdə Ermənistanın təhlükəsizliyinin öz çətirləri altına alınması üzərində bir "yol xəritəsi" var. Eyni zamanda, Ermənistan da kollektiv müqavilə təşkilatının de-fakto üzvü olaraq qaldığı üçün, ABŞ düşünür ki, Ermənistan KTMT ilə əlaqələri sıfırlamalıdır. Ermənistan Rusiyanın yanaşmalarından da ehtiyatlanır. Bu səbəbdən Ermənistanın bu məsələni dondurmuş olduğu görünür. Yəni KTMT ilə əməkdaşlıq formal xarakter daşıyır. Sənədlərdə KTMT üzvü olaraq qalmış olsa da, faktiki olaraq orada iştirak etmir, öhdəliklərini də həyata keçirmir. ABŞ - la Ermənistanın birgə planları Rusiya-Ukrayna müharibəsinin nəticəsinə hesablanıb. Əgər ABŞ, NATO - ya daxil olan ölkə rəhbərlərinin düşündüyü kimi Rusiya Ukrayna müharibəsi nəticəsində strateji məğlubiyyətə uğradılacaqsa, Rusiya postsovet ölkələrindən öz təsirini çəkəcək və bu yer ABŞ - ın, yaxud da NATO - nun hərbi gücü ilə doldurulacaq. Ermənistan da indi ehtiyatlanır ki, gələcəkdə hər hansı bir fors-major, ya da müharibə təhlükəsi yarananda istinad edəcəkləri, güvənəcəkləri yer ABŞ olacaq. ABŞ da bu istəyini gizlətmir, Ermənistan üzərindən Cənubi Qafqazda hərbi gücünü artırır. Sanki bu coğrafiyanın gələcəkdəki təhlükəsizliyinin Ermənistan üzərindən təminatıdır. Ona görə də mütəmadi olaraq ABŞ məşqlər keçirəcək, Ermənistanı silahlandıracaq. Ermənistan özü də bu istəklər üzərinə meyllidir. Mən düşünürəm ki, gələcəkdə Rusiya ilə məsələləri sıfırlamadan bu müstəviyə keçmələri çox çətin olacaq".
Məhəmmədəli QƏRİBLİ
