Elşən Əliyev: "Hazırda Orta Dəhlizlə yükdaşımaların həcmi nəzərəçarpacaq dərəcədə artmaqdadır"
Bu dəfə Şuşa mötəbər və son dərəcə əhəmiyyətli tədbirə - Türk Dövlətləri Təşkilatının (TDT) dövlət başçılarının qeyri-rəsmi Zirvə görüşünə evsahibliyi ilə dünya gündəmini zəbt etdi. Bu onu göstərir ki, Şuşa həm də Türk dünyasının mərkəzi rolunda çıxış edir, müzakirələrin aparıldığı, vacib qərarların verildiyi məkana çevrilir.
Ölkəmizə gələn dost və qardaş ölkələrin rəhbərlərinin Şərqi Zəngəzura və Qarabağa səfərləri baş tutub, amma Şuşa sammiti işğaldan azad edilmiş ərazilərimizdə reallaşan ən böyük beynəlxalq səviyyəli tədbir kimi tarixə düşdü.
Qəbul edilən Qarabağ Bəyannaməsi Türk Dövlətləri Təşkilatının daha yaxşı siyasi, iqtisadi və təhlükəsizlik faydaları əldə edə bilməsi üçün yol xəritəsini təqdim edir.
TDT inkişafı Şərq- Qərb, Şimal- Cənub marşrutlarına yeni imkanlar açır və bununla Avrasiyanın geosiyasi mənzərəsini necə dəyişəcək?
İqtisadçı Elşən Əliyev "Bakı-Xəbər"ə bildirdi ki, indiki reallıqlar fonunda Şərq-Qərb, Şimal-Cənub nəqliyyat dəhlizinin genişləndirilməsi üzv dövlətlərin qarşısında duran vacib məqamlardandır və Azərbaycan bu istiqamətdə mühüm işlər görür: "Belə ki, Bakı-Tbilisi-Qars dəmir yolunun illik gücü 5 milyon tona çatdırılıb, Xəzərdə 50-dən çox ticarət gəmisi ilə Azərbaycan tranzit xidmətlərini həyata keçirir, həmçinin Ələt Beynəlxalq Ticarət Limanının yükötürmə qabiliyyətinin 25 milyon tona qədər genişləndirilməsi nəzərdə tutulub. Sözsüz ki, bütün bunlar Türk dövlətləri arasında iqtisadi əlaqələrin genişlənməsinə, ticarət dövriyyəsinin artmasına, həmrəyliyin möhkəmlənməsinə xidmət edir".
İqtisadçının sözlərinə görə, son illərə nəzər salsaq, Türk Dövlətləri Təşkilatına üzv olan ölkələr arasında ticari əlaqələr yüksələn xətlə inkişaf edir: "TDT çərçivəsində iqtisadi münasibətlərin getdikcə genişlənməsi qarşılıqlı inamdan qaynaqlanır.
Hazırda TDT dünya ölkələri tərəfindən mötəbər qurum kimi tanınır. Təxmini üzv dövlətlərdə Ümumi Daxili Məhsulun (ÜDM) həcmi 1.5 trilyon ABŞ dolları, ticarət dövriyyəsi 1.2 trilyon ABŞ dolları təşkil edir. Ümumilikdə dünya ərazisinin 1 faizə qədəri, ticarət dövriyyəsinin 2,4 faizini Türk Dövlətləri Təşkilatına üzv ölkələr əhatə edir. Türk dövlətləri böyük iqtisadi potensiala, enerji resurslarına, nəqliyyat yollarına və müasir hərbi imkanlara malikdir.
Hazırda Orta Dəhlizlə yükdaşımaların həcmi nəzərəçarpacaq dərəcədə artmaqdadır. Bu artım Azərbaycanın da həmin ölkələrlə iqtisadi əlaqələrinə öz təsirini göstərib. Azərbaycanla Türk dövlətləri arasında ticarət dövriyyəsi əvvəlki illərlə müqayisədə 70 faiz artıb. Türk Dövlətləri Təşkilatının Şuşada keçirilən 10-cu Zirvə görüşü üzv dövlətlər arasında iqtisadi əməkdaşlıq əlaqələrini daha da möhkəmləndirəcək. Bunun da Avrasiyanın geosiyasi mənzərəsinə mühüm təsiri olacaq".
Məhəmmədəli QƏRİBLİ
