Elnur Kəlbizadə: "Azərbaycan Prezidenti İlham Əliyevin bu il bayram tonqalını Xankəndi şəhərinin mərkəzi meydanında yandırmasının, eyni zamanda həmin meydanı "Zəfər meydanı" adlandırmasının böyük rəmzi və siyasi mənası var"
Xanın kəndinin - Xankəndinin yeni tarixi dövrü başlayıb. Zəfərimizin yekun simvoluna çevrilən Xankəndidə indi başqa ab-hava var. Bu ulu yurd yerimiz kərpiç-kərpic yenidən hörülür, yenidən qurlur. Tarixi ədalətin bərpa edilməsi nəticəsində separatçıların bütün tör-töküntüləri, heykəlcikləri, qondarma tikililəri cəhənnəmə göndərilir, şəhərimizin tarixi siması özünə qaytarılır.
Bundan böyük səadətmi var?! Tarixi ədalətin təntənəsi həm də odur ki, Azərbaycan Prezidenti Xankəndidə bayram tonqalı yandırdı, tonqal ətrafından mesajlar verdi, eyni zamanda da Xankəndinin mərkəzi meydanına "Zəfər meydanı" adı verdiyini elan etdi. Novruz bayramı münasibətilə Azərbaycan xalqına təbrikində Prezident İlham Əliyev deyib: "Uzun illər ərzində bu meydan və bu bina separatçıların yuvası idi... Məhz bu meydanda xalqımıza qarşı çirkin planlar hazırlanırdı. Məhz bu binada Xocalı soyqırımının törədilməsi üçün əmrlər verilmişdir. Bu gün isə biz bu meydanda dayanmışıq. Əziz xalqıma bildirmək istəyirəm ki, bu meydana mən "Zəfər meydanı" adı vermişəm, bundan sonra bura Zəfər meydanıdır".
"Bu meydandan İlham Əliyevin hələ bir çox zəfərlərin müjdəsini verəcəyinə əminik"
AMEA-nın Qafqazşünaslıq İnstitutunun Ermənişünaslıq şöbəsinin müdiri, dosent Elnur Kəlbizadə "Bakı-Xəbər"ə şərhində bildirdi ki, Prezident İlham Əliyev tərəfindən Xankəndinin mərkəzi meydanın "Zəfər meydanı" adlandırılmasının tarixi və mənəvi əhəmiyyəti böyükdür, bunun rəmzi mənası var. "Azərbaycan Prezidenti İlham Əliyevin bu il bayram tonqalını Xankəndi şəhərinin mərkəzi meydanında yandırmasının, eyni zamanda həmin meydanı "Zəfər meydanı" adlandırmasının böyük rəmzi və siyasi mənası var. Prezident sözün həqiqi mənasında Xankəndi şəhərinin mərkəzi meydanında tonqala od vurdu, həmçinin sözün məcazi mənasında bütün işğalçı, terrrorçu təfəkürrlülərə və onların dünyadakı "böyük himayədarlarına" öz fəaliyyəti ilə od qoyub. Əgər bizi qələbəyə aparan yol, Şuşaya gedən yol cənab Prezident tərəfindən "Zəfər yolu" adlandırılbsa, Azərbaycanın tam qələbəsinin, düşmənlərin başının tamamilə əzildiyinin elan edildiyi meydanın "Zəfər meydanı" adlandırılması tamamilə məntiqlidir, tamamilə qanunauyğundur. Biz əminik ki, Azərbaycana zəfər nə qədər yaraşırsa, Müzəffər Ali Baş Komandan ifadəsi Cənab Prezidenti nə qədər dəqiqliklə ifadə edirsə, Xankəndiyə də "Zəfər meydanı" o qədər yaraşır, o meydanı bu qədər dəqiqliklə ifadə edir"-deyə E.Kəlbizadə qeyd etdi.
Mütəxəssis bunun xalqımız üçün xeyirli-uğurlu olmasını dilədi. "Bu meydandan, eləcə də işğaldan azad edilmiş ərazilərimizdə, şəhər və rayon mərkəzlərində mövcud olan digər meydanlardan Ali Baş Komandan İlham Əliyevin hələ bir çox zəfərlərin müjdəsini verəcəyinə əminik".
E.Kəlbizadə vurğuladı ki, Xankəndinin tamamilə yeni bir tarixi dövrü başlayıb və biz qarşıdakı zamanda bir çox uğurlara, zəfərlərə şahidlik edəcəyik.
İradə SARIYEVA
