Daşdəmir Əliyev: "Belə bir təəssürat yaranır ki, Azərbaycan qəsdən təxribata çəkilir"
Ermənistanın ərazi bütövlüyü və suverenliyi pozulacağı təqdirdə Avropa Birliyi buna reaksiya verəcək. Bu sözləri AB-nin xarici əlaqələr və təhlükəsizlik siyasəti üzrə rəsmi nümayəndəsi Piter Stano erməni mediasına deyib.
Onun sözlərinə görə, AB Ermənistana hücumun olmayacağına, danışıqlar zamanı bütün təhdidlərin aradan qaldırılacağına inanır.
"AB-nin qırmızı xətti və Azərbaycana qarşı sanksiyaların tətbiqi üçün məcburi şərt nədir" sualına Stano belə cavab verib:
"Biz hər şeyi həll edən yeganə sehrli çubuq kimi yalnız sanksiyalara diqqət yetirə bilmərik. AB sanksiyalarının tarixinə nəzər salsaq görərik ki, biz adətən son çarə olaraq onlara müraciət edirik. Sanksiyalar 27 üzv dövlətin əlində bir alətdir və onlar əvvəlcə bir araya gəlib yekdil qərar qəbul etməlidirlər.
Sanksiyalar özlüyündə bütün problemlərin həlli deyil. Bu, AB-nin problemlərin həlli, təhdid və çağırışların aradan qaldırılması üçün istifadə etməyə üstünlük verdiyi digər alətlərlə birlikdə dəstəkləyici tədbirdir.
Sanksiyalar həmişə bizim istifadə etdiyimiz digər vasitələrlə birlikdə istifadə olunur. Biz adətən bütün digər vasitələr istənilən nəticələrə gətirib çıxarmayanda sanksiyalar tətbiq etməyə başlayırıq".
Stano qeyd edib ki, AB yeni tərəfdaşlıq çərçivəsində Ermənistana onun təhlükəsizliyini təhdid edən şəraitdə daha güclü və istənilən problemə qarşı daha davamlı olmağa kömək edəcək.
Avropa rəsmisi deyir ki, Ermənistanın təhlükəsizliyinin təminatı üçün qoşunlar sərhəddən geri çəkilməlidir, arada neytral ərazi yaradılmalıdır. Azərbaycan öz ərazisindəki qoşunu niyə geri çəkməlidir? O, həmçinin qeyd edir ki, Avropa Birliyi ilə Ermənistan arasında yeni əməkdaşlıq sazişinin imzalanması istiqamətində işlər gedir. Qeyd olunur ki, Ermənistanın müdafiə və təhlükəsizliyinin gücləndirilməsi istiqamətində razılaşma var. Ermənistan indiyə qədər işğalçı ölkə olub. Belə ölkəni Avropa Birliyi hansı məqsədlə daha da silahlandırmaq istəyir?
Hərbi-siyasi şərhçi, ehtiyatda olan polkovnik-leytenant Daşdəmir Əliyev "Bakı-Xəbər"ə açıqlamasında bildirdi ki, Rusiyanı bu bölgədən sıxışdıraraq Ermənistanda hərbi mövcudluqlarını təmin etmək üçün səbəb axtarırlar: "Görünür, İrəvanda da bu istəkləri dəstəkləyirlər. Bunu Paşinyanın Moskvanın aparıcı rol oynadığı KTMT-də Ermənistanın iştirakının dondurulması ilə bağlı son bəyanatı da sübut edir. Azərbaycan öz ərazi bütövlüyünü bərpa etmə problemini həll edib. Düzdür, daha səkkiz kənd Ermənistanın nəzarətindədir. Lakin Ermənistan konstruktiv mövqe tutsa, onların azad edilməsi məsələsi sərhədin delimitasiyası zamanı həll oluna bilər. Digər tərəfdən, Ermənistanın hazırda Azərbaycanla müharibə aparmaq gücü yoxdur. Ermənistandan daha böyük hərbi təhdidlər gələrsə, o zaman Azərbaycan onları dayandırmaq üçün ciddi cavab verə bilər. Avropa Birliyinin bu cəhdlərinə bir ad vermək olar: Ermənistanı silahlandırıb gücləndirməklə revanşa hazırlamaq. Avropa rəsmisinin etdiyi təkluflərin hamısı Ermənustanın mənafeyinə hesablanıb. Qoşunların güzgü prinsipi ilə geri çəkilməsini Etmənistan da tələb edirdi, biz buna rədd cavabı vermişik. Belə cıxır ki, Avropa Birliyi açıq şəkildə Ermənistana vəkillik edir. Belə mövqe sülhə təhdiddir. Əksinə, bölgədə müharibə risqini artırır. Nikol Paşinyan Fransaya səfər etdi və Azərbaycanı "müharibəyə hazırlaşmaqda" ittiham etdi. Bundan dərhal sonra Fransanın müdafiə naziri Ermənistana gəldi və bu ölkəyə hərbi yardımı artıracağını, təchizatı artıracağını, ona raket sistemləri ötürəcəyini vəd etdi. Bunun ardınca Azərbaycan mövqeləri atəşə tutulub, amma rəsmi Bakı buna cavab verməyib. Belə bir təəssürat yaranır ki, Azərbaycan qəsdən təxribata çəkilir".
Məhəmmədəli QƏRİBLİ
