İran ABŞ-ın istənilən hücumuna cavab olaraq Dieqo Qarsiyadakı ABŞ-Böyük Britaniya hərbi dəniz bazasını vuracaq. Bunu ABŞ prezidenti Donald Trampın İranın nüvə proqramı ilə bağlı ABŞ-la razılığa gəlmədiyi təqdirdə hərbi addım atacağı ilə hədələməsindən sonra yüksək rütbəli iranlı hərbi rəsmi “The Telegraph”a deyib.
“İran bölgədəki hər hansı bazadan və ya İran raketlərinin mənzilindəki bölgələrdən hücuma məruz qalacağı təqdirdə Britaniya və ya Amerika qüvvələrini hədəfə almaq arasında ayrı-seçkilik etməyəcək”, - deyə rəsmi qəzetə bildirib.
İran dövlət mediası həmçinin bildirib ki, ABŞ İran xalqına qarşı düşmənçilik edərsə, Çaqos adalarındakı Dieqo Qarsiya bazası raketlər və intiharçı pilotsuz təyyarələrlə vurulacaq.
İran dövlət mediası hökumət rəsmilərinə istinadən bildirib ki, İranın öz ərazisindən belə bir hücum təşkil etmək üçün kifayət qədər silahı var, buna ən yaxşı nümunələr orta mənzilli “Khorramshahr” raketlərinin daha yeni versiyaları və 4000 km mənzilli “Şahid-136B” kamikadze pilotsuz təyyarələridir.
“Teleqraf” yazır ki, belə bir ssenaridə bombardmançı çox güman ki, Dieqo Qarsiyadan havaya qalxacaq və bununla 3800 km uzaqlıqdakı bazanı İranın cavab əməliyyatları üçün hədəfə çevirəcək.
Britaniya hökumətinin sözçüsü isə İranın təhdidlərini ən sərt şəkildə qınadıqlarını deyib: “Böyük Britaniya hökuməti gərginliyin azaldılmasını təşviq etmək üçün regiondakı tərəfdaşları ilə işləməyə davam edir. Dieqo Qarsiyadakı baza Böyük Britaniya və ABŞ-ın təhlükəsizliyi üçün həyati əhəmiyyət kəsb edir və regional və beynəlxalq təhlükəsizliyin təmin edilməsində mühüm rol oynayır."
Dieqo Qarsiya Çaqos arxipelaqının ən böyük adasında yerləşir. 1970-ci illərdən bəri ABŞ-Böyük Britaniya birgə obyekti olan bazada əsgərlər və mülki adamlardan ibarət təxminən 4000 ABŞ və Britaniya personalının olduğu düşünülür.
Qeyd edək ki, Tramp vəzifəyə qayıtdıqdan sonra yenidən İrana qarşı “maksimum təzyiq” siyasətinə başlayıb. Bu siyasət İranın nüvə silahı əldə etməsinin qarşısını almaq və neft ixracını sıfıra endirmək məqsədi daşıyır. Eyni zamanda o, İslam rejimi ilə sürətli “nüvə sülh sazişi”nin bağlanmasına çalışır.
ABŞ prezidenti xəbərdarlıq edib ki, Tehran nüvə sazişini qəbul etməsə, onun başına “çox pis şeylər gələcək”. Xamneyiyə məktub göndərdiyini açıqlayan Tramp İranı açıq şəkildə təhdid edib: “Bir qərar verməlisiniz, ya danışıb həll edəcəyik, ya da İranın başına çox pis şeylər gələcək”.
TAHİR
