Avropa Parlamentinin deputatları Qarabağda antiterror tədbirləri keçirən Azərbaycana qarşı sanksiya tətbiqini tələb edirlər. Parlamentarilər Devid MakAllister, Marina Kalyurand, Andrey Kovatsev, Jelyana Zovko Azərbaycanın Qarabağakı addımlarını qəti şəkildə pisləyən bəyanat yayıblar:
“Günün əvvəlində bildirilən mina partlayışlarında insan itkisinə görə təəssüflənir və həlak olanların ailələrinə başsağlığı veririk. Lakin bu, heç bir halda Azərbaycanın genişmiqyaslı hərbi eskalasiyasına haqq qazandırmır. Partlayışlardan bir neçə saat sonra və həftələr ərzində müşahidə olunan Azərbaycan ordusunun güclənməsindən sonra bütün təmas xətti boyunca açıq şəkildə əvvəlcədən planlaşdırılmış hücum həyata keçirməsi tamamilə qəbuledilməzdir”.
Bəyanatda bütün hərbi əməliyyatların dərhal dayandırılmasına çağırış edilir. Bildirilir ki, Bakı ilə Xankəndi arasında birbaşa danışıqlar Qarabağ erməniləri ilə Azərbaycanla Aİ arasında münasibətlərdə irəliləyişə nail olmağın yeganə yoludur və bu prosesi həmişə dəstəkləməyə hazırdırlar:
“Davam edən hücumun dərhal dayandırılmaması şəraitində, biz Şuranı Aİ-nin Azərbaycanla münasibətlərinə bu kontekstdə əsaslı şəkildə yenidən baxmağa və məsul Azərbaycan rəsmilərinə qarşı sanksiyaların tətbiqini nəzərdən keçirməyə çağırırıq”.
Göründüyü kimi, Avropa Parlamenti növbəti qərəzli mövqeyini ortaya qoyaraq, açıq şəkildə ermənipərəst mövqedən çıxış edir.
Avropa Parlamentinin bu qərəzli mövqeyi ilə bağlı ekspertlər nə düşünür?
Politoloq Yeganə Hacıyeva “Bakı-Xəbər”ə açıqlamasında bildirdi ki, Avropa Parlamentinin hər hansı ölkəyə sanksiya tətbiqi ilə bağlı çağırışlar etmək təşəbbüslərinə çox rast gəlinir: “Çünki həmin təsisat Avropa İttifaqına daxil olan ölkələrin siyasi qurumları tərəfindən formalaşır. Onun bəyanatları tövsiyə xarakterlidir. Belə təşəbbüslə onlar Avropa Birliyi ölkələri qarşısında çıxış edə bilər. Parlament Avropa Birliyinin beş əsas orqanından biridir. Avropa Biriliyinin Azərbaycana qarşı sanksiyalara nail olması üçün bir mexanizmi var. Bu da Avropa Komissiyadır. Bu qurum isə qərarlarını siyasətçilərin çağrışlarına görə deyil, ümumi dəyərləndirmə əsasında verir. Onu da qeyd edim ki, Avropa Birliyi ölkələri Komissiya səviyyəsində Azərbaycanla Avropa Birliyindən daha çox əməkdaşlıq edir. Avropa Parlamentində bizə qarşı olan bu aktivlik Soros şəbəkəsindən qaynaqlanır. Bizə qarşı bu çağırışı edənlər Soros şəbəkəsinin tanınan simalarıdır. Əsas sifarişçi kimi isə Avropadakı erməni lobbi qruplarının federasiyası çıxış edir. Əksəriyyəti də Karampetyanın maliyyəsi əsasında fəaliyyət göstərir. Parlamentdəki sayları 28 nəfərdir. Bu, belə həssas məqamda bizə yönəlik təzyiqin bir elementidir. Ancaq bu addımı ilə Avropa Parlamenti beynəlxalq hüququn əleyhinə gedir. Çünki Azərbaycan tam qanuni əsaslarla, beynəlxalq hüququ pozmadan öz ərazisində antiterror tədbirləri həyata keçirir. Belə mötəbər strukturda edilən bu cür çağırışlar birbaşa beynəlxalq hüquqa qarşıdır. Biz bu addımlarımızla həm də regionun təhlükəsizliyini təmin edirik. Çünki Avropanın özünü təmin edən bir çox logistik yollar məhz bizim ərazimizdən keçir. Regionda mövcud olan separatizm həmin layihələr üçün ciddi risq amili yaradır. Ancaq Avropanın korrupsiyaya qurşanmış deputatları üçün aldıqları aylıq paketlər daha vacibdir. Sifarişi verən Karampetyanın adı Avropada kriminal aləmin “xaç atası” kimi keçir. Belə bir çirkli fəaliyyət göstərən adamın maliyyəsi əsasında Avropa Parlamenti özünü gülməli vəziyyətə salır. Çox maraqlıdır ki, 30 il ərzində ermənilərin bizə qarşı törətdikləri ağır və bəşəriyyət əleyinə olan cinayətlərə Avropa Parlamenti heç belə oparativlik sərgiləmədi”.
Qeyd edək ki, sentyabrın 19-da gecə Daxili İşlər Naziliyinin 4, Azərbaycan Avtomobil Yolları Dövlət Agentliyinin isə 2 əməkdaşı Qarabağda minaya düşərək həlak olub. Bu barədə Daxili İşlər Nazirliyi, Dövlət Təhlükəsizliyi Xidməti və Baş Prokurorluq birgə məlumat yayıb. Dövlət Təhlükəsizliyi Xidmətinin başlatdığı cinayət işində isə hər iki hadisə “terror aktı” kimi təsnif edilib.
Məhəmmədəli QƏRİBLİ
