Məhərrəm Zülfüqarlı: “Ordumuz Ermənistana girib irəliləyə bilərdi, amma biz regionda daimi qarşıdurma istəmirdik”
IV Şuşa Qlobal Media Forumunun açılış mərasimində çıxış edən Prezident İlham Əliyev deyib ki, 44 günlük Vətən müharibəsində biz müharibəni sonsuz etməmək üçün dayandıq:
“1990-cı illərin əvvəllərində torpaqlarımız işğal olundu və bundan sonra biz münaqişəni sülh yolu ilə həll etməyə çalışdıq. Lakin bu, mümkün olmadı. Sonra biz suverenliyimizi bərpa etmək üçün gücdən istifadə etdik. Biz buna nail olduq və daha irəli getmədik. Biz dayandıq və bu, çox vacib idi. Düşünürəm ki, silahlı qarşıdurmanın ən qızğın mərhələsi başa çatdıqdan sonra ən vacib məqamlardan biri məhz vaxtında dayanmağı bacarmaqdır. Bu, asan deyil və biz bunu yaxşı anlayırıq. Biz 30 il qəlbimizdə bu yara ilə yaşamışıq. Lakin dayanmalı olduğumuz anda dayandıq. Biz müharibəni sonsuz etməmək üçün dayandıq. Başqa seçimlərimiz də ola bilərdi. Lakin məsuliyyət və müdriklik tələb edirdi ki, biz dayanaq. Çünki dayanmasaydıq, Ermənistanla müharibə davam edəcəkdi. Bəlkə də aşağı intensivliklə davam edən bir müharibəyə çevriləcəkdi”.
Sözügedən məsələni baki-xeber.com-a şərh edən tarix elmləri doktoru, professor Məhərrəm Zülfüqarlının fikrincə, Prezident İlham Əliyev bu məsələni müxtəlif forumlarda, müxtəlif formada deyib: “Dünya artıq Azərbaycanın haqq işini qəbul edib. Ancaq bunun asan başa gəlmədiyini də dəfələrlə qeyd etmək lazımdır ki, Azərbaycan nəyə görə öz ərazi bütövlüyünü güc yolu ilə həll etdi. Ərazilərimizin 20 faizi işğal altında olanda ATƏT-in Minsk qrupunun 3 həmsədri - Rusiya, ABŞ və Fransa bizə təlqin edirdilər ki, münaqişə yalnız sülh yolu ilə həll edilməlidir. Hətta 2001-ci ildə Azərbaycanla Ermənistan Avropa Şurasına daxil olarkən tələb edildi ki, məsələnin sülh yolu ilə həlli ilə bağlı tərəflər öhdəlik götürsünlər. Lakin bu sülh yolu ilə həll məsələnin dondurulmasına və ərazi bütövlüyümüzün bərpa olunmasının qarşısının alınmasına xidmət edirdi. Yəni həmsədrlər turist kimi gəlib-gedirdilər, vaxtı uzadırdılar və bizə işğalla barışmağı tövsiyə edirdilər. Get gedə bizi inandırmağa çalışırdılar ki, artıq bu məsələ həll olunub. Yəni işğalla, reallıqla barışmaq lazımdır. Prezident başda olmaqla xalqımız bununla heç vaxt barışmadı. Bizə güc yolu ilə ərazi bütövlüyümüzü bərpa etdik. Bəli, Azərbaycan Ordusu Ermənistana da daxil olub irəliləyə bilərdi, amma biz regionda daimi qarşıdurma istəmirdik. Azərbaycan beynəlxalq hüquqa hörmət edən dövlətdir. Qəribəsi odur ki, Qarabağ münaqişəsinin memarı olan, bilavasitə millətlərarası münaqişəni qızışdıran Rusiya bu məsələdə hər zaman qızışdırıcı rol oynayıb. İndidə bu rolu oynamaqdadır”.
M. Zülfüqarlı onu da qeyd etdi ki, Foprmda Prezident Əliyevin bir daha tarixə nəzər salaraq Azərbaycanın Çar Rusiyası dövründə və ondan sonra işğal olunduğunu qeyd etməsi önəmli məqam idi: “Bu, yenə də reallığı qəbul etmək istəməyən, öz yalanlarına inanan Rusiya KİV-ləri tərəfindən təpki ilə qarşılandı. İndi də onlar o yalanlara inanırlar ki, guya Rusiya heç yeri işğal etməyib, insanlara xoşbəxtlik gətirib və s. Halbuki, bu, belə deyildi. Başqa bir tərəfdən SSRİ dağılanda müttəfiq respublikalar hamısı müstəqilliyini elan etdi. Rusiya da müstəqilliyini elan etdi. Guya Rusiya da SSRİ-dən əzab çəkib. Ancaq bu, bir riyakarlıq idi. Rusiyanın müstəqilliyini elan etməkdə məqsədi MDB-ni yaradıb yenidən SSRİ-ni bərpa etmək idi. Bu da Rusiya siyasətinin bir nümunəsi idi ki, indidə biz bunun nəticələrini görürük”.
Vidadi ORDAHALLI
