İlqar Hüseynli: “Özəl klinikada ciddi, böhranlı problemlər yaşanır”
Son vaxtlar bəzi özəl klinikalarda baş verdiyi iddia edilən məsələlər mediada və sosial şəbəkələrdə geniş müzakirə olunur. Mətbuatda və sosial şəbəkələrdə "Vitali" Klinikasında ölən körpəni zirzəmiyə atdıldığı, "Bİoloji təbabət" Klinikasında birdəfəlik şpirislərin bir neçə dəfə istifadə edildiyi haqda söyləntilər var.
Sosial şəbəkələrdə yayılan ölü doğulan körpənin zirzəmiyə atılması iddiası ilə bağlı Səhiyyə Nazirliyi və hüquq-mühafizə orqanları tərəfindən rəsmi araşdırmalara başlanılıb.
"Vital Hospital"ı ilə bağlı sosial şəbəkələrdə yayılan videoda (körpənin atası tərəfindən paylaşılan) ölü doğulan körpənin morqa təhvil verilməyərək zirzəmiyə atıldığı iddia edilib. Səhiyyə Nazirliyinin Analitik Ekspertiza Mərkəzi məsələni nəzarətə götürmüş və hüquq-mühafizə orqanlarının məlumatlandırıldığını bildirmişdir. “Vital Hospital”da ölü doğulan körpə zirzəmiyə atılıb? Bu məlumatla bağlı rəsmi təhqiqat davam edir.
"Bioloji Təbabət Klinikası"nda birdəfəlik şprislərdən bir neçə dəfə istifadə edildiyi ilə bağlı iddiaya gəlincə, klinikanın rəsmi mövqeyinə görə, səsləndirilən bu iddialar həqiqəti əks etdirmir. Müəssisə bütün tibbi prosedurların, o cümlədən iynə və şprislərin sanitar-gigiyena qaydalarına, eləcə də beynəlxalq infeksiya nəzarəti prinsiplərinə uyğun aparıldığını rəsmi açıqlamalarında bildirilib.
Çox maraqlıdır, son dövrlər özəl klinikalarda qarşı belə ittihamlar çoxalıb.
Bu nədən qaynaqlanır? Vətəndaşlar nə qədər haqlıdır? Deyilən neqativlər niyə var?
Sosial sahə üzrə ekspert İlqar Hüseynli baki-xeber.com-a bildirdi ki, bu kimi məsələlər ümumiyyətlə bir qədər araşdırma tələb edən məsələlərdir. “Biz sadəcə olaraq sosial şəbəkələrdə yayılan süjetləri, informasiyalar görə bilirik. Amma işin faktiki nədən ibarət olduğununu, nə qədər əsaslandırılmış bir informasiya olduğunu ölkənin müvafiq strukturları, Səhiyyə Nazirliyi, o cümlədən, prokurorluq, məhkəmə orqanları araşdırıb üzə çıxarmalıdır. Yəni, insanlar üzləşdiyi problemlərlə bağlı həm Səhiyyə Nazirliyinin qaynar xəttinə, sonra gərəkirsə prokurorluğa bununla bağlı yazılı müraciət və şikayət etməlidirlər. Təcili olaraq bu istiqamətdə qaynar xəttin məlumatları , o cümlədən prokurorluğa verilmiş informasiyalar, məktublar, şikayət əsasında araşdırma, təhqiqat işləri aparılmalıdır. Söz yox ki, özəl klinikada ciddi, böhranlı problemlər yaşanır. İstər pasientlərin özəl klinikada maddi olaraq kifayət qədər vəsait xərclənməsi, yəni xidmətlərin həddən artıq baha olması məsələləri, istər müəyyən texniki çatışmazlıq, avadanlıqların yetərincə olmaması, reanimasiya xidmətlərinin ümumiyyətlə çox dəhşətli bir vəziyyətdə olması mövcuddur. Xeyli özəl klinikalar var ki, onların böyük əksəriyyətində reanimobilin olmaması halları mövcuddur. Yəni ağırlaşma hallarında vətəndaşların normal klinikalara evakuasiya etmək üçün reanimobilin olmaması kimi çox ciddi faktlar var. Məsələn, elə özəl klinikalar var ki, hətta onların icazə verilən fəaliyyətləri içərisində bəzi tibbi xidmətlərin olmamasına baxmayaraq, onlar həmin tibbi xidmətləri yerinə yetirirlər. Məsələn, onkoloji xidmətləri yerinə yetirirlər. Öz zirzəmilərində onkoloji xidmət üçün ayrıca otaqları ayrılıb orada kimyəvi terapiya işlərini həyata keçirirlər. Doğum şöbələri olmadığı halda doğum, müxtəlif abortlar və digər tibbi prosedurları həyata keçirilir. Yəni bu cür faktorlar çoxdur. Amma o ki, qaldı konkret olaraq Bioloji Təbabət klinikasında birdəfəlik şprislərin bir neçə dəfə istifadə olunmasına bu bir qədər inandırıcı görünmür. Niyə inandırıcı görünmür? Çünki tibbi şprislər çox da maliyyə vəsaiti sərfiyyatı tələb edən tibbi vasitə deyil ki, kifayət qədər maliyyə imkanına, ölkədə tanınmış bir klinika belə bir addım atsın. . Hətta Bioloji Təbabət klinikasının rayonlarda da filialları var. Yəni, hətta bu klinika şəbəkələşmiş bir klinika olduğu halda 5-10 qəpiklik birdəfəlik şprisin təkrar bir neçə dəfə istifadə edilməsi iddiası məncə, yanlışdır. Çünki düşünmürəm ki, o boyda adı-sanı, hörməti, maddi imkanları olan bir klinika özünü ora qədər endirsin ki, hətta birdəfəlik şprisləri bir neçə dəfə istifadə etsin. Yəni ola bilsin ki, belə bir ehtimallar var. Tutaq ki, hansısa bir virus qapan xəstənin sahibləri bunu onunla əlaqələndirirlər ki, bu bir neçə dəfə istifadə olunub birdəfəlik şprislərdən olub.
Panik vəziyyətdə belə bir əsəbi fikir səsləndirirlər və bu da nəticədə dərhal mətbuatın gündəminə düşər. Yaxud da ki, elə insanlar özləri sosial şəbəkələrdə yayar. Amma məsələ burasındadır ki, pasientə iynə vurularkən, hansısa tibbi xidmət göstərilərkən o anda onun özü və yalnız ona xidməti göstərən tibb bacısı və yaxud da ki, həkim müşahidəsi altında olur, iştirakçı olur. Yəni bunun kənara çıxması mənə elə gəlir ki, bir qədər inandırıcı görünmür. Bu mənim nöqteyi-nəzərimdən belədir. Ona görə də bu məsələlər araşdırılmalıdır.
Digər bir özəl klinikada zirzəmiyə körpə uşağın atılması iddiası var və əgər doğrudan da fakt təsdiqini tapırsa, bu cinayətdir. Amma bir məsələ var ki, xəstə, xəstəlik varsa xəstəliyin nəticəsində ağırlaşması hallarında ölüm faktları da ola bilər. Körpə uşağa tibbi xidmət göstərirlər və onu həyata qayıtarmaq mümkün olmadığı halda ola bilər ki, xəstəxananın zirzəmidə kiçik bir morq qurmaq imkanı olar və vəfat etmiş insanın sahibləri gələnə qədər onu orada saxlaya bilərlər. O zaman vəfat etmiş körpənin sahiblərində elə bir təəssürat yarana bilər ki, onu “podvala” atıblar. Niyə atsınlar? Yəni əgər ittiham varsa, onun əks argumentini də ədalətli və doğru dəyərləndirməlisən ki, burada hansı qəsd- qərəzlilik, hansı düşmənçilik faktorları rol oynamalıdır ki, bir insanın övladı, körpə uşağı klinikada dünyasını dəyişər və klinika da götürüb onu “podvala” ata. “Podvala” atmaz. Yəqin ki, orada morq tipli bir şərait yaradarlar, orada yerləşdirərlər və xəstənin sahibi gəldikdə onu aşağıdan qaldırarkən xəstə sahibində elə bir təəssürat yaranar ki, bunu “podvala” atıblar. Klinikaların quraşdırılmış kameralar var, sübut imkanları varsa həmin klinikaların özləri materialları ortaya qoymalıdırlar və sübut etməlidirlər ki, bu doğrudan da onlara atılan hansısa bir böhtanmı və yaxud ki nədir? Birbaşa olaraq bu faktlar, sosial şəbəkələrdə yayılmış görüntülər istər Səhiyyə Nazirliyi tərəfindən, istər Prokurorluq və güc orqanları tərəfindən nəzarətə götürülməlidir, tədqiqat aparılmalıdır və yekun olaraq əgər ortada sübut materialı varsa cinayət işləri başlanılmalıdır. Yəni bunun həlli yolu, tətbiq oluna biləcək cəza mexanizmləri bundan ibarət olmalıdır”-deyə İ.Hüseynli qeyd etdi.
İradə SARIYEVA
