Rusiya Xarici İşlər Nazirliyi Yaxın Şərqdəki münaqişənin həllinə kömək etməyə hazır olduğunu bildirib. Rusiya Xarici İşlər Nazirliyinin sözçüsü Mariya Zaxarova bildirib ki, Rusiya Yaxın Şərqdəki münaqişənin bütün tərəflərini silahlı münaqişənin genişlənməsinə səbəb ola biləcək hərəkətlərdən çəkinməyə çağırır və fikir ayrılıqlarının siyasi və diplomatik yollarla həll edilməsinin tərəfdarıdır.
Zaxarova Rusiya Xarici İşlər Nazirliyinin saytında dərc olunmuş şərhdə bildirib: "Təəssüflə qeyd edirik ki, Fars körfəzində gərginlik artır. Qarşı tərəflər qarşılıqlı hücumlar etməyə davam edir və bu da İran və ərəb dövlətlərində mülki infrastruktura böyük ziyan vurur. Hörmüz boğazında və Qırmızı dənizdə gəmiçiliyin pozulması riski artıb. Bu inkişaf edən vəziyyət ABŞ və İran arasında 17 iyunda imzalanmış İslamabad Memorandumuna əsasən danışıqlar prosesinin bərpasına yönəlmiş regional vasitəçilik səyləri üçün əlavə çətinliklər yaradır".
Bəyanatda deyilir: "Bu baxımdan, münaqişənin bütün tərəflərini məsuliyyətli yanaşma və təmkin nümayiş etdirməyə, silahlı münaqişənin genişlənməsinə və Yaxın Şərqdə hərbi-siyasi vəziyyətin daha da pisləşməsinə səbəb ola biləcək hərəkətlərdən çəkinməyə çağırırıq".
Rusiya XİN-dən bildirilib ki, mənfi ssenari beynəlxalq enerji və ərzaq təhlükəsizliyi üçün ciddi nəticələrə səbəb ola bilər:
"Biz dünyanın bu strateji əhəmiyyətli bölgəsində mövcud fikir ayrılıqlarının bütün regional dövlətlərin maraqlarını nəzərə alaraq siyasi və diplomatik vasitələrlə həll edilməsinin tərəfdarıyıq. Rusiya bu məqsədə çatmaq üçün lazımi köməyi göstərməyə hazırdır".
İradə SARIYEVA
