Təbriz Musayev: “Bu, ölkəmizin vacib güc mərkəzi kimi qəbul edilməsi deməkdir”
Prezident İlham Əliyev Almaniyanın Federal Kansleri Fridrix Merts ilə mətbuat konfransında Avropa İttifaqı ilə əlaqələrə toxunub.
Dövlət başçısı bununla bağlı deyib: “Bu il biz həm Avropa İttifaqı Şurasının Prezidenti cənab Koştanın, həm Avropa Komissiyasının Prezidenti xanım Fon der Lyayenin Azərbaycana səfərlərinin şahidi olmuşuq. Bu səfərlərin çox böyük siyasi mənası var. Bu, Avropa İttifaqı ilə Azərbaycan arasındakı əlaqələri daha da gücləndirəcək. Almaniya Avropa İttifaqına üzv olan ölkələr arasında lider olduğu üçün burada təbii ki, həm Almaniyanın rolu çox böyükdür, eyni zamanda, gələcək əməkdaşlıq üçün də əminəm ki, Almaniya öz səylərini göstərəcək”.
Maraqlıdır, “Bu səfərlərin çox böyük siyasi mənası var” deyəndə nə başa düşülür?
Sözügedən məsələni baki-xeber.com-a şərh edən İrəvan Azadlıq Təşkilatının sədri Təbriz Musayevin fikrincə, bu, o deməkdir ki, Avropa İttifaqı Azərbaycana xüsusi önəm verir: “Cənubi Qafqazda Azərbaycanın yerini, rolunu və əhəmiyyətini heç bir dövlət əvəz edə bilməz. Azərbaycan regionda yeganə dövlətdir ki, Mərkəzi Asiya ilə Avropanı əlaqələndirir. Azərbaycanın şimalında yerləşən Rusiya, cənubunda yerləşən İran müharibə vəziyyətindədir. Bu səbəbdən Avropa ilə Mərkəzi Asiya ölkələri, Çin arasında hava kolidoru Cənubi Qafqaz üzərindən təşkil edilir. Əsasən də Gürcüstan və Azərbaycanın hava məkanı üzərindən. Çünki Ermənistan region ölkəsi olsa da o qədər də etibarlı deyil. Ona görə ki, Ermənistanın hava məkanını orada yerləşən Rusiya hərbçiləri müdafiə edir. Aİ rəsmilərinin səfərləri ölkəmizin vacib güc mərkəzi kimi qəbul edilməsi deməkdir. Ölkəmizlə hesablaşmağın bir göstəricisidir. Bu, o deməkdir ki, Azərbaycan önəmli bir geosiyasi mərkəzdir. Təkcə enerji resursları ixrac edən ölkə yox, müstəqil siyasət yeridən, önəmli tranzit və logistika mərkəzidir. Bir daha təsdiq olundu ki, Azərbaycanın iştirakı olmadan hansısa layihənin həyata keçirilməsi mümkünsüzdür. Nəzərə almaq lazımdır ki, Azərbaycanın öz gücü hesabına ərazi bütövlüyünü və suverenliyini təmin etməsi, Rusiyanın Ukraynaya qarşı müharibəyə başlaması dünyada geosiyasi düzəni dəyişib. Tamamilə yeni konfiqurasiyanın, çağırışların ortaya çıxmasına səbəb olub. Belə bir şəraitdə qalib dövlət olaraq Azərbaycanın önəmi Avropa üçün hər keçən gün artır. Nəinki Avropa İttifaqı, Birləşmiş Ştatlar üçün də önəmi artmaqdadır”.
Vidadi ORDAHALLI
