Qərb dövlətləri Gürcüstanın Rusiya ilə dialoqu ilə bağlı ona açıq təzyiqlər edir. Bunu Rusiya Xarici İşlər Nazirliyinin MDB ölkələri üzrə dördüncü departamentinin direktoru Denis Qonçar TASS-a müsahibəsində deyib:
“Rusiya ilə Gürcüstan arasında nə uçuşlar, nə də ticari-iqtisadi əlaqələrin bütün digər komponentlərinin mövcud sanksiyalar rejimini pozmamasına baxmayaraq, Qərb ölkələri Tiflisə açıq təzyiq göstərirlər. Biz anti-Rusiya sanksiyalarının tətbiqi cəhdlərini suveren dövlətlərin daxili işlərinə və üçüncü ölkələrlə münasibətlərinə müdaxilə kimi qiymətləndiririk”.
O xatırladıb ki, Rusiya rəhbərliyi gürcü və rus xalqları arasında təmasları asanlaşdırmaq, humanitar və iqtisadi əlaqələri inkişaf etdirmək zərurəti əsasında Gürcüstanla birbaşa aviareysləri bərpa etmək və bu ölkə vətəndaşları üçün vizasız rejim tətbiq etmək barədə qərar qəbul edib. Qeyd edək ki, cari il mayın 10-da Rusiya prezidenti Vladimir Putin Gürcüstan vətəndaşları üçün viza rejiminin ləğvi haqqında fərman imzalayıb. Digər fərmanla o, 2019-cu ildən qüvvədə olan Rusiya aviaşirkətlərinin uçuşlarına və Gürcüstana turların satışına qadağa qoyulmasını ləğv edib. Rusiyanın “Azimut” aviaşirkəti mayın 19-dan, Gürcüstanın milli aviadaşıyıcısı “Georgian Airways” isə mayın 20-dən gündəlik uçuşlara başlayıb. Amma bu hal Qərbdə ciddi tənqidlərlə müşayiət olunur. Denis Qonçar bildirir ki, Gürcüstandan başqa, Qərb dövlətləri Ermənistanı da “çirkli üsullarla” şantaj edir, Rusiya ilə tərəfdaşlığa qarşı qızışdırırlar: “Bu gün Moskva ilə İrəvan arasında KTMT, Aİİ və MDB çərçivəsində, eləcə də müxtəlif beynəlxalq platformalarda, ilk növbədə, BMT-də “sıx xarici siyasət koordinasiyası” qurulub. İrəvanla münasibətlərdə bəzi neqativ məqamlardan danışsaq, bu, ilk növbədə Qərb ölkələrinin Rusiya-Ermənistan tərəfdaşlığına xələl gətirmək cəhdləri ilə bağlıdır. İstənilən üsullardan, o cümlədən tamamilə çirkli üsullardan istifadə olunur - sanksiyalar şantajı, ədalətsiz rəqabət kimi məqamlar burada qeyd oluna bilər”. O qeyd edib ki, hamı dünyanın müxtəlif yerlərində, o cümlədən postsovet məkanında Qərbin “dostluğunun” necə nəticələndiyini dəfələrlə görə bilər”: “Biz erməni dostlarımızın müdrikliyinə ümid edirik. Biz öz tərəfimizdən, əvvəlki kimi, bütün problemli məsələləri müttəfiqlik şəraitində, birbaşa və səmimi dialoq çərçivəsində həll etmək əzmindəyik”. Maraqlıdır ki, Gürcüstan və Ermənistandan fərqli olaraq, Rusiya tərəfi Qərbin Azərbaycana təzyiqindən heç bir söz açmır. Buna səbəb odur ki, Azərbaycana belə bir təzyiq də yoxdur. Ölkə tam müstəqil siyasət yürüdür və Qərblə də bərabərhüquqlu əməkdaşlıq qurur.
Daha bir vacib nüans odur ki, Rusiya özü də Gürcüstan və Ermənistanın Qərb siyasətində dəyişiklik istəyir. Bunun üçün Kremlin İrəvana təzyiqləri daha çox hiss edilir. Elə bu fonda Qərbin dəstəyi ilə Paşinyan iqtidarının Rusiyaya qarşı gedişlərinin miqyasının genişlənməsi müşahidə olunur. Ermənistan müxalifətinin təmsilçisi Arman Abovyan bunun ölkəsi üçün müsbət heç nə vəd etmədiyini qeyd edir: “Bu gün Nikol Paşinyanın hökumətin iclasındakı çıxışına münasibət birmənalı olmayıb. Bəzi siyasi qüvvələr Paşinyanın mövqeyini təftiş edib, onun Qarabağla bağlı mövqeyinə fərqli rakurslardan yanaşıblar. Paşinyanın hökumət iclasında növbəti çıxışı kifayət qədər standart idi. O, Qarabağı Azərbaycana təslim etməklə Ermənistanı qoruyacağını düşünür. Paşinyan elə güman edir ki, bunun müqabilində tərəflər sülhə nail olacaq. Bu prinsipin absurdluğu bir neçə dəfə təkzib edilib. Hökumətin iclasında səslənən yeni fikirləri necə xarakterizə edəcəyimi bilmirəm. Mən daha çox Paşinyanın Azərbaycan tərəfi ilə güc oyunu variantını nəzərdən keçirirəm. Xüsusilə, Paşinyan İlham Əliyevin Laçın dəhlizinin açıq olması ilə bağlı dediklərinə istinad edərək, Rusiyadan izahat tələb edib. Buna izahatı ruslar verməlidir? Bu, sadəcə dəlilikdir. Eyni zamanda bu, vəziyyətdən istifadə edib Rusiyaya qarşı gediş etməkdir”. Ermənistanın müdafiə nazirinin keçmiş müavini Artak Zakaryan isə qeyd edir: “Beynəlxalq normalar və hüquqlar dünya düzəninin dəyişməsi ilə paralel işləmir. Rusiya və İran Nikola güvənmir. Qərb Rusiyanı Cənubi Qafqazdan sıxışdırıb çıxarmaq, həmçinin İrana qarşı mümkün təcavüz üçün yeni platforma yaratmaq, Qarabağdan imtina etmək və Azərbaycanın tələblərinin imzalanmasını istəyir. Bu, Paşinyanın havada asılı olan gücünə qiymətdir. Hakimiyyətini xilas etmək üçün Nikol ölkəni birdəfəlik məhv etmək yolunu seçib. İndi Paşinyan Qarabağı kənara qoyub, İrəvan Ağsaqqallar Şurasına seçkilərlə məşğuldur. O, saxtakarlıq, şantaj və təzyiqlərlə həmin seçkilərdə qələbə qazanmağa hazırlaşır. Bundan sonra Paşinyan parlament seçkilərinə getməyi planlaşdırır. Güman edirəm ki, Nikol Qarabağı Azərbaycana vermək, türkləri Ermənistana gətirmək bahasına sülh müqaviləsi imzalamaq üçün xalqdan etimad səsi almağa çalışacaq. Bundan sonra Rusiya himayəsindən xilas olmaq asanlaşacaq. Qərb də elə bunu istəyir”.
Ermənistanda o da etiraf edilir ki, İrəvandan fərqli olaraq, Rusiyanın Azərbaycana təsir imkanları yoxdur. Bu səbəbdən Bakı Qərb və Rusiya arasında asanlıqla manevr edir.
Samirə SƏFƏROVA
