Ermənistanın baş naziri Nikol Paşinyan yenə Azərbaycanla sülh, münasibətlərin normallaşdırılması xüsusunda ziddiyyətli açıqlamalar verir. Məsələn, o, hökumətin iclasında çıxışı zamanı ölkəsinin Azərbaycanla sülhün bir-birinin ərazi bütövlüyünün tanınması əsasında bərqərar olmasına dair razılaşmaya sadiqliyini bildirir.
Amma Azərbaycanla razılaşmadan “humanitar yük” şousu təşkil etməklə, İrəvanın ölkəmizin ərazi bütövlüyünə qəsd cəhdindən əl çəkmədiyini də göstərir.
Elə hökumətin iclasında Paşinyan Ermənistanın Qarabağa göndərilmiş 360 tonluq humanitar yükünü Laçın dəhlizində saxlamamağa çağırıb. Bakı Ermənistan tərəfinin razılaşdırmadan Azərbaycan ərazilərinə “humanitar yük” adı altında avtomobil konvoylarını göndərməsini özünün ərazi bütövlüyü və suverenliyinə qəsd sayır və yükü haqlı olaraq Qarabağa buraxmır. Azərbaycan bu ayın əvvəlindən Laçın nəzarət-buraxılış məntəqəsindən keçidi bağlayıb, bunu Ermənistandan gələn Qırmızı Xaç maşınlarında müxtəlif növ qaçaqmal aşkarlanması ilə əsaslandırıb. Azərbaycan Xarici İşlər Nazirliyi (XİN) Paşinyanın hökumətin iclasında dediklərinə şərh açıqlayıb. XİN bildirir ki, Paşinyan Laçın sərhəd buraxılış məntəqəsinin fəaliyyəti, eləcə də ərazi bütövlüyü və delimitasiya məsələsində beynəlxalq ictimaiyyəti yanlış məcraya yönləndirməyə çalışır. XİN qeyd edir ki, Paşinyan sərhədlərin delimitasiyası üçün əsas kimi qəbul edilən sənədləri sadalayır, eyni zamanda Azərbaycana qarşı ərazi iddialarını davam etdirir, qondarma rejimi təbliğ edir, bununla da ölkəsinin ərazi bütövlüyü və suverenliyə, eləcə də delimitasiya prosesinə sadiq olmadığını ortaya qoyur. Azərbaycanın haqlı mövqedə olduğunu Ermənistanda etiraf edənlər də az deyil. Məsələn, erməni fəal İşxan Verdyan Baku TV-yə açıqlamasında bildirib ki, şərti sərhəddəki humanitar karvanla bağlı məsələ təxribatdır. O qeyd edib ki, Paşinyan orada guya darda olan insanlara kömək etmək istəsəydi, bunu daha asan yolla əldə edə bilərdi: “Bunun üçün rəsmi şəkildə Azərbaycana müraciət edərək, humanitar yükün Qarabağa çatdırılmasını xahiş etmək lazım idi”. Hazırda Humanitar yardım” gətirilməsi adı ilə bu ölkədən yük daşıyan avtomobil karvanı “Laçın” dövlət sərhədindəki buraxılış məntəqəsinin qarşı tərəfdən olan girişində dayanıb. Xatırladaq ki, Qarabağ iqtisadi rayonunda yaşayan erməni əhaliyə Azərbaycan tərəfi ilə razılaşdırılmadan “humanitar yük” daşıyan avtomobil karvanı iyulun 26-dan etibarən “Laçın” dövlət sərhədindən buraxılış məntəqəsinin qarşı tərəfindəki aşırımda dayanıb. Avqustun 2-də Azərbaycanın Qarabağ iqtisadi rayonuna hərəkət etmək istəyən daha iki yük avtomobili digərlərinin dayandığı əraziyə gəlib. Bununla da avtomobil karvanındakı nəqliyyat vasitələrinin sayı 21-ə çatıb. Hərbi ekspert Ədalət Verdiyev qeyd edir ki, Ermənistanın bütün təxribatçı səyləri müəyyən nəticələrə hesablanıb və bölgədə gərginliyi artırmağa çalışdığını bir daha göstərir. Bu, eyni zamanda, psixoloji təsirə hesablanmış addımlardır: “Avropanın bir neçə ölkəsinin və Ermənistan ərazisində maraqları olan digər dövlətlərin diplomatik nümayəndəliklərinin əməkdaşları, Avropa İttifaqı missiyasının rəhbər heyəti həmin ərazilərə gələrək, sanki Azərbaycana qarşı bəyanat verməyə çalışırlar. Bugünədək Azərbaycan ərazilərini işğal altında saxlayan Ermənistan niyə humanitar yardım üçün təklif olunan marşrutla deyil, öz seçdiyi marşrutla getməyə israr edir? Axı, biz hansısa ölkəyə gedəndə sərhəd-buraxılış məntəqəsini özümüz seçmirik. Ümumilikdə, Azərbaycan beynəlxalq separatizmin, o cümlədən onlar arasında dünyada ən təhlükəli və vəhşi xarakterə malik olan erməni terrorizminin dayaqlarını öz ərazilərində tamamilə aradan qaldırmağa çalışan ölkədir. Həmin fəaliyyətlər də məhz Ali Baş Komandanın sayəsində həyata keçirilir. Bir qisim erməni separatçı tör-töküntülər isə xunta rejiminə və yaxuddakı Rusiya sülhməramlı missiyasına arxayın olaraq Azərbaycan ərazilərində qalırlar. Rusiya sülhməramlı missiyası oradan çıxandan sonra separatçılar da qalmayacaqlar. Yəni bu gün Qarabağda erməni terrorçularının qalıqlarının bizə qarşı fəaliyyətlərinə dəstək olan, yüklərin, təbii sərvətlərimizin, həmçinin silah-sursatların daşınmasında onlara zəmanət verən məhz Rusiya sülhməramlı kontingentidir. Laçında sərhəd-keçid məntəqəsinin qurulmasında əsas səbəb də məhz Rusiya sülhməramlılarının nəzarətindəki ərazilərimizə Hindistandan, İrandan və digər dövlətlərdən silah-sursat daşınmaları oldu”.
Beləliklə, real vəziyyətin təhlili Ermənistanın, dediklərindən fərqli olaraq, əməldə Azərbaycanla sülh şəraitində yaşamağa hazır olmadığını göstərir. Buna rəğmən, Azərbaycan ermənilərin inteqrasiyasını sürətləndirmək üçün Qarabağa təchizat xətləri ilə bağlı yeni təkliflər irəli sürür. Ağdam-Xankəndi yolu ilə Rusiya sülhməramlılarının müvəqqəti xidmət zonasında yaşayan ermənilərə Azərbaycanın özünün lazımi təchizat vasitələrini çatdırmaq barədəki çağırışları məhz bu məntiqə xidmət edir. Qarabağ erməniləri bunları nəzərə alıb Azərbaycanın ictimai-siyasi həyatına uyğunlaşma prosesini tezləşdirməlidir. Buna əməl etmədən Qarabağda yaşamaq mümkünsüzdür, çünki bu hal Azərbaycanın suverenliyinə qarşı təhdiddir, mərkəzi hakimiyyətə itaətsizlikdir. Azərbaycan bunun qarşısını almaq üçün bütün imkanlara sahibdir. Bakı bu mövqeyini dünya ictimaiyyətinin də diqqətinə çatdırır. Azərbaycanın BMT-dəki daimi nümayəndəliyinin rəhbəri Yaşar Əliyev BMT Təhlükəsizlik Şurasında “Aclıq və münaqişələrin səbəb olduğu ərzaq problemi” mövzusunda açıq debatda çıxışında bildirib ki, Ermənistan humanitar yardım məsələsindən sui-istifadə edir: “Azərbaycan Ermənistanın humanitar yardım məsələsindən öz pisniyyətli məqsədləri üçün sui-istifadə etmək üzrə ardıcıl səylərini qınayır. Laçın sərhəd-keçid məntəqəsinin yaradılması hər hansı digər dövlətin öz sərhədlərinin təhlükəsizliyini və mühafizəsini təmin etmək, nəqliyyat vasitələrinin və yüklərin hərəkətinin təhlükəsizliyini təmin etmək hüququ kimi Azərbaycanın suveren hüququdur”. Diplomat, həmçinin xatırladıb ki, cari il iyulun 6-da Beynəlxalq Ədalət Məhkəməsi Ermənistanın iddialarını əsassız hesab edib, eyni zamanda bu ölkənin keçid məntəqəsi ilə bağlı müvəqqəti tədbirlər görmək tələbini yekdilliklə rədd edib.
Nahid SALAYEV
