Prezident İlham Əliyev yerli televiziya kanallarına müsahibəsi zamanı deyib ki, Avropa İttifaqının Ermənistana növbəti missiyanı göndərməsi çox xoşagəlməz bir haldır:
"Görüşün mahiyyəti isə, qeyd etdiyiniz kimi, bizim üçün çox əlverişli oldu. Çünki ilk dəfə Ermənistan tərəfi Azərbaycanın suverenliyini tanıdı və bu, artıq faktiki olaraq bütün Qarabağın gələcəyi ilə bağlı danışıqların sonu olmalı idi. Biz bunu belə qəbul edirik. Əlbəttə ki, ondan sonra Soçi görüşündə bu tezislər bir daha təsdiqləndi. Praqa görüşünün bir məqamı da var idi. O, ümumi kontekstin bir qədər kənarında qaldı, o da Ermənistan ərazisinə, bizim sərhədyanı bölgələrə Avropa müşahidəçi missiyasının göndərilməsi idi. Bu məsələ də çox geniş müzakirə edilmişdir. Təkliflərdən biri o idi ki, o cümlədən Azərbaycan tərəfinə də bu missiya göndərilsin. Biz buna etiraz etdik. Ancaq Ermənistana bu missiyanın göndərilməsinə razılıq verdik. O vaxt da danışıldı və orada müzakirə olundu ki, bu missiya qısamüddətli olacaq, 40 nəfərdən ibarət olacaq və cəmi iki ay çəkəcək. Mən də bununla razılaşdım. Ancaq sonra nədənsə bu danışıq, yəni, bu razılaşma pozuldu. Bu, əlbəttə ki, çox məyusedici bir məqamdır. Çünki biz ciddi adamlarıq. Burada ciddi söhbətlər gedir. Biz nəyisə razılaşdırırıqsa, hətta şifahi olsa belə, buna əməl etməliyik. Necə ola bilər? Bir müddət sonra Avropa İttifaqının yüksəkvəzifəli şəxsi demişdi ki, missiya uzadılacaq. Ondan sonra Fransanın xarici işlər naziri demişdi ki, biz missiyanı uzadacağıq. Əlbəttə, biz dərhal hərəkətə keçdik və izahat tələb etdik. Bu, nə məsələdir? Siz bunu necə uzadacaqsınız? Siz axı bu missiyanın göndərilməsini bizimlə razılaşdırmısınız. Nə üçün? Çünki bu bizim sərhədimizin yanında olacaq. Necə ola bilər ki, bizimlə bu razılaşdırılmasın?”
Maraqlıdır, Azərbaycanın razılığını alnadan Brüssel niyə ikinci missiyanı açmalıdır? Axı birinci missiyanı Praqada Əliyev, Makron, Paşinyan və Mişel razılaşdırmışdı.
Politoloq Rəşad Bayramov “Bakı-Xəbər”ə açıqlamasında bildirdi ki, Fransa Ermənistandakı mülki missiyanın mandatını uzatmaq və nəticədə onu daimi missiyaya çevirmək niyyəti güdür: “Onların rəsmi açıqlamalarından aydın olur ki, bu, Parislə İrəvan arasında əvvəlcədən razılaşdırılıb. Çünki Ermənistan bu mülki missiyaya çətir kimi baxır, onu daha çox hərbi missiya kimi qəbul edir.
Fransanın xarici işlər naziri Katron Kolonna oktyabrın 20-dən Ermənistanda olan Avropa İttifaqının müşahidə missiyasının mandatının vaxtının artırılmasının vacibliyini bəyan edib. O bunu missiyanın sərhəddəki monitorinqinin “eskalasiya risqini azaltması” ilə izah edib. Görünən budur ki, əsas hədəf Rusiyanın Ermənistandan çıxarılması və onu Fransanın timsalında Avropa İttifaqının əvəzləməsinə yönəlib”.
Politoloqun sözlərinə görə, Praqa görüşündə Fransa prezidentinin öz iştirakını təmin edə bilməsi də bir daha ona dəlalət etdi ki, bütövlükdə Avropanın ümumi mövqeyinə Fransanın təsiri mövcuddur: “Bu təsir də aşkar şəkildə Azərbaycana münasibətdə qərəz xarakteri daşıyıb. 2022-ci ilin 19 dekabr tarixində Avropa İttifaqının müşahidə missiyasının müddəti başa çatdı. Bu missiya nəticəsində 2 aylıq bir hesabat hazırlanmalı idi. Amma fakt odur ki, ortada bir hesabat yoxdur. Sonradan bu missiyanın müddəti heç bir səbəb olmadan uzadılıb. Burada məqsəd odur ki, missiya davam etdiyi müddətdə Azərbaycanla Ermənistan arasında sülh sazişi imzalanmayacaq. Missiyanın isə nə vaxta qədər davam edəcəyi ilə bağlı təsəvvürlər yoxdur. Prezident bununla bağlı qəti fikirini dedi. Azərbaycanın razılığı olmadan bu addımın atılması Ermənistanın bölgəyə əlavə oyunçular cəlb etmək istəyindən başqa nəsə deyil və sırf Rusiyanı buradan sıxışdırmağa yönəlib”.
Məhəmmədəli QƏRİBLİ
