Prezident İlham Əliyev yerli televiziya kanallarına müsahibəsində deyib ki, keçirdiyimiz iztirablara, ağrılara, bizə əziz olan hər şeyin dağıdılmasına baxmayaraq, biz sülh barədə danışırıq:
“Bu, həm siyasi baxımdan, həm də insaniyyət baxımından asan deyil. Lakin bunun Azərbaycanın uzunmüddətli maraqlarına uyğun olduğunu başa düşdüyümüz üçün biz bunu təklif edirik.
Lakin bu, masa üzərində bir müddət olacaq. Sonra, necə deyərlər, xüsusi fəallıq göstərməyəcəyik. İstəmirlər – heç lazım da deyil. Delimitasiyanı istəmirlər – heç lazım da deyil. Deməli, sərhəd bizim lazım bildiyimiz yerdən keçəcək. Lakin mən artıq belə terminlərdən istifadə etməyə məcburam. Sərhəd delimitasiya edilməyib, bəs kim deyir ki, sərhəd buradan deyil, oradan keçir. Mən hesab edirəm ki, buradan keçir. Mənim bunu demək üçün əsaslarım var – tarixi, kartoqrafik əsaslar. Buna görə bu məsələ bizdən çox, onları maraqlandırmalıdır”.
Əslində, Prezident bu ritorika ilə Ermənistana ciddi xəbərdarlıq edir ki, sabotajdan əl çəksinlər. Ölkə başçısının açıq mətnlə ifadə etdiyi bu fikirlərdən belə qənaətə gəlmək olarmı ki, Azərbaycan Ermənistanla razılaşmadan da demarkasiya prosesini həyata keçirə bilər? Yəni sərhədi istədiyi yerdən çəkmək anlamında.
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, Ermənistan tərəfi imzaladığı müəyyən müddəalara əməl etməlidir, lakin İrəvan bunu etməkdən qorxur: “Ermənistan Qarabağa iddialardan əl çəkməlidir. Nikol Paşinyan qorxur ki, Bakının şərtləri ilə razılaşarsa, onunla haqq-hesab çürüdüləcək. Şərtlər isə sadədir: Qarabağ erməniləri Azərbaycan vətəndaşı olurlar, heç bir muxtariyyət almırlar. Amma yerli hakimiyyət orqanlarına öz adamlarını seçmək imkanı yaranacaq. İlham Əliyev yanvarın yerli telekanallara müsahibəsində bildirdi ki, Ermənistan tərəfi öz burnundan uzağı görməlidir, çünki 2023-cü ildən sonra 2024-cü il gələcək, daha sonra, 2025-ci ildə Rusiyanın sülhməramlı missiyası başa çatır. Ona görə də 2023-cü il Ermənistan üçün son şansdır. İrəvanın Ermənistan-Azərbaycan sərhədində beynəlxalq kontingenti yerləşdirməklə yanaşı, Qarabağa çoxmillətli sülhməramlı missiya göndərmək istərdi. Bunu Nikol Paşinyan da təsdiqləyib və bu yolla “10 noyabr 2020-ci il tarixli Üçtərəfli Bəyanatla qurulan təhlükəsizlik arxitekturasının” təmin oluna biləcəyini bildirib. Bu açıqlama Nikol Paşinyanın çıxılmaz vəziyyətdə olduğunu göstərir. Prezident deyir ki, biz Ermənistanın nazı ilə çox oynamayacayıq. Sülh sazişi imzalamağın birinci yolu sərhədlərin tanınmasından keçir. Ermənistan bu prosesdən yayınırsa, Azərbaycan lazımi addımlarını atıb, sərhədi lazım olan yerdən çəkəcək. Ermənistan buna heç bir etiraz edə bilməz. Çünki onların dövləti belə tarixi Azərbaycan torpağıdır. Paşinyan hökuməti gərək bunu da unutmasın ki, 2021-ci ilin erkən parlament seçkilərində erməni toplumu məhz sülh istədiyi üçün onun partiyasını qalib edıb. Yəni ilk növbədə Azərbaycanla barışığa nail olmaq üçün ona mandat verib. Təəssüf ki, Nikol və komandası iki ildir bu mandatdan süi-istifadə edir. Ona görə də bilməlidir ki, Azərbaycanın səbr kasasını doldurmaqla özlərinə ziyan edəcəklər. Prezidentin çıxışından bu nəticəyə gəlirik ki, Azərbaycan istənilən vaxt Qarabağda antiterror əməliyyatı keçirə və Ermənistanın iştirakı olmadan sərhədi demarkasiya edə bilər”.
Məhəmmədəli QƏRİBLİ
