Son günlər Türkiyə Prezidenti Rəcəb Tayyib Ərdoğanın Rusiya ilə bağlı çıxışları Avropa ölkələrini ciddi narahat etməyə başlayıb. Ərdoğan deyib ki, Rusiyadan hələlik taxıl daşınmır: “Ona görə də Rusiya Prezidenti Vladimir Putin iradında haqlıdır.
Digər tərəfdən, taxıl kasıb yox, zəngin ölkələrə daşınır. Kasıb ölkələrə də taxıl göndərilməlidir. Eyni zamanda, biz istəyirik ki, Rusiyadan da taxıl daşınsın. Bunu gözləyirik. Səmərqənddə Putinlə bu məsələni müzakirə edəcəyik”.
Ərdoğan eyni zamanda Qərbin Ukraynaya müasir silah satmadığını bildirib. Açıq mətnlə deyib ki, Ukraynaya verilən silah yox, metallomdur.
Qardaş ölkə liderinin Qərblə münasibətdə Moskvanın müdafiəsinə qalxması, prezident Vladimir Putinin bəzi iradlarında haqlı olduğunu deməsi avropalı ekspertlər tərəfindən birmənalı qarşılanmır. İddia edilir ki, Ərdoğan Ukraynada müharibənin davam etdiyi bir vaxtda Putinə dəstək verməklə, Moskvanın yanında olduğunu göstərir.
İndiki məqamda Ərdoğan-Putin yaxınlaşmasının əsl səbəbləri nədir?
Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, Ərdoğanın bu mövqeyi heç də onun bütün məsələlərdə Rusiyanı dəstəklədiyinin ifadəsi sayıla bilməz: “Ərdoğan Ukrayna və onun rəhbərliyi ilə də yaxşı münasibətlərə sahibdir. Bugünlərdə Ukraynaya etdiyi səfərdə yüksək səviyyədə qarşılanmağı buna sübutdur. Elə hallar olub ki, Türkiyə ilə Rusiya bir yerdə eyni mövqeyi bölüşür, lakin dünyanın başqa regionunda qarşı-qarşıya gəlirlər. Ərdoğan bu məsələdə haqlı olaraq Qərbin ikili standartlı yanaşmasını tənqid edir. Deyir ki, onların sanksiyaları səbəbindən dünyada taxıl qıtlığı yaşanır. Bunlar isə taxılı ilk olaraq böyük və varlı ölkələrə satırlar. Kasıb ölkələr nəzərə alınmır. Biz analoji addımları pandemiya dönəmində vaksinlərin paylanışında da gördük. Həmin vaxt bu haqsızlığa qarşı ilk səsini qaldıran Prezident İlham Əliyev oldu. Qərb ölkələri Ərdoğanın çıxışından ehtiyat etmək əvəzinə, ondan doğru nəticələr çıxarsalar yaxşıdır. Ukrayna ilə bağlı məsələdə isə Ərdoğan balansı qoruyaraq, uğurlu vasitəçilik etməyə çalışır. Türkiyənin bu mövqeyi ədalətlidir. 7 aylıq müddət göstərdi ki, müharibə heç kimə fayda vermədi. Sülhün əldə edilməsinə çalışmaq lazımdır”.
Məhəmmədəli QƏRİBLİ
