ABŞ prezidenti Cozef Bayden Rusiyanı terrorizmin sponsoru kimi təyin etməmək barədə yekun qərar verib. Bayden belə bir addımın əks nəticə verə biləcəyini, Rusiyanın işğalı və Ukraynaya dəstək fonunda ABŞ üçün gözlənilməz nəticələrə səbəb ola biləcəyini deyib.
Bazar ertəsi jurnalistlərin ondan "Rusiya terrorizmin sponsoru kimi təyin olunmalıdırmı?" sualının cavabında Bayden bir kəlmə "xeyr" deyib. Belə bir cavab Rusiyanın hazırda Kuba, İran, Şimali Koreya və Suriyanın daxil olduğu qısa, qorxunc siyahıya əlavə edib-etməmək barədə Kapitoli və xarici paytaxtlarda aylarla davam edən ciddi, qızğın müzakirələrə son qoyub.
Ölkələrə bu etiket ABŞ dövlət katibinin hökumətlərin "beynəlxalq terrora dəfələrlə dəstək verdiyini" bildirməsindən sonra asılır. Bu təyinat ABŞ-ın yardım, müdafiə ixracına və satışına qadağa həm hərbi, həm də qeyri-hərbi məqsədlər üçün istifadə edilə bilən əşyalara nəzarət və bir sıra digər məhdudiyyətlər tətbiq etmək kimi qadağalarına səbəb olur. Ağ Evin mətbuat katibi Karin Jan Pyer prezidentin bu məsələ ilə bağlı fikirləri haqqında ətraflı məlumat verib: “Belə bir təyinat Ukrayna və dünya üçün gözlənilməz nəticələrə səbəb ola bilər. Məsələn, müzakirələr apardığımız humanitar ekspertlər və Qeyri Hökumət Təşkilatlarının fikrincə, bu, Ukrayna ərazilərində yardımın çatdırılma prosesinə ciddi təsir göstərə bilər. Başqa bir səbəb də odur ki, bu, qlobal ərzaq böhranını yumşaltmağa yardım etmək və Ukraynanın bir milyon tondan çox ərzaq ixracatının dünyaya çatmasına səbəb olan Qara dəniz limanları sazişini təhlükə altına ala bilər”.
Maraqlıdır, bəs ekspertlər Baydenin belə bir qərar verməsinin səbəbini nə ilə əlaqələndirir? Bayden Rusiyanı terrorun sponsoru ölkəsi kimi tanımaqdan niyə birmənalı imtina etdi?
“Məhz bu və digər səbəbdən Bayden Rusiyanı terrorun sponsoru kimi tanımaqdan çəkindi”
Məsələyə münasibət bildirən Aydınlar Partiyasının sədri Qulamhüseyn Əlibəylinin fikrincə, bir sıra amillər Baydeni belə bir qərar verməkdən çəkindirib: “Əvvəla, Rusiya təkcə terrora sponsorluq etmir. Bir növ özü bunu həyata keçirir. Ukraynaya hücumu, dinc insanları öldürməsi, yaşayış məntəqələrini yerlə yeksan etməsi buna əyani sübutdur. Bayden indiki məqamda Rusiya ilə Qərbin qarşıdurmasının daha da kəskin məcraya keçməsindən ehtiyat etdiyi üçün belə bir addım atmalı oldu. Başqa bir tərəfdən nəzərə almalıyıq ki, ABŞ və Avropa İttifaqının siyasəti, çox qəribə siyasətdir. Məsələ ondadır ki, qərb ölkələrinin əksəriyyəti Rusiyadan qorxur. Çünki Rusiyanın dövlət siyasəti anlaşılmazdır. Rusiyanın sabah hansı addım atacağı bəlli deyil. Heçkəsin təsəvvürünə gəlməzdi ki, Rusiya slavyan ölkəsi olan Ukraynanı parçalamağa çalışacaq, ərazisinə dağıdıcı hücum edəcək. Bu baxımdan zəmanət yoxdur ki, Rusiya hansısa məqamda nüvə silahına əl atmayacaq. Məhz bu və digər səbəbdən Bayden Rusiyanı terrorun sponsoru kimi tanımaqdan çəkindi”.
Vidadi ORDAHALLI
