Ukraynadan gələn son məlumatlar burada Rusiyanın daha ciddi çətinliklərlə üzləşdiyini göstərir. Belə görünür ki, Rusiya işğal etdiyi əraziləri sürətlə itirir. Artıq bir neçə gündür, Ukrayna ordusunun Xarkov istiqamətində əks hücumu davam edir. Bir sıra yaşayış məntəqəsinin azad edildiyi, bölgənin ən böyük yaşayış məntəqələrindən biri olan Balakleya şəhərindəki rus qrupunun mühasirəyə alındığı təsdiqlənir.
ABŞ Müharibənin Tədqiqi İnstitutunun hesabatına görə, hücum başlayandan bugünə qədər Ukrayna ordusu 400 kvadrat kilometr ərazini azad edə bilib. Lakin prezident Volodimir Zelenski sentyabrın 1-dən Ukraynanın 1 000 kvadrat kilometrdən çox ərazisinin Rusiya ordusundan azad edildiyini bildirib: “Davam edən müdafiə əməliyyatları çərçivəsində qəhrəmanlarımız artıq onlarla yaşayış məntəqəsini azad edib. Bu irəliləyiş davam edir, yeni nəticələr var. Ümumilikdə, sentyabrın 1-dən indiyədək min kvadrat kilometrdən çox ərazimiz azad edilib. Bunu təmin edən hər kəsə təşəkkür! Bu günlərdə azad edilmiş ərazilərdə ucaldılan hər bir Ukrayna bayrağına görə orduya, kəşfiyyatçılara və xüsusi xidmət orqanlarına təşəkkür edirəm”. ABŞ tərəfinin məlumatına görə, Ukrayna ordusu İzyum şəhərindən 20 kilometr şimal-qərbə doğru irəliləyib. Rusiya mənbələri Ukrayna ordusunun daha da irəlilədiyini təsdiqləyir, özü də 30 kilometrdən çox. Rus hərbi təbliğatçısı Aleksandr Kots da vəziyyətin ağır olduğunu etiraf edir. Onun sözlərinə görə, Ukrayna birləşmələri Xarkov vilayətində hücum cəhdini davam etdirir, Balakleyaya nəzarəti ələ keçirməyə və Rusiya Silahlı Qüvvələrinin İzyum qruplaşmasını təchizat yollarından kəsməyə çalışır: “Düşmən hələ şəhəri tutmayıb. Qərb istiqamətindən Balakleyaya girmək üçün iki dəfə cəhd edildi, lakin rus qüvvələri tərəfindən dəf edildi. Bölmələrimiz şəhərdə qalır. Şevçenkove ətrafında döyüşlər yenidən başlayıb. Düşmən Çuqev-Kupyansk magistralına nəzarəti ələ keçirməyə çalışır. Balakleyanın cənubunda, Ukrayna Silahlı Qüvvələri İzyum qrupumuzun tədarük arteriyalarını kəsmək üçün Veseleye və Kunye yaşayış məntəqələri ərazisindəki yol ayrıclarına çatmağa davam edir. Aviasiyamız, artilleriyamız, ehtiyatlarımız işləyir. Vəziyyət çətindir. Bəzi ərazilərdə Ukrayna Silahlı Qüvvələri son 24 saat ərzində nəzarətimiz altında olan əraziyə 20, hardasa 30 kilometr dərinlikdə irəliləməyi bacarıb”. Ukrayna Silahlı Qüvvələrinin Baş Qərargahı isə irəliləyiş məsafəsinin daha çox olduğuna dair məlumat yayıb: “Ukrayna Silahlı Qüvvələri yerli əhalinin dəstəyi ilə 3 gün ərzində demək olar ki, 50 km irəliləyib. Düşmənin ayrı-ayrı bölmələri xeyli itki verib. İşğalçılar yaralı şəxsi heyəti və zədələnmiş hərbi texnikanı Olxovatka və Borodoyarskoye yaşayış məntəqələri ərazilərinə çıxarmağa çalışırlar. Onların mülki geyimli şəxsi heyəti fərariliyə əl ataraq Rusiya ərazisinə qayıtmağa çalışır”.
Əks-hücum əməliyyatının iştirakçılarından biri də Ukrayna Silahlı Qüvvələrinin Birinci Əlahiddə Xüsusi Təyinatlı Briqadasının zabiti, politoloq Taras Berezovetsdir. O, rus ordusunun hava-desant bölmələrinin Balakleya şəhərinin kənarından necə tələsik geri çəkildiyinin şahidi olub. Onun sözlərinə görə, Balakleya yaxınlığındakı Novaya Qusarovka kəndində gedən döyüşlər zamanı rus desantları mövqelərini tərk edərək qaçıblar. Rusiya Silahlı Qüvvələrinin generalı, Dövlət Dumasının deputatı Andrey Qurulyov da vəziyyətin ağır olduğunu bildirib: “Doğrudan da döyüş xəritəsində elə sahələr var ki, bu gün bizim üçün orada çox ağırdır. Ciddi döyüşlər gedir. Ukrayna ordusu həmin istiqamətdə böyük bir hücuma başlayıb və etiraf etmək lazımdır ki, onlar irəliləyirlər. Ukrayna ordusu adını deyə bilmədiyim istiqamətdə zərbə qrupunu cəmləşdirib və onlar bir neçə uğura imza atıb. Biz məcbur olduq ki, mövqelərimizi geri çəkək. Rusiya ordusunun bu hücum zamanı səhvləri çox oldu. Bu, konkret planlaşdırılmış bir hücum idi. Hazırda Rusiyanın hərbi rəhbərliyi bir sıra addımlar atır, bunun sayəsində biz hadisələrin gedişini dəyişə bilərik”. Yayılan məlumata əsasən, Xarkov vilayətinin işğal olunmuş ərazisində rus işğalçıları yerli sakinlərin məcburi səfərbərliyi üçün fəal tədbirlərə başlayıb. Bundan başqa, Rusiya silahlı qüvvələrin ehtiyat hissələri Xarkov vilayətinə daxil olub. Hazırda bütün təmas xətti boyunca döyüşlər gedir. ABŞ-ın Birləşmiş Qərargah Rəisləri Komitəsinin sədri, general Mark Milli baş verənlərlə bağlı bildirir: “Ruslar Ukraynanın şərqinin müxtəlif bölgələrində az taktiki uğur əldə ediblər, lakin onların strateji hədəfləri iflasa uğrayıb”. ABŞ generalı qeyd edib ki, Rusiya öz strateji məqsədlərinə səhvləri, Ukrayna hərbçilərinin və xalqının cəsarəti, eləcə də Ukraynaya beynəlxalq dəstəyi sayəsində nail ola bilməyib. Milli bildirib ki, Ukrayna ordusu Rusiyanın müharibə strategiyasına uyğunlaşıb: “Ukraynalıların silahlanmada və şəxsi heyətinin sayında ruslardan kəmiyyətcə geri qalmasına baxmayaraq, onlar öz ölkələrinin və azadlıqlarının müdafiəsi üçün ən yaxşı taktiki bacarıq və böyük iradə nümayiş etdiriblər. Ölkəyə yardımlar gəlir. Biz görürük ki, ukraynalılar onlara təmin etdiyimiz silah sistemlərini Silahlı Qüvvələrin manevrləri, əla komanda və idarəetmə ilə necə effektiv şəkildə birləşdiriblər və istənilən nəticəni əldə edirlər. Ukraynanın cənubdakı son əməliyyatlarının necə inkişaf etdiyini görürük”. Xarkov vilayətində baş verənlər Rusiyanın hərbi şöhrətinin Ukraynada məhv olduğunu nümayiş etdirir.
Tahir TAĞIYEV
