Ermənistan parlamentinin “Mülki müqavilə” fraksiyasının deputatı Arsen Torosyan bildirib ki, azərbaycanlılarla uzunmüddətli düşmənçiliyin qızışdırılması Ermənistan və ümumiyyətlə bütün erməni xalqı üçün bir tələdir:
“Biz düşmənçiliyi qızışdırmamalıyıq. Biz illərdir “artsax” ideyası ilə yaşadıq. Bunu bizim beynimizə soxdular. Amma 30 il ərzində “artsax”ın müstəqilliyinə nail olunmamış, əvvəlki illərdə uğursuzluğa düçar olmuşuq. Bu fikir özünüaldatma idi. Ermənistanın “dqr”in müstəqilliyini tanımaq şansı yoxdur və heç vaxt olmayıb. Biz yavaşlamış minanın üzərində durmuşuq... İndi bizə şans verilib – ya böyük partlayışın qurbanı oluruq, ya da münaqişəni həll edirik. Bunun üçün müharibə və hərbi münaqişə içində 30 il yaşayan erməni və Azərbaycan xalqlarının yaralarını müalicə etmək lazımdır. Artıq ağıllanmaq vaxtıdır...”
Ermənistan parlamentində hakimiyyət fraksiyasından olan deputatın bu etirafını necə dəyərləndirmək olar?
Politoloq Tofiq Abbasov “Bakı-Xəbər”ə açıqlamasında bildirdi ki, bu olduqca vacib mesajdır: “Verilən ismarıcın kökündə duran ideya yalnız fikri səsləndirən deputata məxsus deyil. Artıq Ermənistandakı böyük bir kəsim əhali bu fikirdədir. Sadəcə, özlərində cürət tapıb bunu səsləndirə bilmirlər. Eyni zamanda bu təxribatçı ideyanı beyinlərə sırımış quldurlar fərqli mövqe tutanları hədələyirlər. Bu zərərli ideyanın tərəfdarları siyasi cəhətdən iflasa uğrayıblar. Maddi cəhətdən isə varlıdırlar. Çünki bu ideyanın üzərindən həm Qarabağı, həm də Ermənistanı talayıblar. Azərbaycanın dilbər güşəsi olan Qarabağı sözün əsl mənasında qara bazara çevirmişdilər. Xeyrini də özləri götürürdülər. Söhbət Serj Sarkisyan, Robert Köçəryan kimi hərbi canilərdən gedir. Belə adamlar anlayır ki, erməni xalqı ayılsa, onların özləri hədəfə çevriləcəklər. Ermənistan bir subyekt olaraq öz mahiyyətini itirib. Çox vacibdir ki, insanlar gec də olsa öz etiraflarını etsinlər. Buraxılan səhvləri düzəltməyin bir yolu var - Azərbaycanla sülh müqaviləsini tez bir zamanda imzalamaq. Etirafı edənin kimliyindən görünür ki, Nikol Psşinyanın fraksiyası buna hazırdır. Sadəcə olaraq revanşistlərin və xaricdəki diasporun “satqın” damğasından qorxurlar. Görünən budur ki, Ermənistandakı ağıllı kəsim daha çox İlham Əliyevin mesajlarına diqqət edir. Bizim Prezident çıxışlarında həm Ermənistanda, həm də Qarabağdakı ermənilərə aydın yol göstərir. Paşinyan bizim Prezidentlə olan əvvəlki görüşlərində deyib ki, ona bir az vaxt vermək lazımdır. Ancaq bunu bacara bilmədi. Belə etirafların sayı çoxalacaq. Çox ümidverici trenddir. Belə olmasa, onlar tək keçmişi deyil, həm də gələcəyi uduzaçaqlar. Yalnız bunu təmin edəndən sonra Ermənistan normal dövlətə çevriləcək”.
Məhəmmədəli QƏRİBLİ
