Ermənistanın baş naziri Nikol Paşinyan Rusiyanın Vladivostok şəhərində erməni diasporunun nümayəndələri ilə görüşdə bir sıra məsələlərə toxundu.
Paşinyanın diaspor təmsilçiləri ilə görüşdə bir məqam xüsusilə diqqəti cəlb edir. O qeyd etdi ki, indi Ermənistan üçün daha çətin olduğu üçün bir sıra qərarlar qəbul etməkdən qorxmaq lazım deyil. Erməni baş nazir bunu onunla əlaqələndirdi ki, 2018-ci ildə onlar ümumi eyforiya şəraitində hakimiyyətə gəliblər, amma indi vəziyyət daha mürəkkəb olduğu üçün çətin qərarlar qəbul etməkdən qorxmamalıdırlar: “İndi hökumət daha çətin vəziyyətdədir. Bilirsən niyə? Çünki 2018-ci ildə eyforiya şəraitində hakimiyyətə gəldik. Və biz sərt reallıqla üz-üzəyik. Amma indi özümüz dünyagörüşümüzlə bağlı nəticə çıxarmalıyıq. Biz də qərarlar verməkdən qorxmamalıyıq - çətin qərarlar, bu qərarlar bizi irəli aparmalıdır, bir yerdə dayana bilmərik”.
Maraqlıdır, Paşinyan çətin qərarlar deyəndə nəyə işarə edir? Bununla o, sülh sazişinin imzalanmasını, yoxsa başqa məsələni nəzərdə tutur?
“Nikol əslində erməni cəmiyyətinə demək istəyir ki, Azərbaycanın yaratdığı reallıqlardan qaçmaq mümkün deyil”
Sözügedən məsələ ilə bağlı fikirlərini “Bakı-Xəbər”lə bölüşən AMİP-in sədr müavini Afsəddin Nəbiyev hesab edir ki, Paşinyan bununla Azərbaycanla sülhün əldə olunmasının vacibliyinə eyham vurur: “Paşinyanın bir neçə il bundan öncə hakimiyyətə gəlişini siyasi eyforiya adlandırması bugünkü düşdüyü vəziyyətin inikasıdır. O etiraf edir ki, o zamanlar hakimiyyəti siyasi eyforiya ilə ələ keçirib. İndiki reallıqlar tamamilə başqadır və o, hazırda həlledici vacib qərarların qəbul edilməli olduğunu etiraf edir. Ancaq parçalanmış erməni cəmiyyətinin buna hazır olub-olmadığını asanlıqla açıqlaya bilmir. Çünki erməni cəmiyyəti tamamilə parçalanmış vəziyyətdədir. Rəhbərliklə cəmiyyət arasında kəskin uçurum var. Paşinyan əslində erməni cəmiyyətinə demək istəyir ki, Azərbaycanın yaratdığı reallıqlardan qaçmaq mümkün deyil. Ermənistana kimin rəhbərlik etməsindən asılı olmayaraq, Azərbaycan dövlətinin əlində Ermənistanı sülhə məcbur etmək üçün diqtə edici mühüm faktorlar mövcuddur. Əsas faktor olaraq 10 noyabr Bəyannaməsindən başlayaraq, Azərbaycanın hərbi siyasi, diplomatik gücünü qeyd etmək istərdim. Bütün bunlar Azərbaycanın Ermənistanın siyasi gündəmini diqtə etməyə imkan yaradır. Paşinyan, təbii ki, odla su arasında qalıb. O artıq anlayır ki, erməni cəmiyyətini siyasi kollapsdan qurtarmağın yeganə yolu indiyədək götürdüyü öhdəlikləri yerinə yetirməkdən keçir. Buna da Ermənistanda mane olan kifayət qədər qüvvələr var. Məhz onları zərərsizləşdirə bilmədiyindən hər zaman belə açıqlamaları ilə gündəmə gəlir. Əsas məsələ odur ki, Azərbaycan dövləti öz üzərinə hansı öhdəlikləri götürüb onu layiqincə yerinə yetirir. Bölgədə və dünyada dövlətimizin nüfuzu getdikcə artır”.
Sədr müavini onu da əlavə etdi ki, Paşinyanın nə deməsindən asılı olmayaraq, Azərbaycan dövləti sülhün və sabitliyin bərqərar olması üçün bütün lazımi tədbirləri həyata keçirir.
Vidadi ORDAHALLI
