Bu gün Ermənistan ordusunun iflic vəziyyətdə olduğu heç kəsə sirr deyil. Bir tərəfdən müharibədə uduzması, digər tərəfdən də əsgəri xidmətdən yayınma meyllərinin güclənməsi bu ölkənin ordusunun mövcudluğunu sual altına alır. Artıq Ermənistan ordusunda böyük biznes layihəsini gerçəkləşdirməyə hazırlaşırlar.
Bu istiqamətdə hazırlıq prosesi başlayıb. Yayılan məlumata görə, Ermənistan Müdafiə Nazirliyi çağırışçılara 24 milyon dram (60 min dollar) qarşılığında vaxtından əvvəl tərxis olunmağa icazə verməyi təklif edib. Bu dəyişiklik “Hərbi xidmət və hərbi qulluqçunun statusu haqqında” qanunda öz əksini tapıb və e-draft.am hüquqi aktların vahid portalında dərc olunub.
Sənədə əsasən, çağırışçı hərbi xidmətdən vaxtından əvvəl, hətta dördüncü aydan və hazırlıq mərhələsini başa vurduqdan sonra buraxıla bilər. Bunun qarşılığında o, dövlət büdcəsinə 24 milyon dram ödəniş etməlidir.
“Bu elə Ermənistanın özünə yaraşan variantdır”
Ermənistan ordusunda həyata keçirilməsi hədəflənən yeni biznes layihəsini şərh edən hərbi ekspert Tərlan Eyvazov “Bakı-Xəbər”ə şərhində bildirdi ki, Ermənistan ordusunda həmişə yayınma, fərarililik kimi hallar olub. Pul qarşılığında əsgəri xidməti yarımçıq qoymaq məsələsinin dünya təcrübəsində olduğunu vurğulayan T.Eyvazov qeyd etdi ki, bir sıra ölkələrdə dövlətə müəyyən qədər rüsum verib bunu etmək olur: “Konkret olaraq Ermənistanın təklifi sırf ehtiyacdan yaranıb, bu ölkənin ordusu çox pis vəziyyətdədir. Yəni Vətən savaşından sonra Ermənistan ordusu doğrudan da acınacaqlı vəziyyətə düşüb. Əsasən texnikanın böyük bir qismi sıradan çıxıb, orduda ideoloji məsələlər çox aşağı səviyyədədir, ruh düşkünlüyü var, əhali öz övladlarını xaricə göndərməyə çalışır, müxtəlif vasitələrlə əsgərlikdən yayındırmaq istəyir. Baxmayaraq ki, Qarabağdan da Ermənistan hərbçiləri çıxarılıb, qalıbsa da, çox az qisim qalıb. Ermənistan ordusunun özündə nizamnamədənkənar hərəkətlər baş verir. Verilən xəbərlərdən də görürük ki, orada tez-tez nizamnamədənkənar hərəkətlərə yol verilir, gənc çağırışçılara qarşı işgəncələr, ölüm və intihar halları geniş hal alıb. Ölüm, intihar, işgəncə halları kütləvi olduğu üçün belə bir varianta əl atırlar. Bilirsiz necədir? Ermənistandakı pullu adamlar onsuz da övladlarını hərbi komissarlıqların əli ilə 60 min dollardan az rüşvət verib əsgərlikdən yayındırıb ölkədən çıxarırlar. İmkanlı adamların uşaqları geri dönmür. Ermənistan Müdafiə Nazirliyi 60 min dollar rüsum məsələsini ortaya atmaqla rüşvət halında ciblərə gedən külli miqdarda vəsaiti orduya yönəltmək istəyir. Eyni zamanda da ordudan yayınma halının qarşısını almaq istəyir. Pulun varsa ödəyib əsgərlikdən istədiyin vaxt evə gələcəksən, yoxursa məcburən gedib xidmət edəcək. Bildiyim qədər, Ermənistan ordusunun əvvəlki qədər sayı da olmayacaq. Daha az saylı, daha məzmunlu, peşəkar ordu yönümündə iş aparırlar”.
T.Eyvazov hesab edir ki, Ermənistan ordusunda bu yolla hansısa islahatlar aparmaq istəyirlər, bunu isə əsasən büdcəyə daxilolmalarla etməyi düşünürlər: “Bu elə Ermənistanın özünə yaraşan variantdır. Çünki o ölkədə həddən artıq sosial problemlər var, əhali narazıdır, indiki hakimiyyətin qarşısında çox böyük vəzifələr durur. Ona qarşı olan müxalifətin (özü də ki, həddən artıq terrora meylli silahlı, kəskin, millətçi, müharibəyönümlü bir müxalifətdir-T.E) davranışlarının qarşısını almaq üçün mütləq sosial layihələr həyata keçirilməlidir. Orduya ayrılacaq pullar da, təbii ki, büdcədən ayrıldığı üçün onun da hər hansı bir vasitələrlə ödənilməsi, hansısa maliyə mənbələrinin tapılması vacibdir. Məsələni bu yöndən görürəm. Düşünürəm ki, bu, erməni varinatıdır və kimlərinsə cibinə girəcək rüşvəti ordunun büdcəsinə yönəldirlər. Onsuz da bilirlər ki, əsgərlikdən yayınmaq istəyənlər çoxdur və bunun hesabına ordunun büdcəsinə pul cəlb etmək istəyirlər. Dediyim kimi, onsuz da imknlı şəxslər rüşvət yolu ilə övladlarını əsgərliyə qoymurlar”.
İradə SARIYEVA
