Azərbaycan Ordusu tərəfindən keçirilən “Qisas” antiterror əməliyyatından sonra ermənilərin təşvişi aydın şəkildə duyulur. Belə ki, onlar ardıcıl olaraq Prezident İlham Əliyevə müraciətlər ünvanlayırlar.
İslamı qəbul edən erməni qadın Aqunik Abovyan ölkə başçımıza müraciət edib və Bakıya gəlmək üçün ondan icazə istəyib. O, bu barədə müraciətini sosial şəbəkə hesabından paylaşıb. Abovyanın sözlərinə görə, Azərbaycanda olmaq, həyat yoldaşının və dostlarının vətənini görmək onun ən böyük arzusudur. Başqa bir diləyi isə Qarabağa getməkdir.
“Əgər mümkünsə, məhz Şuşada məsciddə namaz qılmaq kimi xəyalım var”, - deyə o, sözlərini yekunlaşdırıb.
Digər tərəfdən Ermənistan vətəndaşı olan Vaqe Qambaryan da Azərbaycan Prezidenti İlham Əliyevə müraciət edib. O, Ermənistan vətəndaşlığından imtina edərək, Azərbaycan vətəndaşlığı almaq istədiyini, Bakıya gələrək yaxınlarını ziyarət etmək arzusunu ifadə edib. Qambaryan, həmçinin, Xankəndidə yaşamaq niyyətini də dilə gətirib. O, Azərbaycan xalqını sevdiyini və hörmət etdiyini bildirib.
Xatırladaq ki, bir müddət əvvəl erməni fəal, bloqer İşxan Verdyan da eyni tipli müraciət hazırlayıb.
Erməni vətəndaşlarının bu tip müraciətlərinin kütləvi hal alması nə ilə izah edilə bilər?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, son vaxtlar belə bir dalğanın müşahidə olunması təsadüfi deyil: “Bu siyahıda biz həm Ermənistan, həm də bizim suveren ərazilərimiz sayılan Qarabağda yaşayan ermənilərin adına rast gəlirik. Biz dəfələrlə bəyan etmişik ki, ərazimizdə olan ermənilər üçün istənilən şəraiti yaratmağa hazırıq. Çox maraqlıdır ki, ermənilərin bənzər istəklərinə biz əvvəl rast gəlmirdik. Burada hansısa erməni hiyləgərliyi də ola bilər. Çünki bu tendensiya daha çox sonuncu “Qisas” əməliyyatından sonraya təsadüf etdi. Ermənilər bir daha anladılar ki, separatçılıq və terrorçuluqla nəyəsə nail ola bilmıyəcəklər. Yeganə yol bizim təklif etdiyimiz variantdan keçir. Bizim isə istəyimiz bəllidir. Ancaq uzun illərdi ki, erməni məkri ilə üz-üzəyik. Onlar bir balaca çətinə düşən kimi üzdə bizimlə mehriban olmağa çalışıblar. Hazırda da çox çətin vəziyyətlə üzləşiblər. Məhz buna görə də belə çabalayırlar. Bu adamların sırasında Ermənistanın xüsusi xidmət orqanlarının əməkdaşları da ola bilər. Burada sual yaradan məqam ermənilərin məhz Azərbaycana belə can atmasıdır. Niyə başqa ölkələri seçmirlər? Axı MDB məkanında bizdən başqa xeyli ölkə var. Bu çox maraqlıdır. Düşünürəm ki, bunun arxasında bizə hələ də tam aydın olmayan hansısa bir məkrli niyyət dayana bilər. Bəlkə də kimsə fikirləşə bilər ki, Azərbaycan bir növ düşmən ölkə olduğu üçün bunu göstərməmək adına sığınacaq istəyən ermənilərə daha yaxşı şərait yarada bilər. Bütün bu versiyaları biz lazımınca götür-qoy etməliyik. Bizim qarşımızda duran əsas məsələ ərazimizdə olan bütün qanunsuz silahlı dəstələrin çıxarılması olmalıdır. Bizim dirənişimizlə bu məsələlər tam həllini tapacaq”.
Məhəmmədəli QƏRİBLİ
