“Hazırda Laçının Zabux kəndində qanunsuz məskunlaşmış ermənilərin təxliyə işləri aparılır. Amma erməni sakinlərə köçmək üçün heç nə verilməyib. Yalnız məktəbi boşaltmaq üçün maşın ayrılıb”. Bu barədə “Hraparak” qəzetinə müsahibəsində Laçın rayonunun Zabux kəndindəki qondarma "Aqavno" icmasının rəhbəri Andranik Çavuşyan bildirib.
Onun sözlərinə görə, 54 ailədən 7-si Zabuxdan çıxmaq istəmir, digərləri ilə müxtəlif ərazilərə yerləşdiriləcək. Çavuşyan həmçinin qeyd edib ki, evlərini yandırmaq istəyən ermənilərə xəbərdarlıq edilib. Bildirilib ki, evləri yandıranlara kompensasiya verilməyəcək: “Dövlət hər adambaşına 40 min dram təzminat ödəməyə hazırlaşır. Həmin pul köç prosesi bitdikdən sonra veriləcək. İrəvana köçənlərə şəhadətnamə verilməlidir ki, vəsait alınsın. Hazırda kənddə 200-dən çox sakin, yəni 54 ailə var. 54 ailədən yalnız 7-si burada qalmaq istəyir. Qalanları müxtəlif istiqamətlərdə Ermənistana köçəcək. 7 ailənin taleyi hələ də sual altındadır. Mən özüm Xankəndiyə gedəcəyəm. Hayk Xanumyan bizi hədələyərək dedi ki, evləri yandırsanız, təzminat ala bilməyəcəksiniz. İndi biz sakinlərlə köçməyə hazırlaşırıq”.
“Kim evini yandırarsa həmin şəxsə kompensasiya verilməməsi fikri ilə ermənilər dünyanın gözü qarşısında biabır olmaq istəmir”
Məlum məsələ ilə bağlı fikir bildirən Qarabağ Azadlıq Təşkilatının (QAT) sədri Akif Nağı “Bakı-Xəbər”ə açıqlamasında qeyd etdi ki, ermənilər qismən reallıqla hesablaşır: “Azərbaycanın gücü, haqlı mövqeyi qarşısında başqa çıxış yolunun olmadığını başa düşürlər. Ermənilər həmin evi yandırmaqla dünya ictimaiyyəti qarşısında özlərini rüsvay edirlər. Xatırladım ki, 2020-ci ildə onlar Qarabağı tərk edərkən etdikləri vəhşiliyi bütün dünya gördü. Indi də həmin proses təkrar olunarsa onlar haqqında vəhşi toplum düşüncəsi əbədi olaraq xatirələrdə qalacaq Bu səbəbdən də Ermənistan rəhbərliyi Laçından köçməli olan ermənilərə müəyyən təsirlər etməyə çalışır. Kim evini yandırarsa həmin şəxsə kompensasiya verilməyəcək. Bu kimi təsirlərlə ermənilər dünyanın gözü qarşısında biabır olmaq istəmir”.
A.Nağının sözlərinə görə, Azərbaycan tərəfi məlum məsələ ilə bağlı haqlı mövqeyini ortaya qoyub. Ölkəmiz kompraomisə getmədən öz planını həyata keçirir. Həmin plan da 2020-ci il 10 noyabr tarixində Azərbaycan, Rusiya və Ermənistan rəhbərləri tərəfindən razılaşdırılıb. Bundan sonra 2021-ci ilin yanvar ayında da razılaşma əldə olunub. Azərbaycan həmin razılaşmalara uyğun olaraq hərəkət edir: “Ölkəmiz beynəlxalq hüquqa söykənərək öz haqqını ortaya qoyur. Buna görə də ermənilər Azərbaycanın qarşısında müqavimət göstərməyin mənasız olduğunu başa düşür”.
QAT sədri onu da əlavə etdi ki, Zabux kəndinin sakinləri bir müddət əvvəl bəyanatlar səsləndirirdilər. Ancaq indi həmin kəndin sakinləri özlərinə yaşamağa yer axtarır.
Günel CƏLİLOVA
