“Yaxın günlərdə Media Reyestri yaradılacaq”. Bu fikirləri Mətbuat Şurasının sədri Əflatun Amaşov Baş Prokurorluğun təşkilatçılığı ilə “Media azadlığı və sosial şəbəkələrin güclənən təsiri şəraitində cəmiyyətin informasiya təhlükəsizliyinin təmin olunması” mövzusunda keçirilən konfransda deyib.
Onun sözlərinə görə, son vaxtlar medianın inkişafı ilə bağlı xeyli islahatlar həyata keçirilib: “Media haqqında” yeni qanun qəbul edilib. Biz cəmiyyətin media savadlılığının artırılması istiqamətində işlər görməliyik”.
Bildiyimiz kimi, artıq Media Reyestri yaxın günlərdə fəaliyyətə başlayacaq. Bu reyestrin fəaliyyətə başlaması, şübhəsiz ki, media sahəsində tamamilə yenilik olacaq. Əlbəttə, Media Reyestrinin yaradılmasının bu sahənin inkişafına, bəzi neqativ təzahürlərdən təmizlənməsinə səbəb olacaq.
“Mətbuat orqanlarında şəffaflıq yaranacaq”
“Novoe vremya” qəzetinin baş redaktoru Şakir Ağayev “Bakı-Xəbər”ə şərhində bildirdi ki, “Media Haqqında” yeni qanunda Media Reyestrinin yaradılması ilə bağlı ayrıca maddə var. “Siz də bilirsiniz ki, bu maddə ən çox müzakirə edilən, hətta mübahisəyə səbəb olan maddələrdən idi. Mən həmişə qeyd etmişəm və yenə də deyirəm ki, Media Reysterinin yaradılması və jurnalsitlərin reyestrdən keçirilməsi müsbət haldır, heç bir problem yaratmayan məsələdir. Çünki bu vaxta qədər də hər bir normal, şəffaf fəaliyyət göstərən, işçisi ilə müqavilə bağlayan, vergiyə və pensiya fonduna ödəniş edən mətbuat orqanı onsuz da reyestrdən keçir. Yəni Ədliyyə Nazirliyində qeydiyyatdan keçir, vergidən VÖEN alıb fəaliyyətə başlayır və sair. Media Reyestri nə qədər tez fəaliyyətə başlasa bir o qədər yaxşı olar, hazırda ona ciddi ehtiyac var. Reyestrin ona görə tez başlaması gərəklidir ki, indiki halda mətbuat orqanlarının qeydiyyatdan keçməsində problemlər yaranıb. Yeni qanunun tələbinə görə, bunu Medainın İnkişafı Agentliyi qeydiyyatdan keçirməlidir. Bunun üçün isə Reyestr yaradılmalıdır. İndi proses yekunlaşmaq üzrədir və Reyestr artıq fəaliyyətə başlamalıdır. Media Reyestrinin fəaliyyətə başlaması çox faydalı olacaq və bunu müsbət qiymətləndirirəm. Reyestrə daxil olmaq məcburi xarakter daşımır. Kİm istəyir daxil ola bilər, kim istəyir yox. Daxil olmaq istəməyən də öz fəaliyyətini şəffaf şəkildə davam etdirəcək”.
Ş.Ağayevin sözlərinə görə, bu Reyestrin fəaliyyətə başlaması media sahəsində şəffaflığın təmin olunmasına şərait yaracaq: “Mətbuat orqanlarında şəffaflıq yaranacaq. Reyestrdən keçən mətbuat orqanları üçün gələcəkdə həm reklam bazarında, həm də digər məsələlərdə müsbət istiqamətlər açılacaq. Reyestrdən keçən mətbuat orqanlarının jurnalist əməkdaşları da reyestrdən keçəcək. Bilirsiz ki, Prezident güzəştli ipoteka haqqında sərəncam imzalayıb, reyestrə adı düşən mətbuat orqanları, jurnalistlər güzəştli ipotekanın şərtlərindən də istifadə edə bilər. Çünki jurnalistlər də bu kateqoriyaya aid edilib. Sosial problemlərin həllində də bu öz köməyini göstərə bilər. Arzulayaq ki, bunlar baş verəcək. Reyestr mətbuatın iqtisadi azadlığına, iqtisadi cəhətdən inkişafına öz töhfəsini verəcək”.
İradə SARIYEVA
