İraqın İrana yaxınlığı ilə seçilən “Sabereen News” saytı məlumat yayıb ki, guya Azərbaycan gizli formada Ukraynaya silah verir. İddia olunur ki, son günlər Ukraynaya silah ötürülməsi daha da artıb. Bu dezinformasiyanı da Rusiya, Ermənistan, İran mətbuatı yoxlamadan necə gəldi kütləvi şəkildə tirajlayır. Sanki etibarlı bir mənbəyə istinad edirlər.
2019-cu ildə də oxşar qaralama kampaniyası aparıldı. Həmin il İsrail İraqda İrana bağlı Həşdi-Şəbi qruplaşmasına zərbələr endirəndə “PUA-ların Azərbaycandan qalxdığı” iddiası ortaya atıldı. Ardınca İran, Rusiya və Ermənistan mediasında bu məlumatlar yayıldı. Daha sonra sözügedən informasiyalar Qərbdə müəyyən media resurslarında dərc olundu.
Maraqlıdır, Azərbaycanın guya Ukraynaya gizli silah verməsi ilə bağlı yalanların tirajlanmasında məqsəd nədir? İrana yaxın media resursları niyə belə məlumatlar yayır?
“Belə əsası olmayan məlumatların yayılmasında məqsəd Azərbaycan-Rusiya münasibətlərini korlamaqdır”
Sözügedən məsələyə aydınlıq gətirən politoloq Tural İsmayılov bunu bir sıra amillərlə əlaqələndirdi: “Məsələ ondadır ki, Azərbaycan əleyhinə müxtəlif rakurslu informasiya hücumları davam edir. Xüsusən də Azərbaycanın 44 günlük Vətən müharibəsində əldə etdiyi qələbədən sonra bu tip feyk məlumatların sayı daha da artıb. Əfsuslar olsun ki, İranda və bu ölkəyə yaxın digər dövlətlərdə olan media resurslarında Azərbaycan əleyhinə materiallar dərc edilir. Hiss olunur ki, bu cür informasiya propoqandası koordinasiya olunmuş formada aparılır. Çünki bütün bu “informasiyalarda” Azərbaycan və Türkiyə həm ayrı-ayrılıqda, həm də bu iki ölkənin müttəfiqliyi gözdən salınır. Azərbaycan Ukraynaya yalnız humanitar yardım göstərir. Eyni zamanda, beynəlxalq hüquqa əsasən bu ölkənin ərazi bütövlüyünü tanıyır. Azərbaycanın silah dəstəyi verməsi ilə bağlı yazılanlar cəfəngiyatdır. Nəzərə almaq lazımdır ki, Azərbaycan Rusiya ilə də yaxşı münasibətlərə malikdir. Azərbaycan Rusiya-Ukrayna müharibəsi konteksində kifayət qədər önəmli mövqe ortaya qoyub. Söhbət ondan gedir ki, Azərbaycan baş verənlərlə əlaqədar neytral siyasət yeridir. Bir neçə ay əvvəl Rusiya xarici işlər naziri Sergey Lavrov da Azərbaycanın Ukrayna müharibəsi ilə əlaqədar neytral mövqedən çıxış etdiyini qeyd etdi. Fikrimcə, belə əsası olmayan məlumatların yayılmasında məqsəd Azərbaycan-Rusiya münasibətlərini korlamaqdır. Ancaq hesab edirəm ki, müəyyən dairələr buna nail ola bilməyəcək. Çünki bunun doğru olmadığını Rusiya da yaxşı bilir. Azərbaycanın bəzi dövlətlərdən fərqli olaraq saxta və qeyri-səmimi siyasət həyata keçirməməsi İrana bağlı qüvvələri narahat edir. O üzdən, belə yalan məlumatları yayırlar”.
Bir sözlə, politoloq hesab edir ki, bu, İranyönümlü media resurslarının növbəti çirkin piar kampaniyasıdır.
Vidadi ORDAHALLI
