Avqustun 8-də Ankarada “2023-cü il ərəfəsində və ondan sonrakı dövrdə müdrik və humanist Türk diplomatiyası” mövzusunda 13-cü Səfirlər konfransı başlayıb. Avqustun 8-dən 12-dək davam edəcək konfrans Ankara, Nevşəhir və Kayseri şəhərlərində olacaq. Konfransda bir sıra məsələlər müzakirə olunur. O cümlədən Azərbaycan və Ermənistan arasında baş verən son hadisələr diqqət mərkəzində olub.
Konfransın rəsmi açılışındakı çıxışında Türkiyənin xarici işlər naziri Mövlud Çavuşoğlu bildirib ki, Can Azərbaycanın Zəfərinin yaratdığı münbit şəraitdən davamlı sülh üçün istifadə edirik. Xüsusi nümayəndələrimiz Ermənistanla danışıqları davam etdirir: “Son günlər bölgədə baş verən gərginlik mövcud sakitliyin nə qədər kövrək olduğunu göstərdi. Dost da, düşmən də bilsin ki, Can Azərbaycan heç zaman yalnız deyil!”.
Tədbirdə çıxış edən Türkiyə prezidenti Rəcəb Tayyib Ərdoğan bəyan edib ki, Ermənistan hadisələri düzgün dərk edərsə, Azərbaycan və Türkiyənin səmimi çağırışlarına cavab verərsə bu, regionda sabitliyə xidmət edəcək: “Əldə olunan razılaşmalarla Cənubi Qafqazda yeni dönəm başlayıb. Bu tarixi fürsətin əldən getməməsi üçün çalışırıq. Bugünədək Azərbaycanla birgə bir çox addım atmışıq. Radikal erməni çevrələrinin sabotajına rəğmən Qafqazda daimi sülh yolunda önəmli məsafə qət etmişik. Ermənistanla xüsusi nümayəndələr səviyyəsində başlatdığımız görüşlər davam edir. Baş nazir Nikol Paşinyan Qurban Bayramı münasibətilə zəng vuranda çox konstruktiv danışıqlar apardıq. Ermənistanın prosesləri doğru oxuyaraq Azərbaycan və Türkiyənin səmimi çağırışlarına qarşılıq verməsi ilə bölgəmizin qısa müddətdə sabitliyə qovuşacağına inanıram”.
Tədbir çərçivəsində xarici işlər naziri Ceyhun Bayramov bəyan edib ki, Ermənistan istəsə də, istəməsə də Naxçıvanla əlaqələr qurulacaq. Nazir bildirib ki, Azərbaycan İranla əldə olunmuş razılaşmaya uyğun olaraq Araz çayı üzərində ilk körpünün tikintisinə başlayıb. Belə olan halda Azərbaycanın Ermənistandan keçmədən Araz çayı ilə İran üzərindən Naxçıvana getməsi üçün alternativi var: “Ermənistan istəsə də, istəməsə də həyata keçiriləcək. Bu, Ermənistanın regional inkişaf layihələrindən kənarda qalmaması üçün bir şansdır. Qərarı özləri verəcək. İrəvan düzgün qərar qəbul etməsə, ən böyük zərər özlərinə dəyəcək”.
Bütün bu deyilənlərin fonunda, Səfirlər konfransında Ermənistana verilən mesajlar və bu mesajlarda İrəvan hakimiyyətinə olan xəbərdarlıq notları, Azərbaycanla və Türkiyə ilə münasibətlərin normallaşdırılması çərçivəsində verilən mesajların nə kimi dəyəri, tutumu və gücü olacaq?
“Paşinyan hakimiyyəti verilən mesajları düzgün oxumalıdır”
Məsələyə münasibət bildirən “İki sahil” qəzetinin baş redaktoru Vüqar Rəhimzadənin fikrincə, Ermənistan müstəqil dövlət olmadığı üçün bundan sağlam nəticə çıxaracağını konkret demək çətindir: “Çünki Ermənistan müxtəlif qrupların əlində alət funksiyasını yerinə yetirir. Xüsusən də xaricdəki erməni lobbisi Ermənistan hakimiyyətini təzyiq və təsir altında saxlayır. O baxımdan, Ermənistanın sağlam qərarlar verəcəyini indidən demək çətindir. Ölkə hakimiyyəti normal düşüncəyə, realist yanaşmaya sahib olarsa, o zaman onlar vəziyyəti düzgün dəyərləndirməlidilər. Belə olarsa, bu həm regionda sabitliyə töhfə verəcək, həm də Ermənistanın inkişafına səbəb olacaq. Əks halda qarşı tərəf bundan itirəcək. Bu baxımdan hesab edirəm ki, Paşinyan hakimiyyəti verilən mesajları düzgün oxumalıdır. Daha sonra buna uyğun qərarlar qəbul etməlidilər. Azərbaycan onsuz da qarşısına qoyduğu hədəflərə çatacaq”.
Vidadi ORDAHALLI
