Azərbaycanın öz torpaqlarını işğaldan azad etməsi faktını hələ də həzm edə bilməyən qüvvələr var və bu qüvvələr də bütün imkanlarını bir yerə yığıb bizim şanlı Zəfərimizə kölgə salmağa çalışırlar. Çoxlarımıza məlumdur ki, son zamanlar 44 günlük Vətən müharibəsindəki qələbəmizə məzhəbçi mövqedən yanaşanlar tapılır.
Xüsusən də dini kəsim arasında belə şaiyə dolaşır ki, guya torpaqlarımızı “hüseynçilər” azad edib… Bu o qədər absurd iddiadır ki, yerə-göyə, heç bir məntiqə sığmır. Gün kimi aydındır ki, 44 günlük Vətən müharibəsində torpaqlarımızı Azərbaycan əsgəri, Azərbaycan zabiti azad edib, Müzəffər Ali Baş Komandanın rəhbərliyi ilə qalib ordumuz bu şərəfli hadisəyə imza atıb.
Bəs bu “Hüseynçilər” söhbətini, şayiəsini kimlər ortaya atib, kimlər öz maraqları naminə manupulyasiya ilə məşğul olur?
Ekspert fikrinə keçməzdən əvvəl qısa olaraq vurğulayaq ki, İranda oturub gündə canlı yayım açan “Hüseynçilər”in və onların “liderləri”nin Vətən müharibəsi dövründə tutduğu mövqe hər kəsə məlumdur, onlar Azərbaycanın qələbə qazanmaması üçün əllərindən gələni edir, gənclərimizi yanlış yola sürükləyən çağırışlar edirdilər. Bütün güclərini zəfərimizə kölgə salmağa, gənclərimizi ermənilərə qarşı döyüşməkdən çəkinməyə çağırırdılar. “Erməniyə silah qaldırmayın, müharibəyə getməyin” kimi anti-Azərbaycan çağırışlarını unutmadıq.
“Qələbənin birmənalı olaraq memarı Azərbaycan əsgəridir, Azərbaycan ordusudur, Azərbaycançılardır”
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO başqanının müavini, siyasi şərhçi Faiq Ələkbərli “Bakı-Xəbər”ə şərhində bildirdi ki, əsası olmayan bu şayiələr, iddialar “Hüseynçilər” qruplaşmasının Azərbaycanın daxilində reklam edilməsinə hesablanıb. Bunu böyük təxribat adlandıran F.Ələkbərli hesab edir ki, bu şayiəni ölkəmizdəki məzhəbçilərin dili ilə qəsdən və məqsədli şəkildə yayırlar, amma bu effektsiz olacaq, heç bir təsir göstərə bilməyəcək: “44 günlük Vətən müharibəsində qazandığımız qələbənin birmənalı olaraq memarı Azərbaycan əsgəridir, Azərbaycan ordusudur, Azərbaycançılardır. Prezident İlham Əliyevin dediyi kimi, bu qələbənin birinci qəhrəmanı Azərbaycan əsgəridir. Bu baxımdan, bu müharibədə əldə etdiyimiz qələbəni hansısa məzhəbçiliyə, təriqətə yönəltmək düşmənlərin işidir. Şübhəsiz ki, Azərbaycan əsgərinin əldə etdiyi bu möhtəşəm qələbəni müxtəlif yerə yozanlar bir tərəfdən ona kölgə salmaq istəyir, digər tərəfdən isə onin mahiyyətini məzhəbçiliyə bağlamaqla başqa yerə çəkmək niyyəti güdürlər. Daha doğrusu, bu kimi məsələləri ortaya atıb, guya Azərbaycan torpaqlarının düşmən tapdağından, işğaldan azad olunmasında hansısa bir məzhəbçi qrupun “rolu” olduğunu iddia etmək istəyirlər. Təəssüf ki, “Hüseynçilər” adı altında bu təxribatları edənlərin məqsədi cəmiyyətdə qarşıdurma yaratmaqdır. Aydındır ki, Azərbaycan xalqının da, Azərbaycan türklərinin də İmam Hüseynə sevgisi var, istər Azərbaycanın güneyində, istərsə də qüzeyində İmam Hüseynə və imamlara sevgi, sayğı bəsləyənlər məzhəbçi mövqe tutmur, islam dini nöqteyi-nəzərindən bir islam şəhidi kimi Hüseynə sevgi bəslənilir. İran adlanan ölkə və onun uzantıları bunu tamam başqa bir yerə yönəltməyə çalışır. Yəni “Hüseynçilər” adı altında fəaliyyət göstərən qrup əslində İmam Hüseynin adına zidd hərəkət edir. Sadəcə, onların məqsədi Azərbaycan xalqı arasında qarşıdurma yaratmaq və 44 günlük Vətən müharibəsində Azərbaycan ordumuzun qazandığı qələbəyə “məzhəb” donu geydirərək kölgə salmaqdır. Bu məzhəbçilik də məhz İranın siyasi-ideoloji məqsədlərinə xidmət edən məzhəbçilikdir. Bunun da nə islam dininə, nə Peyğəmbərə, nə İmam Hüseynə, nə də Əhli-beyt yoluna heç bir aidiyyəti yoxdur”.
“Hüseynçilər” məsələsini ortaya atanların və İmam Hüseynin adından istifadə edib oyun oynayanların Azərbaycan xalqının düşməni olduğunu deyən F.Ələkbərli bildirdi ki, bu qrup Vətən müharibəsi dövründə də müxtəlif təxribatlara əl atdı. “Çox maraqlıdır ki, İran şovinizminin təsiri altında olanlar, baxmayaraq ki, Ermənistan onlarla eyni dində və eyni məzhəbdə deyil, amma bu müharibəni başqa istiqamətə sürükləmək istəyir, erməniləri müdafiə edirdilər. Onlar bu müharibənin baş verməməsinə, Azərbaycanın qələbə əldə etməməsinə çalışırdılar. Bütün bunların hamısının arxasında İran rejimi və onun uzantıları dayanır. Məqsəd də Azəbaycan əsgərinin, Azərbaycan ordusunun qələbəsinə kölgə salmaqdır və dolayısı ilə onu hər hansı bir təriqətə bağlamaqla İrançılığı müdafiə etməkdir. Çox təəssüflər olsun ki, Azərbaycan Respublikasında da buna inanan bir neçə vətəndaş tapılır. Azərbaycan xalqının böyük əksəriyyəti bütün bu təxribatların hardan qaynaqlandığını yaxşı bilir. Son günlərdə baş verən hadisələr də onu göstərir ki, açıq-aşkar İran Azərbaycana qarşı məhz şiə məzhəbindən istifadə edərək hücuma keçib. Bəzi vətəndaşlarımızı da oyuna gətirməyə çalışırlar və təəssüflər olsun ki, bəziləri bu oyuna gəlir. Azərbaycan ordusunun, Azərbaycan əsgərinin möhtəşəm qələbəsini “Hüseynçilər”lə bağlanması qəbuledilməzdir. Bütün bunlar onu göstərir ki, xalqımız diqqətli olmalı, İranın və onun uzantılarının oyunlarına gəlməməlidir. İran İslam Respublikası adlanan ölkədə əslində islam dinindən əsər-əlamət yoxdur. Onlar açıq-aşkar Ermənistanı müdafiə edirlər…”
F.Ələkbərli vurğuladı ki, kimin hansı kampaniya aparmasından asılı olmayaraq, heç bir qüvvə qələbəmizə, əsgərlərimizin, şəhidlərimizin əməyinə kölgə sala bilməz: “Bu cür təxribatları törədənlər Azərbaycan şəhidlərinin ruhundan utansınlar və bu torpaq uğrunda can verənlərin qəhrəmanlığına kölgə salmasınlar. Bu torpaqlarımızı qəhrəman qazilərimizin, cənnətməkan şəhidlərimizin qəhrəmanlığı ilə azad etmişik. Qələbəmizə qarşı bu cür təxribatlar sərgiləyənlər şəhidlərimizin ruhundan utansınlar”.
İradə SARIYEVA
