“Bizə Böyük Britaniyanın müvafiq orqanlarından ilkin məlumat verilib. Həmin qurumlar Azərbaycan səfirliyinə hücumun araşdırılması ilə çox ciddi məşğuldurlar”.
“Haber Global” xəbər verir ki, bunu Azərbaycanın xarici işlər naziri Ceyhun Bayramov deyib. Nazir qeyd edib ki, Britaniya Azərbaycan səfirliyinə hücumun təkrarlanmayacağına dair zəmanət verməlidir. “Birləşmiş Krallığın Bakıdakı müvəqqəti işlər vəkili Xarici İşlər Nazirliyinə çağırılıb. Onunla hərtərəfli, ciddi söhbətimiz olub. Birinci məsələ və bizim Böyük Britaniyadan əsas gözləntimiz ilk növbədə Azərbaycana qarşı belə halların təkrarlanmamasına dair zəmanətlərin verilməsidir. Bu, Birləşmiş Krallığın Vyana Konvensiyasına əsasən öhdəliyidir. Diplomatik missiyaların, diplomatların təhlükəsizliyinin, toxunulmazlığının qorunması Vyana Konvensiyasını qəbul edən hər bir tərəfin birbaşa məsuliyyətidir” – deyə nazir vurğulayıb.
Qeyd edək ki, avqustun 4-də Azərbaycanın Londondakı səfirliyinə radikal dini qruplaşma tərəfindən hücum olub.
Rəsmi London öhdəliyini anlayıb Azərbaycana zəmanət verəcəkmi?
“Hər bir dövlət bu zəmanəti vermək və ölkəsində səfirliklərin təhlükəsizliyini qorumaqda mükəlləfdir”
Məsələyə şərh verən Azərbaycan Naminə Alyans Partiyasının sədri Abutalıb Səmədov “Bakı-Xəbər”ə bildirdi ki, Azərbaycanın xarici işlər naziri tamamilə düzgün mövqe sərgiləyib: “Xarici işlər naziri Ceyhun Bayramovun Böyük Britaniya hakimiyyəti qarşısında qoyduğu tələb tamamilə qanunauyğundur. Əslinə qalsa, dövlətlər Vyana Konvensiyasıba qoşularkən, onu təsdiq edərkən üzərlərinə belə bir öhdəlik götürürlər və ölkəsində təmsil olunan səfirliklərə bu zəmanəti verirlər. Hər bir dövlət bu zəmanəti vermək və ölkəsində səfirliklərin təhlükəsizliyini qorumaqda mükəlləfdir. Çox təəssüf ki, Böyük Britaniyada bu məsələ yüksək səviyyədə təşkil olunmayıb. Son beş ildə bu artıq ikinci hadisədir. Eyni qrupun eyni hadisəni təkrarən törətməsi Böyük Britaniya hakimiyyətinin məsuliyyətsizliyinin, yaxud onu bilərəkdən təşkil etməsinin nəticəsidir. Böyük Britaniya böyük dövlətdir, çox güclü təhlükəsizlik xidmətinə malik olan ölkədir və dalbadal belə bir halların bu ölkədə baş verməsi çox ciddi suallar doğurmaya bilməz. Ona görə, hesab edirəm ki, baş verən hadisədən Böyük Britaniya hakimiyyəti nəticə çıxarmalı və bir daha belə hadisənin baş verməməsi üçün zəruri təhlükəsizlik tədbirləri görməlidir”.
A.Səmədovun fikrincə, ikincisi, Xarici İşlər Nazirliyi də öz nəticələrini çıxarmalıdır. Hər halda digər ölkələrdəki səfirliklərimizin də buna hazır olmalı olduğunu deyən A.Səmədov vurğuladı ki, onlar Azərbaycan bayrağının belə təhqir olunmasına imkan verməməlidirlər, bu cür ekstremist qrupların səfirlik ərazisinə daxil olması hallarının qarşısını almaq üçün imkan daxilində səfirliklərimiz də öz tədbirlərini görməlidir. “Ən azı bu cür halların baş verdiyi vəziyyətdə müşahidəçi mövqeyində dayanıb Azərbaycan dövlətinin rəmzlərinin təhqir olunmasına tamaşa etməmilidirlər. Səfirliyimizlə bağlı belə hadisə ilk dəfə baş verdiyinə görə təbiidir ki, gözlənilməzlik effekti də var və açıq-aşkar səfirliyimizin bu cür hücumlara hazır olmadığı görsəndi. Ancaq bundan sonra digər səfirliklərimiz də bu cür hallara hazır olmalı və ən azı dövlət rəmzlərimizin təhqir olunmasına qarşı müqavimət göstərməyə çalışmalıdırlar”-deyə A.Səmədov vurğuladı.
İradə SARIYEVA
