“Əgər Ukraynada “Bayraktar” pilotsuz uçuş aparatları istehsal edən zavod inşa olunacaqsa, onlar dərhal demilitarizasiyaya məruz qalacaq”. Bunu Rusiya prezidenti Vladimir Putinin mətbuat katibi Dmitri Peskov deyib.
Daha sonra Peskov bunları əlavə edib: “Dərhal demilitarizasiyaya məruz qalacaq belə obyektin yaradılması faktı, yəqin ki, ukraynalıların əzablarını uzadacaq, amma xüsusi hərbi əməliyyatın əsas hədəflərindən yayınmağa imkan verməyəcək. Bunu anlamaq lazımdır”.
Bundan bir neçə müddət əvvəl Rusiyanın Türkiyədəki səfiri Aleksey Yerxov “Aydınlıq” qəzetinə müsahibəsində demişdi ki, “Bayraktar”ların Ukraynaya çatdırılması Rusiya cəmiyyətində ağrılı qarşılanır.
Məlumat üçün qeyd edək ki, avqustun 8-də Ukraynanın Türkiyədəki səfiri Vasil Bodnar Ukraynada “Bayraktar” PUA-larını istehsal edən zavodun tikiləcəyini açıqlayıb. Onun sözlərinə görə, Ukrayna və Türkiyə arasında "Bayraktar" zavodunun tikintisinə dair saziş təsdiqlənib. Həmçinin qeyd edib ki, türk şirkəti bununla bağlı Ukraynada torpaq sahəsi alıb.
Görünən odur ki, Rusiya bununla bağlı açıq təhdid dilində danışır. Ukraynada “Bayraktar” PUA istehsal edən zavod inşa olunacağı təqdirdə onun vurulacağını deyir. Belə məlum olur ki, bu məsələdə Türkiyə ilə olan münasibətlər də nəzərə alınmayacaq.
Maraqlıdır, bütün bunları ekspertlər necə dəyərləndirir?
“Rusiyanın buna hansısa formada müdaxilə etməsi, təhdidlər səsləndirməsi hüquqi baxımdan doğru deyil”
Məsələyə münasibət bildirən Demokratik Dəyişim Partiyası Təşkilat Komitəsinin sədri Əli Mustafayevin fikrincə, Rusiyanın bu yöndə təhdidləri boş və mənasızdır: “Əvvəla, “Bayraktar” PUA istehsal edən zavodun inşa olunması ilə bağlı Ukrayna ilə razılaşma müharibə başlamazdan əvvəl olub. Rusiya Ukraynaya hücum etməzdən əvvəl tərəfllər arasında bununla bağlı niyyət protokolu imzalanıb. O baxımdan, Rusiyanın buna hansısa formada müdaxilə etməsi, təhdidlər səsləndirməsi hüquqi baxımdan doğru deyil. Dmitri Peskovun açıqlamalarına gəldikdə isə, o çox vaxt mənasız fikirlər səsləndirir. O üzdən hesab edirəm ki, Rusiya ciddi dövlət imicini getdikcə itirir. Bəli, Rusiya rəsmisi bununla Ukraynaya və Türkiyəyə çəkindirici mesaj verir. Ancaq biz nəzərə almalıyıq ki, Rusiya Ukraynanın bütün ərazisinə nəzarət etmək imkanına sahib deyil. Elə ərazilər var ki, Rusiyanın oranı vurmaq imkanı məhduddur. Söhbət Avropa İttifaqı ölkələrinin sərhədlərinə yaxın olan ərazilərdən gedir. Bu ölkələr həm də NATO-da təmsil olunurlar. Bu, həm də onu göstərir ki, Rusiya “Bayraktar” PUA-larından çəkinir. Belə olmasaydı, o zaman Rusiya rəsmiləri bu dərəcədə sərt açıqlama ilə çıxış etməzdilər. Digər bir tərəfdən, Kreml belə bir addım atarsa, bu, Rusiya-Türkiyə münasibətlərinə mənfi təsir edəcək. Onsuz da Ukraynaya təcavüz üzündən Rusiyanın bir çox ölkələrlə münasibətləri pozulub. Hansısa yanlış addım Rusiyanın bir qədər də dünyada təklənməsinə gətirib çıxara bilər”.
Bütün bunlardan çıxış edən Əli Mustafayev Rusiyanın təhdidlərini real saymır.
Vidadi ORDAHALLI
