Rusiya FTX-nin Ermənistandakı Sərhəd İdarəsi Mehri-Aqarak magistralının İranla sərhəddə yerləşən hissəsində nəzarəti gücləndirib. Üstəlik, Rusiya sərhədçiləri Mehridə 5 modul məntəqəsi yaradıblar.
Rusiya FTX-nin Ermənistandakı Sərhəd İdarəsi Mehri-Ağarak avtomobil yolunun İranla sərhəddə yerləşən hissəsində nəzarətin gücləndirilməsinin səbəblərini açıqlayıb. FTX-nin İdarə Heyəti izah edib ki, Mehri-Agarak (M2) avtomobil yolunun Ermənistan və İran İslam Respublikası dövlət sərhədi boyunca yerləşən hissəsində nəzarət gücləndirilir. Bu, İrandan Ermənistana qeyri-qanuni yolla ağır narkotik vasitələrin və psixotrop maddələrin (həşiş, metamfetamin, heroin) gətirilməsi cəhdlərinin artması ilə əlaqədardır. Şöbə xatırladıb ki, Ermənistanın Türkiyə və İranla dövlət sərhədinin mühafizəsi üzrə FTX-nin fəaliyyəti “Azərbaycan Respublikasının sərhəd qoşunlarının statusu haqqında” dövlətlərarası saziş əsasında həyata keçirilir. Departament qeyd edib ki, son vaxtlar ağır narkotik vasitələrin və psixotrop maddələrin İrandan Ermənistana qanunsuz keçirilməsi cəhdlərinin artması nəticəsində dövlət sərhədinin Ermənistan-İran bölməsində gərgin əməliyyat şəraiti yaranıb. Bundan başqa, ekstremist və terror təşkilatlarının nümayəndələri tərəfindən dövlət sərhədinin pozulması halları qeydə alınır. Belə ki, 2021-ci ildə Mehri sərhəd dəstəsinin yerləşdiyi ərazidə Rusiya sərhədçiləri qanunsuz olaraq İrandan gələn iki sərhəd pozucusunu silah, qumbara və külli miqdarda sursatla saxlayıblar. Yoxlama tədbirlərinin həyata keçirilməsi üçün sərhəd naryadlarının təchiz olunmuş qaçaqmalçılıq, qeyri-qanuni miqrasiyanın təşkili və digər hüquqpozmalar faktları üzrə növbətçi postları yaradılıb.
Azərbaycan 2 ilə yaxındır ki, 132 kilometrlik İranla sərhəd hissəni işğaldan azad edib. Buna qədər, yəni işğal dövründə həmin nəzarətsiz hissədən ermənilər narkotik qaçaqmalçılığı məqsədilə istifadə edirdilər. O baxımdan necə olur ki, indi İran-Ermənistan sərhədini narkotikə görə qorumaq FTX-nin yadına düşüb? Doğrudanmı FTX narkotikə görə bu addımları atır, yoxsa səbəb Zəngəzur dəhlizinə yönəlik İranın təhdidləridir?
“Moskva bununla İrana mesaj verir ki, Zəngəzur dəhlizi açılacaq və buna Rusiya nəzarət edəcək”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə hesab edir ki, Rusiyanın məlum addımları əsasən regionda gedən proseslərlə bağlıdır: “Məlum olduğu kimi, Ermənistanın sərhəd mühafizəsini Rusiya FTX həyata keçirir. Rusiyanın Zəngəzurda İranla sərhəddə nəzarəti artırması əsasən regionda baş verən proseslərlə bağlıdır. Narkotik qaçaqmalçılığının artması ilə bağlı deyilənlər reallığı əks etdirmir. İran Zəngəzurda konsulluq açır, Ermənistanla birgə festival və digər layihələr həyata keçirir. Tehranın burada məqsədi Zəngəzur dəhlizinin açılmasına mane olmaq və prosesi tormozlamaqdı. İranın Ermənistanda mövqeyini gücləndirmək planı Moskvanı narahat edir. Və Kreml yaxşı anlayır ki, İran Ermənistanda siyasi vəziyyəti Moskva əleyhinə dəyişə bilər. Bundan əlavə, Zəngəzur dəhlizinin reallaşmasinı hazırda Rusiya istəyir. Amma İranın mövqeyinin ortaya çıxmasi Moskvanın hərəkətə keçməsinə səbəb olur. Düşünürəm ki, Rusiya İranın provokasıyalarına qarşı sərhəddə gücləndirmə işi aparır. Fikrimcə, Moskva bununla İrana mesaj verir ki, Zəngəzur dəhlizi açılacaq və buna Rusiya nəzarət edəcək”.
Bir sözlə, politoloq hesab edir ki, İran qəbul etsə də, etməsə də Zəngəzur dəhlizi açılacaq.
Vidadi ORDAHALLI
