Ermənistanın panorama.am saytının fotoqrafı Lilian Qalstyanın parlamentdə işləməsinə qadağa qoyulub. Bu barədə Qalstyanın işlədiyi redaksiyaya parlament aparatından qadağanın səbəblərini göstərən məktub gəlib.
Qadağaya səbəb kimi isə Ermənistan parlamenti sədrinin qərarının 1-ci əlavəsinin 2.8-ci bəndi göstərilib. Belə ki, həmin bəndə görə, xüsusi mühafizə olunan obyektlərdə, eyni zamanda parlament binasında təhlükəsizlik işçilərinin foto və video çəkilişlərinin aparılması qadağan edilib. Qeyd edək ki, sözügedən qadağa iyulun 30-da Alen Simonyan tərəfindən hələ parlamentə spiker təyin olunmazdan əvvəl qəbul olunub. Nəticədə parlamentin ilk iş günündə əraziyə gələn jurnalistlər xoşagəlməz sürprizlərlə qarşılaşıblar. Belə ki, media mənsubları parlament ətrafında sərbəst hərəkət etməkdən və deputatlardan müsahibə almaqdan məhrum olublar. Hətta parlamentdə kabinetlərarası dəhlizdə gediş-gəliş tam şəkildə məhdudlaşdırılıb. Bununla yanaşı, müxalif fraksiyanı təmsil edən “Şərəf duyuram” blokunun deputatı Anne Mkrtçyan Ermənistan baş nazirini “Nikol kapitulyant” adlandırdığı üçün səsvermə hüququndan məhrum edilib.
Maraqlıdır ki, Ermənistanın yeni formalaşan parlamentində baş verən bu antidemokratik addımlara dünyanın nüfuzlu beynəlxalq təşkilatları və ölkələri susur. Onların reaksiyasızlığını nə ilə izah edə bilərik?
Milli Qeyri Hökumət Təşkilatları Forumunun prezidenti Rauf Zeyni “Bakı-Xəbər”ə açıqlamasında bildirdi ki, Ermənistan dövlətinin özünün mövcudluğuna belə dünya birliyi etiraz etməlidir: “Çünki həmin ölkənin mahiyyəti terrordan ibarətdir. Müstəqil kimi mövcud olduğu dönəmdə başqa ölkənin ərazilərini 30 il müddətində işğalda saxlayıb. Onda dünya birliyi buna etiraz edirdi? Azərbaycan yalnız öz gücünə ərazilərini işğaldan azad etdi. Həmin ölkədən normal nəsə gözləməyə dəyməz. Mayası terrorla yoğrulan bir ölkənin parlamentindən nə gözləmək olar? Ölkəyə Paşinyan yox, başqası rəhbərlik etsə də belə olacaq. 90-cı illərin sonunda girib Ermənistan parlamentini gülləbaran edib bütün ölkənin rəhbərliyini qətlə yetirdilər. Ermənistan parlamenti bu ənənələrə sahibdir. Buna görə də, onlardan hansısa demokratik addımları gözləmək yersizdir. Mən bütün beynəlxalq tədbirlərdə erməni nümyəndələrlə söhbətimdə deyirdim ki, sizin parlament törətdiyiniz cinayətlərə qiymət verməyibsə, hansı haqla demokratiyadan danışırsınız? Diktaturanın demokratiya adı altında fəaliyyət göstərməsinə biz Ermənistan mühitində daha qabarıq rast gəlirik. Onların parlamentində hətta silah səsləri də eşidilə bilər. Çünki bir dəstə başqası ilə haqq-hesab çürüdür. “Ermənistan” və “Qarabağ” klanı arasında müharibə gedir. Beynəlxalq qurumlar bu işin mahiyyətini gözəl bilir. Məğlubiyyəti həzm edə bilmələri üçün beynəlxalq dairələr bir qədər onların başını sığallayır. Bütün bunların cavabı o olmalıdır ki, biz tarixi torpaqlarımızı geri qaytarmalıyıq. Xarici dairələr hər zaman ikili standartdan irəli gələn mövqe ortaya qoyublar. Ermənistan onların ərköyün ölkəsidir. Biz buna fikir vermədən öz hədəfimizə doğru getməliyik”.
Məhəmmədəli QƏRİBLİ
