Erməni alimlərinin saxtakarlığı artıq sınırları aşır və onlar öz uydurmalarını saatbasaat genişləndirirlər. Qarabağ zəfərindən sonra erməni elm adamları öz yalanlarının üstünə daha böyük yalanlar qoyub yaymaqda davam edirlər, daha böyük ağ yalanlar tirajlayırlar.
İrəvan Dövlət Universitetinin Şərqşünaslıq fakültəsinin İranşünaslıq kafedrasının müdiri Vardan Voskanyan Facebook səhifəsində yazdığı statusda çox çürük və əsassız bir iddia ortaya qoymağa çalışıb. Bu adam iddia edir ki, 100-150 il bundan əvvəl Sofulu və Barxudarlı adlanan köçəri tayfalar hardansa gəlib “erməni torpağında” məskən salıblar və bu torpaqlarda “heç bir mədəni irs yaratmayıblar, amma iddia edirlər ki, Ermənistan ərazisində 7 anklav kəndləri qalıb”. Heç şübhəsiz, başabəla erməni alimi Sofulu və Barxudarlı tayfalarını “köçəri” adlandırmaqla və yaxın tarixdə “bu ərazidə məskunlaşıqlarını və burada heç bir mədəni irs yaratmadıqlarını” iddia etməklə ermənilərin bu bölgələrə gəlmə olduğunu ört-basdır etmək istəyir, bundan əlavə, 10 noyabr razılaşmasından sonra Qazaxın 7 anklav kəndinin Azərbaycana qaytarılması tələbinin ortaya çıxması və prosesin artıq irəliləməkdə olduğunun bilinməsi erməni alimlərinin yuxusunu qaçırıb. Bu səbəbdən də bu torpaqların qədim Sofulu və Barxudarlı tayfalarını “köçəri” adlandırmaqdan çəkinmirlər.
Erməni alimləri illərdir ki, belə cəfəng iddilarla, həyasızlıqlarla yaxa-başlarını yırtırlar, amma bizim alimlərin tükü də tərpənmir. Yəni erməni alimlərinə cavab vermək istəmirlər. Erməni alimi açıq-aşkar iki qədim aborigen türk tayfasını “gəlmə”, “köçəri” adlandırır, amma bizim alimlər susur. Əslində, susmaq düşmənə söz haqqı vermək anlamına gəlmirmi? Hanı etnoqraflar, hanı bu xalqın tarixi öyrənənləri, niyə erməni aliminin ağzından tərs sillə vurmur ki, sən dünən gəlmisən, bura mənim qayım-qədim yurdumdur?!
Bir məqamı da qeyd edək ki, bir çox hallarda erməni alimlərinin əsassız iddialarına bizim bəzi alimlərin başdansovdu, qeyri-ciddi şəkildə apardıqları tədqiqatlar şərait yaradır. Sofulular qədim türk tayfalarından biri olan Kəngərlilərin bir qoludur və türk coğrafiyasında geniş yayılan tayfalardan biridir.
Azərbaycan alimləri nə üçün qədim və aborigen türk tayfalarını “köçəri” adlandıran başabəla erməni aliminə zamanında cavab vermədilər?
“Erməni alimlərinin cəfəngiyatlarının, qeyri-elmi və məntiqsiz iddialarının qarşısını almağın yeganə yolu...”
Tarix üzrə fəlsəfə doktoru, dosent Mübariz Ağalarlı “Bakı-Xəbər”ə bildirdi ki, bəzi tədqiqatçılar bu qədim türk tayfaları ilə bağlı tədqiqatlar aparıblar. M.Ağalarlının sözlərinə görə, biz bütünlükdə Azərbaycana qarşı şər-böhtan kampaniyası aparanların qarşısında dayanmalıyıq. Erməni aliminin iddiasının əsassız olduğunu deyən M.Ağalarlının sözlərinə görə, çox təəssüf ki, bizim alimlərin xeyli hissəsi ermənilərin cəfəngiyyatlarına cavab vermək məsələsində aktivlik göstərmir. “Bir çox alimlərimiz bu istiqamətdə tədqiqat işləri aparıblar. Bu öz yerində. Eyni zamanda bizim alimlər tərəfindən erməni alimlərin sosial şəbəkələrdəki, başqa platformalardakı bu cür cəfəng çıxışlarına, iddialarına dərhal əsaslı cavab verilməlidir. Heş şübhəsiz, biz onların yazılarını izləməliyik, adekvat cavabı gecikdirməməliyik. Erməni alimlərinə mütləq şəkildə ciddi, tutarlı elmi məqalələrlə də cavab verilməsinə ehtiyac var. Tam əksəriyyət olmasa da, Azərbaycanın elm cameəsi bu məsələlərdə o qədər də fəal deyil. Biz bunu alimlərimizin çoxunun təkcə erməni alimlərinin iddialarına cavab verməyə maraq göstərmədiklərində görmürük, eyni zamanda İranla əlaqədar məsələlərdə də görürük. Çox təəssüf ki, bir çox bu kimi taleyüklü məsələlərdə alimlərimizin çoxunun susduğunu görürük. Yadınıza gəlirsə, İran şəhid generalımız, Milli Qəhrəman Polad Həşimovun ailəsinə “Qasim Süleymani” medalı təqdim etmişdi, onda da Azərbaycan elm cameəsindən heç kəsin səsi çıxmadı, təkcə mənim etiraz xarakterli yazım yayımlandı. Demək istəyirəm ki, onda da mən xaric, münasibət bildirən olmadı. Çox təəssüf ki, bizim alimlərimizin böyük əksəriyyəti sosial şəbəkələrdə də o qədər aktiv deyillər”.
Sofulu və Barxudarlı tayfaları barədə də danışan M.Ağalarlının sözlərinə görə, hər ikisi qədim türk tayfasıdır və onlar bura gəlmə deyil, aborigen tayfalardır, min illərdir ki, bu ərazilərdə yaşayıblar, bu gün də öz varlıqlarını davam etdirirlər. Bizim bəzi alimlərin etnogenez sahəsində axsamalarına gəlincə, M.Ağalarlı bildirdi ki, bu istiqamətdə ortada hələ bir akademik nəşr yoxdur: “Bu etnogenez millətin soy-kök və formalaşması məsələsidir. Sovet dövründə Azərbaycan xalqının formalaşması, etnogenezi ilə bağlı müəyyən əsərlər yazılıb, amma bu gün o konsepsiya öz mahiyyətini, elmi dəyərini itirib... Onlar “Altay nəzəriyyəsi”ni ortaya atırlar, bu nəzəriyyə tamamilə bizim əleyhimizədir. Amma bütün tarixi mənbələr, bütün araşdırmalar göstərir ki, türk xalqı bu torpaqların yerli, aborigen sakinləridir. Yəni burada türklər yaşayıblar və Sofulu, Barxudarlı kimi tayfalar da gəlmə deyil, yerli tayfalardır, əhalidir. Erməni alimlərinin cəfəngiyatlarının, qeyri-elmi və məntiqsiz iddialarının qarşısını almağın yeganə yolu Azərbaycan xalqının etnogenez məsələlərini akademik səviyyədə araşdırmaqdır. 30 ildir dövlət müstəqilliyimizi bərpa etmişik, təəssüflər olsun ki, entogenezimizlə bağlı bir dənə də olsun elmi müstəvidə fundamental əsərə rast gəlməmişəm. Faktiki olaraq, akademik səviyyədə belə əsər yoxdu, rast gəlməmişəm. Dəfələrlə deyilib ki, Azərbaycan xalqının formalaşması prosesi yeni düşüncə, yeni təfəkkürlə işlənilməlidir”-deyə M. Ağalarlı bildirdi.
İradə SARIYEVA
